3 ലക്ഷം കോടി സ്വകാര്യ നിക്ഷേപം ധനമന്ത്രിയുടെ ദിവാസ്വപ്നമായി അവശേഷിക്കുമോ?

കൊച്ചി: 2024-25ലെ (FY25) കേരള സർക്കാരിന്റെ ബജറ്റ് നിർദ്ദേശങ്ങൾ പ്രധാനമായും ഓർമ്മിക്കപ്പെടുന്നത് ഇടതുപക്ഷ ജനാധിപത്യ മുന്നണി (എൽഡിഎഫ്) നന്നായി ചിന്തിച്ചു തീരുമാനിച്ചെടുത്ത ഗതി മാറിയുള്ള, അഥവാ വഴി വിട്ടുള്ള, അതിൻ്റെ നിക്ഷേപ യാത്രയെച്ചൊല്ലിയായിരിക്കും.

സ്വകാര്യ നിക്ഷേപങ്ങൾക്കായി വാതിലുകൾ തുറന്നിടാൻ ശ്രമിക്കുന്ന സൂര്യോദയ സമ്പദ്‌വ്യവസ്ഥയായി കേരളം അതിവേഗം മാറുകയാണെന്ന് പറഞ്ഞ ധനമന്ത്രി കെ എൻ ബാലഗോപാൽ, സംസ്ഥാനം അതിൻ്റെ ദുഷ്‌കരമായ സമയങ്ങളിലൊന്നിലൂടെ കടന്നുപോകുന്ന ഈ സമയത്ത് 3 ലക്ഷം കോടി രൂപയുടെ നിക്ഷേപം ആകർഷിക്കാൻ തൻ്റെ സർക്കാർ അർത്ഥവത്തായ നടപടികൾ സ്വീകരിക്കുമെന്ന് പ്രഖ്യാപിച്ചു. .

സാമ്പത്തികമായി തകർന്ന കേരളത്തെ വരാനിരിക്കുന്ന സാമ്പത്തിക പ്രതിസന്ധിയിൽ നിന്ന് കരകയറ്റുക എന്ന ഒറ്റ ലക്ഷ്യത്തോടെയാണ് ബാലഗോപാൽ സ്വകാര്യ നിക്ഷേപകർക്ക് മുന്നിൽ വാതിൽ തുറന്നത്.

കഴിഞ്ഞ കുറച്ച് വർഷങ്ങളായി കേരളത്തിലേക്ക് എത്തുന്ന നിക്ഷേപങ്ങളെ സൂക്ഷ്മമായി നിരീക്ഷിക്കുന്ന വിശകലന വിദഗ്ധരെ ബാലഗോപാലിന്റെ ഈ പ്രസ്താവന അത്ഭുതപ്പെടുത്തിയിരിക്കണം.

“കഴിഞ്ഞ ഒരു ദശാബ്ദത്തിലേറെയായി ഇവിടെ നിരവധി നിക്ഷേപ ഉച്ചകോടികൾ വിളിച്ചുകൂട്ടിയിട്ടും, നിക്ഷേപങ്ങളുടെ അർത്ഥവത്തായ ഒരു വരവ് ഇനിയും ഉണ്ടായിട്ടില്ല," തിരുവനന്തപുരത്ത് നിന്നുള്ള ഒരു പൊതു ധനകാര്യ വിദഗ്ധൻ പറഞ്ഞു.

എങ്കിലും ഈ മനസ്സ് മാറ്റം തികച്ചും സ്വാഗതാർഹമാണെന്നും അദ്ദേഹം പറഞ്ഞു. 8 വർഷം മുമ്പ്, 2016 ൽ ഏറെ കൊട്ടിഘോഷിക്കപ്പെട്ട കിഫ്ബി (KIIFB) പദ്ധതി ആരംഭിച്ചെങ്കിലും, ഇതുവരെ അത് 30,000 കോടി രൂപയിൽ എത്തിക്കാനായിട്ടില്ലെന്ന് എല്ലാവർക്കും അറിയാം. അത് പറയുമ്പോൾ തന്നെ, ഇതുവരെ എൽഡിഎഫ് സർക്കാർ പിന്തുടർന്നിരുന്നതിൽ നിന്ന് തികച്ചും വിരുദ്ധമാണ് ഇപ്പോൾ മുന്നോട്ടുവെച്ച ഈ പുതിയ നിക്ഷേപ തത്വശാസ്ത്രം. സർക്കാർ ഉടമസ്ഥതയിലുള്ള ഒട്ടനവധി വാണിജ്യ സ്ഥാപനങ്ങളും കെഎസ്ആർടിസി, കേരള വാട്ടർ അതോറിറ്റി (കെഡബ്ല്യുഎ), കെഎസ്ഇബി ലിമിറ്റഡ് തുടങ്ങിയ സർക്കാർ ഉടമസ്ഥതയിലുള്ള നിരവധി പൊതു സേവന സംരംഭങ്ങളും വർഷാവർഷം സ്ഥിരമായി നഷ്ടം വരുത്തിക്കൊണ്ട് കേരളത്തിൻ്റെ കാലിയായ ഖജനാവിന്റെ 'മുറിവിൽ ഉപ്പ് പുരട്ടുന്നു' എന്നതാണ് വസ്തുത. .

