രാജ്യത്തെ തൊഴില്‍ പ്രതിസന്ധി പരിഹരിക്കാന്‍ ടൂറിസം മേഖല
- പല രാജ്യങ്ങളിലും ടൂറിസം മേഖലയിലെ തൊഴിലവസരങ്ങള്‍ 25 ശതമാനമാണ്
- ആ രാജ്യങ്ങളില്‍ ജിഡിപിയുടെ 20 ശതമാനം ടൂറിസത്തില്‍ നിന്ന് ലഭിക്കുന്നു
- സര്‍ക്കാര്‍ സഹായം ഉണ്ടെങ്കില്‍ രാജ്യത്തെ 50 ശതമാനം തൊഴില്‍ വെല്ലുവിളികളും പരിഹരിക്കാന്‍ ടൂറിസത്തിന് കഴിയും
രാജ്യത്തെ 50 ശതമാനം തൊഴില്‍ വെല്ലുവിളികളും പരിഹരിക്കാന്‍ ടൂറിസം മേഖലയ്ക്ക് സാധിക്കുമെന്ന് ലമണ്‍ ട്രീ ഹോട്ടല്‍സ് ചെയര്‍മാനും മാനേജിംഗ് ഡയറക്ടറുമായ പതഞ്ജലി ഗോവിന്ദ് കേശവാനി പറയുന്നു. ഇതിന് ശരിയായ സര്‍ക്കാര്‍ പിന്തുണ വേണമെന്നുമാത്രം. ഐഐഎം കല്‍ക്കട്ട സംഘടിപ്പിച്ച ഇന്ത്യ 2047 ലെ ആദ്യ ദേശീയ കോണ്‍ക്ലേവില്‍ സംസാരിക്കുകയായിരുന്നു അദ്ദേഹം.
ഇന്ത്യയുടെ ടൂറിസം മേഖല ഇന്ന് ഇന്‍ഫ്‌ലെക്ഷന്‍ പോയിന്റിന്റെ വക്കിലാണ്.
പല രാജ്യങ്ങളിലും വിനോദസഞ്ചാര മേഖല തങ്ങളുടെ ജിഡിപിയില്‍ 15-20 ശതമാനം സംഭാവന ചെയ്യുന്നുണ്ട്. കൂടാതെ 25 ശതമാനം തൊഴിലവസരങ്ങള്‍ ഈ മേഖല പ്രദാനം ചെയ്യുന്നതായും കേശവാനി ചൂണ്ടിക്കാട്ടി.
തൊഴിലവസരങ്ങള്‍ സൃഷ്ടിക്കുന്നതിന് ഈ മേഖലയ്ക്ക് വലിയ സാധ്യതകളുണ്ട്.'
'സര്‍ക്കാരിന് ഈ അവസരം ഫലപ്രദമായി പ്രയോജനപ്പെടുത്താന്‍ കഴിയുമെങ്കില്‍, അത് നമ്മുടെ തൊഴില്‍ വെല്ലുവിളികളുടെ 50 ശതമാനം വരെ പരിഹരിക്കും,' അദ്ദേഹം പറഞ്ഞു.
ഇന്ത്യയില്‍ വിനോദസഞ്ചാരം ജിഡിപിയിലേക്ക് 6.5 ശതമാനം മാത്രമാണ് സംഭാവന ചെയ്യുന്നത്.
ഇന്ത്യയുടെ നിലവിലെ ദ്രുതഗതിയിലുള്ള വളര്‍ച്ചാ ഘട്ടത്തില്‍ ചൈനയില്‍ ഉണ്ടായിരുന്നതിന് സമാനമായി രാജ്യം ഒരു നിര്‍ണായക ഘട്ടത്തിലാണെന്ന് കേശവാനി അഭിപ്രായപ്പെട്ടു. ഇന്ത്യയിലെ ഗാര്‍ഹിക വരുമാനം പോലും പ്രതിവര്‍ഷം 6-7 ശതമാനം നിരക്കില്‍ വളരുന്നുണ്ട്. ഇത് ഉപഭോഗ രീതികളില്‍ ഗണ്യമായ മാറ്റത്തിന് കളമൊരുക്കി.
'ഇന്ത്യയില്‍ 280 ദശലക്ഷം കുടുംബങ്ങളുണ്ട്, എന്നാല്‍ നിലവില്‍, എസ്യുവികളും ഹാച്ച്ബാക്കുകളും പോലുള്ള ഉല്‍പ്പന്നങ്ങളുടെ സജീവ ഉപഭോക്താക്കളില്‍ 2 ശതമാനത്തില്‍ താഴെയുള്ള 5 ദശലക്ഷം കുടുംബങ്ങള്‍ മാത്രമേയുള്ളൂ,' കേശവാനി പറഞ്ഞു.
'എന്നിരുന്നാലും, തുടര്‍ച്ചയായ സാമ്പത്തിക വളര്‍ച്ചയോടെ, ഈ സംഖ്യ 30 ദശലക്ഷം കുടുംബങ്ങളായി വര്‍ധിക്കും, ഇത് സാമ്പത്തിക പ്രവര്‍ത്തനങ്ങളില്‍ ഗണ്യമായ ഉത്തേജനം ഉണ്ടാക്കും. ഇത് കൃത്യമായി ചൈനയില്‍ സംഭവിച്ചതും വിയറ്റ്‌നാമില്‍ സംഭവിക്കുന്നതുമായ പരിവര്‍ത്തനമാണ്,' അദ്ദേഹം പറഞ്ഞു.
അടുത്ത അഞ്ചു വര്‍ഷങ്ങള്‍ക്കുള്ളില്‍ വിമാന സര്‍വീസുകളുടെ കാര്യത്തില്‍ രാജ്യം കുതിച്ചുചാട്ടം നടത്തും. വിമാനത്താവളങ്ങള്‍ വര്‍ധിക്കും. റണ്‍വേകള്‍ മൂന്നിരട്ടിയാക്കല്‍, അടുത്ത നാല് വര്‍ഷത്തിനുള്ളില്‍ നാലുവരി ഹൈവേകള്‍ ഇരട്ടിപ്പിക്കല്‍ എന്നിവ ഉള്‍പ്പെടെ ഇന്ത്യയുടെ സാമ്പത്തിക കുതിപ്പിന്റെ നിരവധി നല്ല സൂചകങ്ങള്‍ അദ്ദേഹം എടുത്തുകാട്ടി. കണക്ടിവിറ്റിയിലെ ഈ വിപുലീകരണം ഇന്ത്യയിലെ വിനോദസഞ്ചാരത്തിനുള്ള മികച്ച അവസരവുമാണെന്നും കേശവാനി കൂട്ടിച്ചേര്‍ത്തു.