വിലക്കയറ്റ കണക്കുകള്‍, പാദഫലങ്ങള്‍; ഈയാഴ്ച വിപണിയെ സ്വാധീനിക്കുക എന്തൊക്കെ?

രണ്ട് ദിവസത്തെ ഇടിവിന് ശേഷം തിരിച്ചുവന്ന വിപണികള്‍ താരതമ്യേന ഭേദപ്പെട്ട നേട്ടവുമാണ് കഴിഞ്ഞവാരം വ്യാപാരം അവസാനിപ്പിച്ചത്. ക്രൂഡ് ഓയില്‍ വിലയില്‍ പൊടുന്നനെ ഉണ്ടായ ഇടിവും പ്രതീക്ഷകളില്‍ നിന്ന് വ്യതിചലിക്കാത്ത റിസര്‍വ് ബാങ്ക് ധനനയവും യുഎസ് ഡോളറും ട്രഷറി ആദായവും അല്‍പ്പം ഇറങ്ങിയതും നിക്ഷേപകരുടെ വികാരം ഉയര്‍ത്തി. 

വാരത്തില്‍ മൊത്തമായി ബിഎസ്ഇ സെൻസെക്‌സ് 167 പോയിന്റ് ഉയർന്ന് 65,996ലും നിഫ്റ്റി 50 15 പോയിന്റ് ഉയർന്ന് 19,654ലും എത്തി. നിഫ്റ്റി മിഡ്‌ക്യാപ് 100 സൂചിക 0.6 ശതമാനവും സ്‌മോൾക്യാപ് 100 സൂചിക 0.7 ശതമാനവും ഉയർന്നു. ഓട്ടോമൊബൈല്‍, ബാങ്കുകൾ, ഊർജം, ഫാർമ, ഓയിൽ, ഗ്യാസ് തുടങ്ങിയ മേഖലകളിലെ ഓഹരികള്‍  സമ്മർദ്ദത്തിലായിരുന്നു, അതേസമയം സാങ്കേതികവിദ്യ, റിയാലിറ്റി ഓഹരികൾ ഉയർന്ന പ്രവണതയിലാണ്.

ഓഹരികള്‍ കേന്ദ്രീകരിച്ച് നിക്ഷേപം

വീണ്ടെടുപ്പ് അടുത്തവാരത്തിലും തുടരാനുള്ള സാഹചര്യമുണ്ടെങ്കിലും വിപണിയിലെ ചാഞ്ചാട്ടങ്ങള്‍ക്കുള്ള സാധ്യതകള്‍ നിലനില്‍ക്കുന്നതായി വിദഗ്ധര്‍ വിലയിരുത്തുന്നു. രണ്ടാം പാദത്തിലെ കോര്‍പ്പറേറ്റ് വരുമാന പ്രഖ്യാപനങ്ങള്‍ ഈ വാരത്തോട് കൂടി സജീവമാകും. അതിനാല്‍ നിര്‍ദിഷ്ട ഓഹരികള്‍ കേന്ദ്രീകരിച്ചുള്ള നിക്ഷേപങ്ങളില്‍ നിക്ഷേപകര്‍ ശ്രദ്ധ വെക്കും. 

ക്രൂഡ് ഓയില്‍ വിലയുടെ മുന്നോട്ടുപോക്കും വിദേശ നിക്ഷേപങ്ങളുടെ ഗതിയും ചാഞ്ചാട്ടങ്ങള്‍ക്ക് വഴിവെച്ചെക്കാം. ഈയാഴ്ച പുറത്തിറങ്ങാനിരിക്കുന്ന ഉപഭോക്തൃ പണപ്പെരുപ്പം സംബന്ധിച്ച കണക്കാണ് വിപണിയെ കാര്യമായി സ്വാധീനിക്കാന്‍ ഇടയുള്ള മറ്റൊരു പ്രധാന ഘടകം. 

ഈയാഴ്ച പുറത്തുവരുന്ന ഫലങ്ങള്‍

ജൂലൈ-സെപ്റ്റംബർ കാലയളവിലെ കോർപ്പറേറ്റ് വരുമാന പ്രഖ്യാപന സീസണിന് ഐടി വമ്പന്‍മാരിലൂടെ തുടക്കമാകും. ഒക്ടോബർ 11ന് ടിസിഎസ് തങ്ങളുടെ സ്‌കോർകാർഡ് പുറത്തിറക്കും. എച്ച്‌സിഎൽ ടെക്‌നോളജീസ്, ഇൻഫോസിസ്, എച്ച്‌ഡിഎഫ്‌സി എഎംസി എന്നിവ  ഒക്ടോബർ 12-നും എച്ച്‌ഡിഎഫ്‌സി ലൈഫ് ഇൻഷുറൻസ് കമ്പനി ഒക്ടോബർ 13-നും അവന്യൂ സൂപ്പർമാർട്ടുകൾ ഒക്ടോബർ 14-നും എച്ച്‌ഡിഎഫ്‌സി ബാങ്ക് ഒക്ടോബർ 15-നും ത്രൈമാസ വരുമാനം പ്രഖ്യാപിക്കും.

