ആഗോള സൂചികകളിൽ മുന്നേറ്റം, ഇന്ന് വിപണി തുറക്കും മുമ്പ് അറിയേണ്ടതെല്ലാം

പോസിറ്റീവായ ആഗോള സൂചനകൾക്കിടയിൽ ഇന്ത്യൻ ഓഹരി വിപണി ഇന്ന് (തിങ്കളാഴ്ച) ഉയർന്ന് തുറക്കാൻ സാധ്യതയുണ്ട്. ഗിഫ്റ്റ് നിഫ്റ്റിയിലെ ട്രെൻഡുകൾ ഇന്ത്യൻ സൂചികയുടെ ഗ്യാപ് അപ്പ് ആരംഭത്തെ സൂചിപ്പിക്കുന്നു. ഗിഫ്റ്റ് നിഫ്റ്റി 22,685 ലെവലിലാണ് വ്യാപാരം ചെയ്യുന്നത്. നിഫ്റ്റി ഫ്യൂച്ചേഴ്സിൻറെ മുൻ ക്ലോസിൽ നിന്ന് ഏകദേശം 110 പോയിൻറുകളുടെ പ്രീമിയം.

ഏഷ്യൻ വിപണികൾ ഉയർന്ന നിലയിൽ വ്യാപാരം നടത്തുന്നു. യുഎസ് തൊഴിൽ റിപ്പോർട്ട് പുറത്തു വന്നതിനെത്തുടർന്ന് യുഎസ് സ്റ്റോക്ക് മാർക്കറ്റ് കഴിഞ്ഞയാഴ്ച ഉയർന്നു.

ശക്തമായ ആഗോള വിപണി വികാരങ്ങൾക്കിടയിലും ഇന്ത്യൻ ഓഹരി വിപണി വെള്ളിയാഴ്ച നഷ്ടത്തിലാണ് അവസാനിച്ചത്. നിഫ്റ്റി 50 സൂചിക 22,794 എന്ന പുതിയ ഉയരത്തിൽ എത്തിയതിന് ശേഷം 172 പോയിൻറ് താഴ്ന്ന് അവസാനിച്ചു. ബിഎസ്ഇ സെൻസെക്‌സ് അതിൻറെ ആജീവനാന്ത ഉയരമായ 75,124 ൽ എത്തിയ ശേഷം 732 പോയിൻറ് താഴ്ന്നു. ബാങ്ക് നിഫ്റ്റി സൂചികയും 307 പോയിൻറ് ഇടിഞ്ഞ് 48,923 ൽ ക്ലോസ് ചെയ്തു. വിശാലമായ വിപണിയിൽ, സ്മോൾ ക്യാപ് സൂചിക 47,678 എന്ന പുതിയ ഉയരത്തിൽ എത്തിയതിന് ശേഷം 0.55 ശതമാനം താഴ്ന്ന് അവസാനിച്ചു. 42,774 എന്ന പുതിയ ഉയരം തൊട്ടതിന് ശേഷം മിഡ് ക്യാപ് സൂചിക 0.21 ശതമാനം താഴ്ന്നു.

ഏഷ്യൻ വിപണികൾ

യുഎസ് തൊഴിൽ ഡാറ്റയ്ക്ക് ശേഷം വാൾസ്ട്രീറ്റിലെ റാലിയെ ട്രാക്ക് ചെയ്ത് ഏഷ്യൻ വിപണികൾ ഉയർന്ന തോതിൽ വ്യാപാരം നടത്തുന്നു.

ജപ്പാനിലെയും ദക്ഷിണ കൊറിയയിലെയും മാർക്കറ്റുകൾ പൊതു അവധിക്കായി അടച്ചിരിക്കുന്നു. ഹോങ്കോങ്ങിൻറെ ഹാങ് സെങ് സൂചിക ഫ്യൂച്ചറുകൾ ഉയർന്ന ഓപ്പണിംഗ് സൂചിപ്പിച്ചു. അതേസമയം, ഓസ്‌ട്രേലിയയുടെ എസ് ആൻറ് പി 0.46% നേട്ടമുണ്ടാക്കി.

വാൾ സ്ട്രീറ്റ്

പ്രതീക്ഷിച്ചതിലും മൃദുലമായ തൊഴിൽ റിപ്പോർട്ട് യുഎസ് ഫെഡ് നിരക്ക് കുറയ്ക്കുന്നതിനുള്ള സാഹചര്യത്തെ ശക്തിപ്പെടുത്തിയതിനാൽ യുഎസ് സ്റ്റോക്ക് മാർക്കറ്റ് വെള്ളിയാഴ്ച കുത്തനെ ഉയർന്നു.