കൊച്ചിൻ ഇൻ്റർനാഷണൽ എയർപോർട്ട് ലിമിറ്റഡുമായി (സിയാൽ) സ്വകാര്യ-പബ്ലിക്-പാർട്ട്ണർഷിപ്പ് (പിപിപി) സംരംഭങ്ങളിലൂടെ സംസ്ഥാനം ഇതിനകം തന്നെ വാണിജ്യപരമായ വിജയങ്ങൾ കൈവരിച്ചിട്ടുണ്ടെങ്കിലും സർക്കാരിൻ്റെ ഉടമസ്ഥതയിലുള്ള സ്ഥാപനങ്ങളുടെ ഭാഗികമായ സ്വകാര്യവൽക്കരണം എന്ന ആശയത്തോട് പോലും സർക്കാർ എപ്പോഴും മുഖം തിരിച്ചിട്ടുണ്ട്..

എൽഡിഎഫ് സർക്കാരിൻ്റെ കടുത്ത വിരോധികളെപ്പോലും വിസ്മയിപ്പിച്ചുകൊണ്ട് അത്തരം നടപടികളൊന്നും ബുദ്ധിമുട്ടുള്ളതായി തോന്നാത്ത വിധം സമർത്ഥമായാണ് ബാലഗോപാൽ തൻ്റെ വരുമാനം നേടാനുള്ള നിർദ്ദേശങ്ങൾ ബജറ്റിൽ അവതരിപ്പിച്ചത്.

വിലകൾ കൂടി

ലീസ് സ്റ്റാമ്പ് ഡ്യൂട്ടി നിരക്ക് ഉയർത്തി, അതേസമയം ഇന്ത്യൻ നിർമ്മിത വിദേശ മദ്യത്തിന് (ഐഎംഎഫ്എൽ) ഏപ്രിൽ 1 മുതൽ 10 രൂപ വില കൂടും.

അധിക നികുതി പിരിവ് നടപടിയുടെ ഭാഗമായി വൈദ്യുതി ചാർജിൻ്റെ തീരുവ വർധിപ്പിക്കും. സ്വന്തം ആവശ്യത്തിനായി വൈദ്യുതി ഉൽപ്പാദിപ്പിക്കുന്നവരുടെ തീരുവ 1.2 പൈസയിൽ നിന്ന് 15 പൈസയാക്കി.

അതേസമയം, വൈദ്യുതി വിൽപനയുടെ തീരുവ യൂണിറ്റിന് 6 പൈസയിൽ നിന്ന് 10 പൈസയായി ഉയർത്തി. വീണ്ടും, അപ്പീലുകൾ ഫയൽ ചെയ്യുന്നതിനുള്ള അനുബന്ധ ഫീസ് അടുത്ത സാമ്പത്തിക വർഷം മുതൽ വർദ്ധിപ്പിക്കും

വില കുറഞ്ഞു

അഖിലേന്ത്യാ ടൂറിസ്റ്റ് ബസുകളുടെ രജിസ്‌ട്രേഷനുള്ള നികുതി കുറയും

ജിഡിപിയുടെ 3.4 ശതമാനം ധനക്കമ്മി

ചുരുക്കത്തിൽ, 1,38,655 കോടി രൂപ വരുമാനം ഉണ്ടാക്കുമ്പോൾ 1,66,501 കോടി രൂപ ചെലവ് കാണിക്കുകയും അങ്ങനെ 27,846 കോടി രൂപയുടെ, അഥവാ സംസ്ഥാനത്തിൻ്റെ ജിഡിപിയുടെ 2.12 ശതമാനം, റവന്യൂ കമ്മി അവശേഷിപ്പിക്കുകയും ചെയ്യുന്ന  ഒരു ബജറ്റ് അവതരിപ്പിക്കുകയാണ് ബാലഗോപാൽ ചെയ്തത്. 

സംസ്ഥാനത്തിൻ്റെ ജിഡിപിയുടെ 3.4 ശതമാനമായ 44,529 കോടി രൂപയാണ് ധനക്കമ്മിയായി കണക്കാക്കിയിരിക്കുന്നത്.

പ്രതിസന്ധിയിലായ കാർഷിക മേഖലയ്ക്ക് 1,698.30 കോടി രൂപ അനുവദിച്ച ബജറ്റിൽ റബറിൻ്റെ കുറഞ്ഞ താങ്ങുവില 170 രൂപയിൽ നിന്ന് 180 രൂപയായി ഉയർത്തി, ഈ നടപടി തീർത്തും അപര്യാപ്തമാണെന്നും കേരളത്തിലെ റബർ കർഷകരെ പരിഹസിക്കുന്നതാണെന്നും പ്രതിപക്ഷം വിശേഷിപ്പിച്ചു. . .