അടുത്തിടെ ലിസ്റ്റ് ചെയ്ത കമ്പനികളായ സംഹി ഹോട്ടൽസ്, സിഗ്നേച്ചർ ഗ്ലോബൽ (ഇന്ത്യ), സാഗിൾ പ്രീപെയ്ഡ് ഓഷ്യൻ സർവീസസ് എന്നിവയും ഒക്ടോബർ 11ന് പാദഫലങ്ങള്‍ പ്രഖ്യാപിക്കും.

നിഫ്റ്റി 50 കമ്പനികളുടെ വരുമാന വളർച്ച ജൂലായ്-സെപ്റ്റംബർ കാലയളവിൽ 21-23 ശതമാനം ആയിരിക്കുമെന്ന് ഭൂരിഭാഗം ബ്രോക്കറേജുകളും പ്രതീക്ഷിക്കുന്നു. ബാങ്കുകളും വാഹന, എണ്ണ വിപണന കമ്പനികളും മികച്ച വരുമാനം രേഖപ്പെടുത്തുമെന്നാണ് പ്രതീക്ഷിക്കപ്പെടുന്നത്. 

പണപ്പെരുപ്പം വരുതിയിലെത്തുമോ?

സെപ്റ്റംബറിലെ ഉപഭോക്തൃ വില അടിസ്ഥാനമാക്കിയുള്ള വിലക്കയറ്റ കണക്കുകള്‍ ഒക്റ്റോബര്‍ 12 ന് കേന്ദ്ര സര്‍ക്കാര്‍ പുറത്തുവിടും.  ജൂലൈയിലും ഓഗസ്റ്റിലും റിസര്‍വ് ബാങ്കിന്‍റെ സഹന പരിധിയായ 6 ശതമാനത്തിന് മുകളിലുള്ള വിലക്കയറ്റ തോതാണ് രേഖപ്പെടുത്തിയിരുന്നത്. പച്ചക്കറി വിലയിലും പാചകവാതക വിലയിലും ഉണ്ടായ ഇടിവിന്‍റെ ഫലമായി ഇത് താഴോട്ടുവരുമെന്ന് പ്രതീക്ഷിക്കപ്പെടുന്നു. 

ഓഗസ്‍റ്റിലെ 6.8 ശതമാനത്തില്‍ നിന്ന് സെപ്റ്റംബറില്‍ 5 .3 ശതമാനമായി വിലക്കയറ്റ തോത് കുറയുമെന്ന് കരുതുന്നതായി ബാർക്ലേസിലെ ഇഎം ഏഷ്യ (എക്‌-ചൈന) ഇക്കണോമിക്‌സ് എംഡിയും ഹെഡുമായ രാഹുൽ ബജോറിയ ​​പറഞ്ഞു, മുഖ്യ പണപ്പെരുപ്പം മാറ്റമില്ലാതെ തുടരാൻ സാധ്യതയുണ്ടെന്നും ഇത് പോളിസി നിരക്കുകൾ മാറ്റമില്ലാതെ നിലനിർത്താൻ ആർബിഐയെ അനുവദിക്കുമെന്നും പറഞ്ഞു.

കൂടാതെ, ഓഗസ്റ്റിലെ വ്യാവസായിക ഉൽപ്പാദന ഡാറ്റയും ഒക്ടോബർ 12 ന് പ്രഖ്യാപിക്കും, അതേസമയം സെപ്റ്റംബർ മാസത്തെ മൊത്തവില പണപ്പെരുപ്പവും കയറ്റുമതി ഇറക്കുമതി കണക്കുകളും ഒക്ടോബർ 6 ന് അവസാനിച്ച ആഴ്ചയിലെ വിദേശനാണ്യ കരുതൽ ശേഖരത്തിന്‍റെ വിവരവും ഒക്ടോബർ 13ന് പുറത്തുവിടും.

ഫെഡ് റിസര്‍വ് മിനുറ്റ്സും യുഎസ് പണപ്പെരുപ്പവും

യുഎസ് ഫെഡ് റിസര്‍വിന്‍റെ സെപ്റ്റംബറിലെ പണനയ സമിതി യോഗത്തിന്‍റെ മിനുറ്റ്സ് ഒക്‌ടോബർ 11-ന് പുറത്തിറങ്ങും. ഉയര്‍ന്ന പലിശ നിരക്കുകളില്‍ ഇളവു വരുത്താന്‍ കൂടുതല്‍ കാലം കാത്തിരിക്കേണ്ടി വരുമെന്ന സൂചന നയപ്രഖ്യാപനത്തില്‍ ഫെഡ്റിസര്‍വ് നല്‍കിയത് വിപണിക്ക് നെഗറ്റിവ് പ്രവണത സമ്മാനിച്ചിരുന്നു. ഇതു സംബന്ധിച്ച കൂടുതല്‍ വ്യക്തതയ്ക്കായി ആഗോള തലത്തില്‍ നിക്ഷേപകര്‍ കാത്തിരിക്കുകയാണ്. 