ഡൗ ജോൺസ് ഇൻഡസ്ട്രിയൽ ആവറേജ് 450.02 പോയിൻറ് അഥവാ 1.18 ശതമാനം ഉയർന്ന് 38,675.68 ലും എസ് ആൻറ് പി 63.59 പോയിൻറ് അഥവാ 1.26 ശതമാനം ഉയർന്ന് 5,127.79 ലും എത്തി. നാസ്ഡാക്ക് കോമ്പോസിറ്റ് 315.37 പോയിൻറ് അഥവാ 1.99 ശതമാനം ഉയർന്ന് 16,156.33 ൽ അവസാനിച്ചു.

കമ്പനി 110 ബില്യൺ ഡോളർ റെക്കോഡ് ഷെയർ ബൈബാക്ക് പ്രോഗ്രാം പ്രഖ്യാപിക്കുകയും ത്രൈമാസ പ്രതീക്ഷകളെ മറികടക്കുകയും ചെയ്തതിന് ശേഷം ആപ്പിൾ ഓഹരികൾ 6.0% ഉയർന്നു. ആംജെൻ ഓഹരികൾ 11.8% കുതിച്ചു. അതേസമയം വരുമാന വളർച്ചാ പ്രവചനം വെട്ടിക്കുറച്ചതിന് ശേഷം എക്സ്പീഡിയ ഓഹരി വില 15.3% ഇടിഞ്ഞു.

എണ്ണ വില

ഫെബ്രുവരിക്ക് ശേഷമുള്ള ഏറ്റവും വലിയ പ്രതിവാര ഇടിവിന് ശേഷം ക്രൂഡ് ഓയിൽ വില സ്ഥിരത കൈവരിച്ചു, സൗദി അറേബ്യ തുടർച്ചയായി മൂന്നാം മാസവും ഏഷ്യയിലേക്കുള്ള ഗ്രേഡുകളുടെ വിൽപ്പന വില ഉയർത്തി.

ബ്രെൻറ് ക്രൂഡ് കഴിഞ്ഞയാഴ്ച 7.3 ശതമാനം ഇടിഞ്ഞതിന് ശേഷം ബാരലിന് 0.01% ഉയർന്ന് 82.97 ഡോളറിലെത്തി. വെസ്റ്റ് ടെക്സസ് ഇൻറർമീഡിയറ്റ് 78.11 ഡോളറിലെത്തി.

ഇന്ന് ഫല പ്രഖ്യാപനം നടത്തുന്ന കമ്പനികൾ

ലുപിൻ, മാരികോ, അരവിന്ദ്, കാർട്രേഡ് ടെക്, സിജി പവർ ആൻഡ് ഇൻഡസ്ട്രിയൽ സൊല്യൂഷൻസ്, ഡിസിഎം ശ്രീറാം, ഗോദ്‌റെജ് കൺസ്യൂമർ പ്രോഡക്‌ട്‌സ്, ഗുജറാത്ത് ഗ്യാസ്, ഹാപ്പിയസ്റ്റ് മൈൻഡ്‌സ് ടെക്‌നോളജീസ്, ഇന്ത്യൻ ബാങ്ക്, റൂട്ട് മൊബൈൽ, സുവൻ ലൈഫ് സയൻസസ് എന്നിവ മാർച്ച് 2024 ത്രൈമാസ വരുമാനം മെയ് 6ന് പുറത്തിറക്കും.

പിന്തുണയും പ്രതിരോധവും

നിഫ്റ്റി

പിവറ്റ് പോയിൻറ് കാൽക്കുലേറ്റർ സൂചിപ്പിക്കുന്നത് നിഫ്റ്റിക്ക് 22,517 ലെവലിൽ പ്രതിരോധം നേരിടേണ്ടിവരുമെന്നാണ്. തുടർന്ന് 22,816, 22,986 ലെവലുകളിലും പ്രതിരോധമുണ്ടാകും. താഴ്ന്ന ഭാഗത്ത്, സൂചിക 22,369 ലെവലിൽ പിന്തുണ എടുത്തേക്കാം. തുടർന്ന് 22,263, 22,093 ലെവലുകളിൽ പിൻതുണയുണ്ട്.

ബാങ്ക് നിഫ്റ്റി

പിവറ്റ് പോയിൻറ് കാൽക്കുലേറ്റർ അനുസരിച്ച്, ബാങ്ക് നിഫ്റ്റി സൂചിക 49,010 ലും തുടർന്ന് 49,650, 50,012 ലെവലുകളിലും പ്രതിരോധം നേരിടും. താഴത്തെ ഭാഗത്ത്, പിന്തുണ 48,702, തുടർന്ന് 48,478, 48,116 എന്നിങ്ങനെയാണ്.

വിദേശ സ്ഥാപന നിക്ഷേപകർ

വിദേശ സ്ഥാപന നിക്ഷേപകർ (എഫ്ഐഐ) 2,391.98 കോടി രൂപയുടെ ഓഹരികൾ വിറ്റപ്പോൾ ആഭ്യന്തര സ്ഥാപന നിക്ഷേപകർ (ഡിഐഐകൾ) 690.52 കോടി രൂപയുടെ ഓഹരികൾ മെയ് 3 ന് വാങ്ങിയതായി എൻഎസ്ഇയിൽ നിന്നുള്ള കണക്കുകൾ വ്യക്തമാക്കുന്നു.

