ഇന്ത്യയുമായി വ്യാപാരബന്ധം ഏകീകരിക്കണമെന്ന് ഇറ്റലി

ഇന്ത്യയുമായുള്ള വ്യാപാര ബന്ധം ഏകീകരിക്കണമെന്ന് ഇറ്റാലിയന്‍ കൃഷി മന്ത്രി ഫ്രാന്‍സെസ്‌കോ ലോലോബ്രിജിഡ. 'വിന്‍ഇറ്റലി' വ്യാപാര പ്രമോഷന്‍ മേളയുടെ ഭാഗമായ രണ്ടു ദിവസത്തെ ഇന്ത്യാ റോഡ്‌ഷോയുടെ പശ്ചാത്തലത്തിലാണ് അദ്ദേഹത്തിന്റെ പരാമര്‍ശം.

ഇറ്റാലിയന്‍ വൈന്‍ കമ്പനികളും മറ്റുള്ളവരും കണ്ടുമുട്ടുന്നതിനും, ചര്‍ച്ച ചെയ്യുന്നതിനുമുള്ള ഒരു വേദിയാണ് വിനിറ്റാലി. ഈ വ്യവസായത്തിന്റെ വികസനവുമായി ബന്ധപ്പെട്ട വിഷയങ്ങള്‍ ആഴത്തില്‍ മനസ്സിലാക്കാന്‍ മേള സഹായിക്കും.

ഒരു വീഡിയോ സന്ദേശത്തില്‍, ഇറ്റാലിയന്‍ കൃഷി മന്ത്രി 'രണ്ട് സര്‍ക്കാരുകളും തമ്മിലുള്ള വളരെ ശക്തമായ ബന്ധം' ചൂണ്ടിക്കാണിക്കുകയും 'പരസ്പര കയറ്റുമതിയിലൂടെ അത് ഏകീകരിക്കപ്പെടണം' എന്ന് പറയുകയും ചെയ്തു.'സൗഹൃദം പുതുക്കുക മാത്രമല്ല, പരസ്പര വ്യാപാര ബന്ധങ്ങളുടെ ഏകീകരണവും ഞങ്ങള്‍ ആഗ്രഹിക്കുന്നു' എന്ന് അദ്ദേഹം തുടര്‍ന്നു പറഞ്ഞു.

'വിന്‍ഇറ്റലി'ക്ക് മുന്നോടിയായി നടന്ന ഗാല ഡിന്നറില്‍ നടത്തിയ പ്രസംഗത്തില്‍, ഇന്ത്യയിലെ ഇറ്റാലിയന്‍ അംബാസഡര്‍ അന്റോണിയോ ബാര്‍ട്ടോളി, റോമന്‍ സാമ്രാജ്യത്തിനും ഇന്ത്യയ്ക്കും ഇടയിലുള്ള കറുത്ത കുരുമുളകിന്റെയും വീഞ്ഞിന്റെയും ഊര്‍ജ്ജസ്വലമായ വ്യാപാരത്തെക്കുറിച്ച് സംസാരിച്ചു.

ഒരു വൈന്‍ സംസ്‌കാരം സൃഷ്ടിക്കുക എന്നത് ഇറ്റലിയുടെ ലക്ഷ്യമാണ്.

പ്രമുഖ ഇറ്റാലിയന്‍ വൈന്‍ നിര്‍മ്മാതാക്കള്‍ റോഡ്ഷോയില്‍ പങ്കെടുക്കുന്നുണ്ട്. പീഡ്മോണ്ടെ ലാന്‍ഡ് ഓഫ് വൈന്‍ (പീഡ്മോണ്ടിലെ 14 വൈന്‍ കണ്‍സോര്‍ഷ്യങ്ങളെ പ്രതിനിധീകരിച്ച്), ഇറ്റാലിയ ഡെല്‍ വിനോ കണ്‍സോര്‍സിയോ (16 മേഖലകളില്‍ നിന്നുള്ള 23 കമ്പനികള്‍), ആഞ്ചലിനി വൈന്‍സ് & എസ്റ്റേറ്റ്‌സ് , ഉവൈറ്റാലി (5 മേഖലകളില്‍ നിന്നുള്ള 11 ഉല്‍പ്പാദകര്‍) എന്നിവരുടെ ഗ്രൂപ്പ് സാന്നിധ്യം ഇതില്‍ ഉള്‍പ്പെടുന്നു.

ഇന്ത്യന്‍ ചേംബര്‍ ഓഫ് കൊമേഴ്സ് പ്രൊഫൈല്‍ ചെയ്ത ഓപ്പറേറ്റര്‍മാര്‍, ഇറക്കുമതിക്കാര്‍, മദ്യശാലകള്‍, എന്നിവരുമായി റോഡ്ഷോയ്ക്കിടെ ബി2ബി മീറ്റിംഗുകള്‍ ഷെഡ്യൂള്‍ ചെയ്തിരിക്കുന്നു. അതിനുശേഷം ഏപ്രില്‍ 6 മുതല്‍ 9 വരെ ഇറ്റലിയിലെ വെറോണയില്‍ നടക്കുന്ന 57-ാമത് 'വിന്‍ഇറ്റലി'യില്‍ പങ്കെടുക്കാന്‍ പങ്കെടുക്കുന്നവരെ ഔദ്യോഗികമായി ക്ഷണിക്കും.

ന്യൂഡല്‍ഹിയിലെ ഇറ്റാലിയന്‍ എംബസിയുടെ പിന്തുണയോടെ ഇന്ത്യന്‍ ചേംബര്‍ ഓഫ് കൊമേഴ്സുമായി സഹകരിച്ച് വെറോണാഫിയറാണ് റോഡ്ഷോ സംഘടിപ്പിക്കുന്നത്.

ഇന്ത്യയിലെ ഇറ്റാലിയന്‍ വൈനിന്റെ വിപണിയുടെ ചില്ലറ വില്‍പ്പന മൂല്യം (നികുതി ഉള്‍പ്പെടെ) 33 മില്യണ്‍ യുഎസ് ഡോളറാണ്, ഇറക്കുമതി വിപണി വിഹിതം ഏകദേശം 17 ശതമാനമാണ്. ഇന്ത്യന്‍ വൈന്‍ വിപണിയില്‍ മൂല്യം അനുസരിച്ച് മൂന്നാമത്തെ വലിയ വിതരണക്കാരാണ് ഇറ്റലി. 418 മില്യണ്‍ യുഎസ് ഡോളര്‍ വിലമതിക്കുന്ന ഇവിടെ 50 ശതമാനം വിഹിതവും ആഭ്യന്തര വൈനുകളാണ്. ഇറക്കുമതി ചെയ്യുന്ന വൈന്‍ ഉല്‍പ്പന്നങ്ങളുടെ അളവില്‍ ഏകദേശം ഒരു ദശലക്ഷം ലിറ്റര്‍ ഇറ്റലി രണ്ടാം സ്ഥാനത്താണ്.