ഹീറോ മോട്ടോകോര്‍പ്പ് യൂറോപ്യന്‍ വിപണിയിലേക്ക്
- നിലവില്‍ ആഗോളതലത്തിലെ 48 രാജ്യങ്ങളില്‍ കമ്പനി ഉല്‍പ്പന്നങ്ങള്‍ വില്‍ക്കുന്നു
- കമ്പനിയുടെ അടിത്തറ വ്യാപിപ്പിക്കുമെന്ന് എക്സിക്യൂട്ടീവ് ചെയര്‍മാന്‍ പവന്‍ മുഞ്ജല്‍
- പുതിയ ഇലക്ട്രിക് സ്‌കൂട്ടര്‍ കമ്പനി വിപണിയിലെത്തിക്കും
ഹീറോ മോട്ടോകോര്‍പ്പ് യൂറോപ്യന്‍ വിപണിയിലേക്ക്
അടുത്തവര്‍ഷത്തിന്റെ രണ്ടാം പകുതി മുതല്‍ യൂറോപ്പിലേക്കും യുകെ വിപണിയിലേക്കും പ്രവേശിക്കാന്‍ പദ്ധതിയിടുന്നതായി ഹീറോ മോട്ടോകോര്‍പ്പ്. ന്യൂഡല്‍ഹി ആസ്ഥാനമായി പ്രവര്‍ത്തിക്കുന്ന ഇരുചക്രവാഹന കമ്പനി ഏഷ്യ, ആഫ്രിക്ക, ലാറ്റിന്‍ അമേരിക്ക എന്നിവിടങ്ങളിലെ 48 രാജ്യങ്ങളില്‍ ഉല്‍പ്പന്നങ്ങള്‍ വില്‍ക്കുന്നുണ്ട്.
'ഹീറോ മോട്ടോകോര്‍പ്പ് ഒരു വിശ്വസ്ത ആഗോള നേതാവായി തുടരുന്നു. ഞങ്ങളുടെ ഉല്‍പ്പന്നങ്ങള്‍ വിശ്വാസ്യതയ്ക്കും പ്രതിരോധശേഷിക്കും പേരുകേട്ടതാണ്. യൂറോപ്പിലേക്കും യുകെയിലേക്കും പ്രവര്‍ത്തനം വ്യാപിപ്പിക്കുമ്പോള്‍ കമ്പനിയുടെ അടിത്തറ വ്യാപകമാവുകയാണ്',ഹീറോ മോട്ടോകോര്‍പ്പ് എക്സിക്യൂട്ടീവ് ചെയര്‍മാന്‍ പവന്‍ മുഞ്ജല്‍ പറഞ്ഞു.
ഒരു പുതിയ ഇലക്ട്രിക് സ്‌കൂട്ടര്‍ കമ്പനി വിപണിയിലെത്തിക്കും. തുടര്‍ന്ന്, ഉയര്‍ന്ന ശേഷിയുള്ള പ്രീമിയം ഇന്റേണല്‍ കംബസ്ഷന്‍ എഞ്ചിന്‍ (ഐസിഇ) മോട്ടോര്‍സൈക്കിളുകളിലേക്ക് ശ്രേണി വികസിപ്പിക്കാന്‍ കമ്പനി പദ്ധതിയിടുന്നു. കമ്പനിയുടെ നിലവിലുള്ളതും പുതിയതുമായ ഉല്‍പ്പന്ന ശ്രേണി യൂറോപ്യന്‍ വിപണികളുടെ നിലവിലെയും ഭാവിയിലെയും ആവശ്യകതകള്‍ നിറവേറ്റുമെന്ന് ഹീറോ മോട്ടോകോര്‍പ്പ് പറഞ്ഞു. പെല്‍പി ഇന്റര്‍നാഷണല്‍ ആയിരിക്കും കമ്പനിയുടെ ഇറ്റലിയിലെ വിതരണക്കാര്‍.
സ്‌പെയിനിലെ പങ്കാളികളായ നോറിയ മോട്ടോസ് എസ്എല്‍യുവുമായി കമ്പനി നേരത്തെ വാണിജ്യ കരാറുകളില്‍ ഏര്‍പ്പെട്ടിരുന്നു. ആഗോള പ്രേക്ഷകരെ മനസ്സില്‍ വെച്ചാണ് വിഡ ഇസഡ് വികസിപ്പിച്ചതെന്ന് ഹീറോ മോട്ടോകോര്‍പ്പ് പറഞ്ഞു.
പെര്‍മനന്റ് മാഗ്‌നറ്റ് സിന്‍ക്രണസ് മോട്ടോര്‍ (പിഎംഎസ്എം) ഡ്രൈവ് ട്രെയിനുമായാണ് വിഡ ഇസഡ് വരുന്നത്. ഇത് കാര്യക്ഷമത, കുറഞ്ഞ അറ്റകുറ്റപ്പണി, പ്രകടനം എന്നിവയുടെ മികച്ച സംയോജനം വാഗ്ദാനം ചെയ്യുന്നു, കമ്പനി പറഞ്ഞു.
ഹീറോ മോട്ടോകോര്‍പ്പിന് ഇന്ത്യയില്‍ ആറ്, കൊളംബിയ, ബംഗ്ലാദേശ് എന്നിവിടങ്ങളില്‍ ഓരോന്നും ഉള്‍പ്പെടെ എട്ട് നിര്‍മ്മാണ കേന്ദ്രങ്ങളുണ്ട്. ഇന്ത്യയിലെ സെന്റര്‍ ഫോര്‍ ഇന്നൊവേഷന്‍ ആന്‍ഡ് ടെക്‌നോളജി (സിഐടി), മ്യൂണിക്കിനടുത്തുള്ള ടെക് സെന്റര്‍ ജര്‍മ്മനി (ടിസിജി) ഉള്‍പ്പെടെ കമ്പനിക്ക് രണ്ട് ഗവേഷണ-വികസന സൗകര്യങ്ങളും ഉണ്ട്. നവരാത്രി മുതല്‍ ആരംഭിച്ച 32 ദിവസത്തെ ഉത്സവ കാലയളവില്‍ കമ്പനി എക്കാലത്തെയും ഉയര്‍ന്ന റീട്ടെയില്‍ വില്‍പ്പന കൈവരിച്ചിരുന്നു.