യുഎസിനെതിരെ അധിക താരിഫ് ചുമത്തി ചൈന; വ്യാപാരയുദ്ധത്തിന് തുടക്കമോ?
- ഗൂഗിളിനെതിരെ അന്വേഷണം പ്രഖ്യാപിച്ച് ബെയ്ജിംഗ്
- ഷി ജിന്‍പിംഗ്-ട്രംപ് ചര്‍ച്ച നടത്താന്‍ പദ്ധതിയിട്ടിരിക്കെയാണ് താരിഫ് വര്‍ധന
- ചൈനീസ് പ്രഖ്യാപനത്തെത്തുടര്‍ന്ന് യുവാന്‍ ഇടിഞ്ഞു
യുഎസ് പ്രസിഡന്റ് ഡൊണാള്‍ഡ് ട്രംപിന്റെ താരിഫുകള്‍ക്ക് മറുപടിയായി ചൈനയുടെ ധനമന്ത്രാലയം യുഎസ് ഉല്‍പ്പന്നങ്ങളുടെ ഒരു ശ്രേണിക്ക് അധിക താരിഫ് ചുമത്തി. യുഎസ് കല്‍ക്കരി, ദ്രവീകൃത പ്രകൃതി വാതകം എന്നിവയ്ക്ക് 15% താരിഫ് ബാധകമാകുമെന്നും ക്രൂഡ് ഓയില്‍, കാര്‍ഷിക ഉപകരണങ്ങള്‍ എന്നിവയ്ക്ക് 10% അധിക തീരുവ ചുമത്തുമെന്നും ഇത് ഫെബ്രുവരി 10 മുതല്‍ പ്രാബല്യത്തില്‍ വരുമെന്നും മന്ത്രാലയം അറിയിച്ചു.
പ്രസിഡന്റ് ഡൊണാള്‍ഡ് ട്രംപ് ചൈനക്ക് 10% താരിഫ് ചുമത്തിയതിന് തൊട്ടുപിന്നാലെ, ബെയ്ജിംഗ് ഗൂഗിളിനെതിരെ അന്വേഷണവും പ്രഖ്യാപിച്ചു. സ്റ്റേറ്റ് അഡ്മിനിസ്‌ട്രേഷന്‍ ഫോര്‍ മാര്‍ക്കറ്റ് റെഗുലേഷന്റെ പ്രസ്താവന പ്രകാരം, വിശ്വാസ വിരുദ്ധ ലംഘനങ്ങള്‍ക്ക് യുഎസ് ടെക് കമ്പനിക്കെതിരെ ചൈന അന്വേഷണം നടത്തും.
'ദേശീയ സുരക്ഷാ താല്‍പ്പര്യങ്ങള്‍ സംരക്ഷിക്കുന്നതിന്' രാജ്യം ടങ്സ്റ്റണ്‍, ടെലൂറിയം, റുഥേനിയം, മോളിബ്ഡിനം, എന്നിവയുമായി ബന്ധപ്പെട്ട വസ്തുക്കളില്‍ കയറ്റുമതി നിയന്ത്രണം ഏര്‍പ്പെടുത്തുന്നതായും ചൈന പ്രഖ്യാപിച്ചു.ബെയ്ജിംഗിന്റെ പ്രഖ്യാപനത്തെത്തുടര്‍ന്ന് ചൈനീസ് യുവാനും ഇടിഞ്ഞു.
ഇരു രാജ്യങ്ങളുടെയും അധിക താരിഫ് പ്രഖ്യാപനത്തെത്തുടര്‍ന്ന് വ്യാപാരയുദ്ധത്തിന് തുടക്കമായിരിക്കുകയാണ്. നിയമവിരുദ്ധമായ മയക്കുമരുന്നുകളുടെ ഒഴുക്ക് തടയുന്നതില്‍ ബെയ്ജിംഗ് പരാജയപ്പെട്ടതായാണ് യുഎസ് വിലയിരുത്തുന്നത്.
പ്രസിഡന്റ് ഡൊണാള്‍ഡ് ട്രംപ് തന്റെ എതിരാളിയായ ഷി ജിന്‍പിംഗുമായി ചര്‍ച്ച നടത്താന്‍ പദ്ധതിയിട്ടിരിക്കെയാണ് ഇരു രാജ്യങ്ങളും താരിഫ് വര്‍ധിപ്പിച്ചിരിക്കുന്നത്.
അമേരിക്കയിലേക്കുള്ള ഫെന്റനൈല്‍ എന്ന മാരകമായ മയക്കുമരുന്നിന്റെ ഒഴുക്ക് ബെയ്ജിംഗ് തടഞ്ഞില്ലെങ്കില്‍ ചൈനയ്ക്കെതിരായ താരിഫ് ഇനിയും വര്‍ധിപ്പിക്കുമെന്ന് ട്രംപ് മുന്നറിയിപ്പ് നല്‍കി.