ഇന്ന് ശ്രദ്ധിക്കേണ്ട ഓഹരികൾ

കൊട്ടക് മഹീന്ദ്ര ബാങ്ക്: പലിശേതര വരുമാനത്തിലും പ്രവർത്തന ലാഭത്തിലും ശക്തമായ വളർച്ചയോടെ, സ്വകാര്യ മേഖലയിലെ വായ്പാദാതാവ് 2024 മാർച്ചിൽ അവസാനിച്ച പാദത്തിൽ 4,133 കോടി രൂപ അറ്റാദായം രേഖപ്പെടുത്തി. അറ്റ പലിശ വരുമാനം ഈ പാദത്തിൽ 13.2 ശതമാനം ഉയർന്ന് 6,909.4 കോടി രൂപയായി.

ബ്രിട്ടാനിയ ഇൻഡസ്ട്രീസ്: ബിസ്‌ക്കറ്റ് നിർമ്മാതാവിൻറെ ഏകീകൃത അറ്റാദായം മാർച്ച് 2024 മാർച്ച് പാദത്തിൽ 536.6 കോടി രൂപയായി റിപ്പോർട്ട് ചെയ്തു. കഴിഞ്ഞ സാമ്പത്തിക വർഷത്തെ ഇതേ കാലയളവിനെ അപേക്ഷിച്ച് 3.8 ശതമാനം ഇടിവ്. പ്രവർത്തനങ്ങളിൽ നിന്നുള്ള വരുമാനം ഈ പാദത്തിൽ 1.1 ശതമാനം വർധിച്ച് 4,069.4 കോടി രൂപയായി.

എം ആൻഡ് എം ഫിനാൻഷ്യൽ സർവീസസ്: ബാങ്കിംഗ് ഇതര ഫിനാൻഷ്യൽ കമ്പനിയുടെ ലാഭം 24 സാമ്പത്തിക വർഷത്തിൽ അവസാനിച്ച പാദത്തിൽ 9.5 ശതമാനം ഇടിഞ്ഞ് 619 കോടി രൂപയായി. അറ്റ പലിശ വരുമാനം വർഷാവർഷം 15.6 ശതമാനം വർധിച്ച് 1,919 കോടി രൂപയായി.

വൺ 97 കമ്മ്യൂണിക്കേഷൻസ്: പുനഃസംഘടനയുടെ ഭാഗമായി മെയ് 31 മുതൽ ഉപദേശക സ്ഥാനത്തേക്ക് മാറുന്നതിനായി കമ്പനിയുടെ പ്രസിഡൻറും ചീഫ് ഓപ്പറേറ്റിംഗ് ഓഫീസറുമായ ഭവേഷ് ഗുപ്ത രാജിവച്ചു.

അവന്യൂ സൂപ്പർമാർട്ട്‌സ്: മാർച്ച് 2024 പാദത്തിൽ ഡി-മാർട്ട് ഓപ്പറേറ്റർ 563.3 കോടി രൂപ ഏകീകൃത അറ്റാദായം രേഖപ്പെടുത്തി. മുൻ സാമ്പത്തിക വർഷത്തെ ഇതേ കാലയളവിനെ അപേക്ഷിച്ച് 22.4 ശതമാനം വർധന. പ്രവർത്തനങ്ങളിൽ നിന്നുള്ള വരുമാനം ഈ പാദത്തിൽ 20.1 ശതമാനം വർധിച്ച് 12,726.6 കോടി രൂപയായി.

എച്ച്‌ഡിഎഫ്‌സി ബാങ്ക്: എച്ച്‌ഡിഎഫ്‌സി ബാങ്കിൻറെ പാർട്ട് ടൈം ചെയർമാനായി അതാനു ചക്രവർത്തിയെ ഈ വർഷം മെയ് 5 മുതൽ മൂന്ന് വർഷത്തേക്ക് വീണ്ടും നിയമിക്കുന്നതിന് റിസർവ് ബാങ്ക് ഓഫ് ഇന്ത്യ അംഗീകാരം നൽകി.

ഐഡിബിഐ ബാങ്ക്: 24 സാമ്പത്തിക വർഷത്തിൽ അവസാനിച്ച പാദത്തിൽ 1,628 കോടി രൂപ അറ്റാദായം രേഖപ്പെടുത്തി. അറ്റ പലിശ വരുമാനം ഈ പാദത്തിൽ 12 ശതമാനം വർധിച്ച് 3,688 കോടി രൂപയായി. ഈ പാദത്തിൽ ആസ്തി നിലവാരം സ്ഥിരതയുള്ളതായിരുന്നു, മൊത്ത എൻപിഎ 4.53 ശതമാനമായി കുറഞ്ഞു.