സെപ്‌റ്റംബറിലെ യുഎസ് പണപ്പെരുപ്പം സംബന്ധിച്ച കണക്കുകള്‍ ഒക്‌ടോബർ 12ന് പുറത്തുവിടും. പണപ്പെരുപ്പം 2 ശതമാനത്തിന് അടുത്തേക്ക് എത്തിക്കുന്നതിനാണ് ഫെഡ് റിസര്‍വ് ലക്ഷ്യമിടുന്നത്. ഇതില്‍ എത്രത്തോളം വിജയിച്ചു എന്നതിന്‍റെ അടിസ്ഥാനത്തിലാകും പണനയം ലഘൂകരിക്കുന്നതിലേക്ക് നീങ്ങുക. ഓഗസ്റ്റിലെ 3.7 ശതമാനത്തിൽ നിന്ന് സെപ്റ്റംബറിൽ പണപ്പെരുപ്പം കുറയുമെന്ന് വിശകലന വിദഗ്ധർ പ്രതീക്ഷിക്കുന്നു, ഫെഡ് റിസര്‍വ് അംഗങ്ങള്‍ പങ്കെടുക്കുന്ന നിരവധി യോഗങ്ങളും ഈയാഴ്ച നടക്കുന്നുണ്ട്. 

സെപ്റ്റംബറിലെ പണപ്പെരുപ്പ കണക്കുകള്‍ ചൈനയും ഈയാഴ്ച പുറത്തുവിടും. ഓഗസ്റ്റില്‍ ചൈനയുടെ പണപ്പെരുപ്പം 0.1 ശതമാനമായിരുന്നു.

എണ്ണവിലയുടെ പോക്ക്

10 മാസത്തിലെ ഏറ്റവും ഉയര്‍ന്ന നിലയില്‍ നിന്ന് എണ്ണവില കുത്തനെ ഇടിഞ്ഞത് ഇന്ത്യൻ ഓഹരി വിപണികൾക്ക് അനുകൂലമാണ്, കാരണം ഇന്ത്യ എണ്ണ ഇറക്കുമതിക്കാരാണ്. ആഗോള ഡിമാൻഡ് ആശങ്കകൾക്കൊപ്പം യുഎസ് ബോണ്ട് ആദായവും ഡോളറും ശക്തമായി തുടരുന്നതും ഈ  ആഴ്ചയിലെ എണ്ണവിലയെ ബാധിച്ചു. അന്താരാഷ്ട്ര ബെഞ്ച്മാർക്കായ ബ്രെന്റ് ക്രൂഡ് ഫ്യൂച്ചറുകൾ ആഴ്ചയിൽ 8.26 ശതമാനം ഇടിവ് രേഖപ്പെടുത്തി ബാരലിന് 84.58 ഡോളറിലെത്തി, മാർച്ചിന് ശേഷമുള്ള ഏറ്റവും വലിയ പ്രതിവാര നഷ്ടമാണിത്. ബാരലിന് 95.96 ഡോളര്‍ വരെ ഉയര്‍ന്ന വിലയില്‍ നിന്നും തുടര്‍ച്ചയായ മൂന്നാം വാരമാണ് ഇടിവ് രേഖപ്പെടുത്തുന്നത്. 

വിദേശ നിക്ഷേപങ്ങളുടെ പോക്ക്

യുഎസ് 10 വർഷത്തെ യുഎസ് ട്രഷറി ആദായം 16 വർഷത്തെ ഏറ്റവും ഉയർന്ന നിലയിലേക്ക് കുതിക്കുകയും യുഎസ് ഡോളർ സൂചിക കഴിഞ്ഞ വർഷം നവംബറിന് ശേഷമുള്ള ഏറ്റവും ഉയർന്ന നിലയിലെത്തുകയും ചെയ്തതിനാൽ,  വിദേശ നിക്ഷേപക സ്ഥാപനങ്ങള്‍ ക്യാഷ് സെഗ്‌മെന്റിൽ 8,400 കോടി രൂപയുടെ ഓഹരികൾ വിറ്റു. യുഎസ് ബോണ്ട് യീൽഡുകളിലും ഡോളർ സൂചികയിലും ഇടിവ് ഉണ്ടാകുന്നതുവരെ ഈ പുറത്തേക്കൊഴുക്ക് തുടരുമെന്നാണ് വിലയിരുത്തല്‍.

ഒക്‌ടോബർ ആദ്യവാരം ആഭ്യന്തര നിക്ഷേപക സ്ഥാപനങ്ങള്‍ 4,400 കോടി രൂപയുടെ ഓഹരികൾ വാങ്ങിയിട്ടുണ്ട്.