വിപണിക്ക് പുതിയ നാഴികക്കല്ല്; 25,000 കടന്ന് നിഫ്റ്റി, സെൻസെക്സ് 82,000ൽ

ആഭ്യന്തര വിപണി ഇന്ന്  വ്യാപാരം ആരംഭിച്ചത് പുത്തൻ റെക്കോർഡുകളോടെയാണ്. നിഫ്റ്റി 108 പോയിൻ്റ് ഉയർന്ന് സർവ്വകാല ഉയരമായ 25,000-ൽ എത്തി. സെൻസെക്‌സ് 388 പോയിൻ്റ് ഉയർന്ന് ആദ്യമായി 82,000 പോയിന്റും കടന്നു. യുഎസ് ഫെഡറൽ റിസർവ് സെപ്റ്റംബറിൽ നിരക്ക് കുറയ്ക്കുമെന്ന് സൂചന വിപണിയെ സ്വാധീനിച്ചിട്ടുണ്ട്. 

സെൻസെക്‌സ് 388.15 പോയിൻ്റ് അഥവാ 0.47 ശതമാനം ഉയർന്ന് എക്കാലത്തെയും ഉയർന്ന  ലെവലായ 82,129.49 ലെത്തി. നിഫ്റ്റി 127.15 പോയിൻ്റ് അഥവാ 0.50 ശതമാനം ഉയർന്ന് 25,078.30 എന്ന റെക്കോർഡ് ഉയരത്തിലെത്തി.

സെൻസെക്സിൽ അദാനി പോർട്‌സ്, പവർ ഗ്രിഡ്, ജെഎസ്ഡബ്ല്യു സ്റ്റീൽ, ടാറ്റ സ്റ്റീൽ, മാരുതി സുസുകി, എച്ച്‌ഡിഎഫ്‌സി ബാങ്ക്, റിലയൻസ് ഇൻഡസ്‌ട്രീസ്, ഐസിഐസിഐ ബാങ്ക് എന്നീ ഓഹരികൾ നേട്ടമുണ്ടാക്കി.എം ആൻഡ് എം, സൺ ഫാർമ, ഐടിസി, ഇൻഫോസിസ്, ടിസിഎസ് തുടങ്ങിയ ഓഹരികൾ ഇടിഞ്ഞു.

നിഫ്റ്റി ഐടി ഒഴികെയുള്ള എല്ലാ മേഖലാ സൂചികകളും നേട്ടത്തോടെയാണ് വ്യാപാരം തുടരുന്നത്. നിഫ്റ്റി മെറ്റൽ 1.5 ശതമാനം ഉയർന്നു. നിഫ്റ്റി ഓട്ടോ 0.8 ശതമാനം കുതിച്ചു.

സെപ്റ്റംബറിൽ നിരക്ക് കുറയ്ക്കുമെന്ന് സൂചിപ്പിച്ചുകൊണ്ട്, യുഎസ് ഫെഡറൽ റിസർവ് ചെയർ ജെറോം പവൽ പറഞ്ഞു, പണപ്പെരുപ്പം 2 ശതമാനത്തിലേക്ക് കുറയ്ക്കുന്നതിൽ പുരോഗതി കൈവരിച്ചിരിക്കുന്നു, ഇത് പലിശ നിരക്ക് കുറയ്ക്കുന്നതിലേക്ക് ഫെഡറൽ അടുക്കുന്നു എന്നതിൻ്റെ സൂചനയാണ്. .

ഏഷ്യൻ വിപണികളിൽ ടോക്കിയോ, ഷാങ്ഹായ്, ഹോങ്കോംഗ് എന്നിവ നേട്ടത്തോടെ വ്യാപാരം തുടരുന്നു. സിയോൾ ഇടിവിലാണ്.

വിദേശ നിക്ഷേപ സ്ഥാപനങ്ങൾ ബുധനാഴ്ച 3,462.36 കോടി രൂപയുടെ ഓഹരികൾ വിറ്റു. യുഎസ് ഡോളറിനെതിരെ രൂപയുടെ മൂല്യം ഒരു പൈസ ഉയർന്നു. സ്വർണം ട്രോയ് ഔൺസിന് 0.61 ശതമാനം ഉയർന്ന് 2488 ഡോളറിലെത്തി.