വില ഉയരുന്ന സാഹചര്യത്തിലും പ്രോപ്പര്‍ട്ടി മേഖല തളര്‍ച്ചയില്‍

ചൈനയിലെ പുതിയ വീടുകളുടെ വിലകള്‍ രണ്ടര വര്‍ഷത്തിനിടയിലെ ഏറ്റവും വേഗതയില്‍ ഉയരുന്നതായി മാര്‍ച്ചിലെ കണക്കുകള്‍ കാണിക്കുന്നു. ഒരു സ്വകാര്യ സര്‍വേയിലാണ് ഇക്കാര്യം വ്യക്തമായത്. 100 നഗരങ്ങളിലെ ശരാശരി പുതിയ വീടിന്റെ വില മാര്‍ച്ചില്‍ 0.27% ഉയര്‍ന്നു. ഇത് 2021 ജൂലൈക്കുശേഷമുള്ള ഏറ്റവും വലിയ വര്‍ധനയാണെന്ന് റിയല്‍ എസ്റ്റേറ്റ് ഗവേഷകരായ ചൈന ഇന്‍ഡെക്‌സ് അക്കാദമിയില്‍ നിന്നുള്ള ഡാറ്റ കാണിക്കുന്നു.

സമ്പദ് വ്യവസ്ഥയുടെ നെടുംതൂണായ ചൈനയുടെ പ്രോപ്പര്‍ട്ടി മേഖല, 2021 മുതല്‍ ഒരു പ്രതിസന്ധിയില്‍ നിന്ന് മറ്റൊന്നിലേക്ക് നീങ്ങുകയായിരുന്നു. രാജ്യത്തെ പ്രമുഖ ഡെവലപ്പര്‍മാര്‍ എല്ലാം കടത്തില്‍ മുങ്ങിയതോടെ നിക്ഷേപകര്‍ക്ക് പണം തിരികെ നല്‍കാന്‍ സാവകാശം വേണ്ടിവന്നതായിരുന്നു തുടക്കം. അതിനുശേഷം വന്‍സ്ഥാപനങ്ങളിലെ പ്രതിസന്ധികള്‍ മറനീക്കി പുറത്തുവന്നു. ഇതോടെ സ്ഥാപനങ്ങളില്‍ നിക്ഷേപിച്ചവര്‍ പ്രതിഷേധിക്കുന്ന അവസ്ഥവരെ ചൈനയിലുണ്ടായി, ഇപ്പോഴും സ്ഥിതിഗതികള്‍ക്ക് കാര്യമായ മാറ്റം വന്നിട്ടില്ല. സര്‍ക്കാര്‍ പലരീതിയിലും മേഖലയെ സഹായിക്കാന്‍ നടപടികള്‍ സ്വീകരിച്ചു. എന്നാല്‍ അതൊന്നും മേഖലയിലെ വന്‍ പ്രതിസന്ധിക്ക് പകരമായില്ല.

പ്രാദേശിക നയനിര്‍മ്മാതാക്കളില്‍ നിന്നുള്ള ഉത്തേജകവും ലഘൂകരണ നടപടികളും വില്‍പ്പന വര്‍ധിപ്പിക്കുന്നതിനോ പണലഭ്യത വര്‍ധിപ്പിക്കുന്നതിനോ പാടുപെട്ടു.

വിവാഹമോചനത്തിന് ശേഷം മൂന്ന് വര്‍ഷത്തിനുള്ളില്‍ നഗരത്തില്‍ ഒരു വീട് വാങ്ങുന്നതില്‍ നിന്ന് വ്യക്തികളെ പരിമിതപ്പെടുത്തുന്ന ഒരു നിയമം റദ്ദാക്കിക്കൊണ്ട് ബെയ്ജിംഗ് നഗര അധികാരികള്‍ കഴിഞ്ഞ ആഴ്ച വീട് വാങ്ങുന്നതിനുള്ള നിയന്ത്രണങ്ങളില്‍ നേരിയ ഇളവ് വരുത്തി. മാര്‍ച്ചില്‍ പുതിയ വീടുകള്‍ക്ക് മാസ വില വര്‍ധിച്ച നഗരങ്ങളുടെ എണ്ണം 43 ആയിരുന്നു, ഇത് ഫെബ്രുവരിയില്‍ നിന്ന് വര്‍ധിച്ചു.

മെഗാ നഗരമായ ഷാങ്ഹായില്‍ 1.09ശതമാനം വിലവര്‍ധന രേഖപ്പെടുത്തി. അതേസമയം വടക്കുകിഴക്കന്‍ നഗരമായ ചാങ്ചുനില്‍ 0.68% കുത്തനെ ഇടിവ് അനുഭവപ്പെട്ടു.

എന്നിരുന്നാലും, 100 റിയല്‍ എസ്റ്റേറ്റ് കമ്പനികള്‍ക്കിടയിലെ മൂല്യമനുസരിച്ച് മൊത്തം വില്‍പ്പന വര്‍ഷത്തിലെ ആദ്യ മൂന്ന് മാസങ്ങളില്‍ 49.0% ഇടിഞ്ഞു, ഈ മേഖലയുടെ ഒരു വഴിത്തിരിവ് ഇതുവരെ ദൃശ്യമായിട്ടില്ലെന്ന് ഇത് സൂചിപ്പിക്കുന്നു.'പുതിയ ഭവന വില്‍പ്പനയിലെ ഇടിവ് രണ്ടാം പാദത്തില്‍ കുറയാന്‍ സാധ്യതയുണ്ടെന്ന് ചൈന ഇന്‍ഡെക്‌സ് അക്കാദമി പറഞ്ഞു.