ടൂറിസം മേഖലയ്ക്ക് 10,000 മുറികൾ തുറക്കാൻ കഴിയുന്ന അധിക ഹോട്ടലുകൾ ആവശ്യമാണെന്ന് പ്രസ്താവിച്ച ധനമന്ത്രി അക്ഷരാർത്ഥത്തിൽ വളരെയധികം വളർച്ചാ സാധ്യതയുള്ള മേഖലയ്ക്ക് 5000 കോടി രൂപ അനുവദിച്ചു.

ഉന്നതവിദ്യാഭ്യാസ മേഖലയ്ക്ക് കൂടുതൽ പിന്തുണ പ്രഖ്യാപിച്ച മന്ത്രി ഡിജിറ്റൽ സർവകലാശാലയ്ക്ക് 250 കോടി വകയിരുത്തി.

ലൈനുകൾ നേരെയാക്കുന്നതിനും റെയിൽവേ ട്രാക്കുകൾ ഇരട്ടിപ്പിക്കുന്നതിനുമൊപ്പം സംസ്ഥാനത്തിൻ്റെ ഭാവി വികസനത്തിന് അതിവേഗ റെയിൽ സംവിധാനം വേണമെന്നും ബാലഗോപാൽ പറഞ്ഞു.

കെ-റെയിൽ പദ്ധതി യാഥാർത്ഥ്യമാക്കാനുള്ള ശ്രമങ്ങൾ സംസ്ഥാനം തുടരുമെന്നും ഇതുമായി ബന്ധപ്പെട്ട് കേന്ദ്ര സർക്കാരുമായി ചർച്ചകൾ നടക്കുന്നുണ്ടെന്നും അദ്ദേഹം കൂട്ടിച്ചേർത്തു.

ദക്ഷിണേന്ത്യൻ സംസ്ഥാനത്തിൻ്റെ സാമ്പത്തിക പ്രശ്‌നങ്ങൾക്ക് കാരണം കേന്ദ്രത്തിൻ്റെ സാമ്പത്തിക നയങ്ങളെയും കേരളത്തോടുള്ള അവഗണനയെയും മന്ത്രി കുറ്റപ്പെടുത്തി.

വളരെയധികം രാഷ്ട്രീയവൽക്കരിക്കപ്പെട്ടു

സംസ്ഥാനത്തിന് അർഹമായ ഫണ്ട് വിഹിതം നിഷേധിച്ച് കേന്ദ്രം സംസ്ഥാനത്തിൻ്റെ കഴുത്ത് ഞെരിക്കുകയാണെന്ന് ഉറപ്പിച്ചുകൊണ്ട് ധനമന്ത്രി വീണ്ടും ആവർത്തിച്ചുള്ള രാഷ്ട്രീയ തുറുപ്പ് ചീട്ട് എറിഞ്ഞു.

കേന്ദ്രം ഇപ്പോഴും കേരളത്തിന് നൽകാനുള്ളതെന്ന് അദ്ദേഹം പറഞ്ഞത് 57,000 കോടി രൂപയെ ചുറ്റിപ്പറ്റിയുള്ള അതേ കഥയാണ്..ഈ 57,000 കോടി രൂപയിൽ ജിഎസ്ടി നഷ്ടപരിഹാരം നിർത്തലാക്കിയതിനാൽ 12,000 കോടി രൂപ; ഈ വർഷത്തെ റവന്യൂ കമ്മി ഗ്രാൻ്റിൽ 8,400 കോടി രൂപയുടെ ഇടിവ്; കിഫ്ബിയും കേരള സോഷ്യൽ സെക്യൂരിറ്റി പെൻഷൻ ലിമിറ്റഡും (കെഎസ്എസ്പിഎൽ) നടത്തിയ കടമെടുത്തതിൻ്റെ കണക്കിൽ അറ്റ വായ്പാ പരിധിയിൽ (എൻബിസി) 7,000 കോടി രൂപ വെട്ടിക്കുറ വെട്ടിക്കുറച്ചത്; 12,000 കോടി രൂപയുടെ പൊതു അക്കൗണ്ട് പൊതുകടത്തിൻ്റെ ഭാഗമാക്കിയത്; പത്താമത്തെയും പതിനഞ്ചാമത്തെയും ധനകാര്യ കമ്മീഷനുകൾക്കിടയിലുള്ള കാലയളവിൽ സംസ്ഥാനത്തിൻ്റെ വിഭജിക്കാവുന്ന പൂൾ വിഹിതം 3.87 ശതമാനത്തിൽ നിന്ന് 1.925 ശതമാനമായി കുറഞ്ഞത് മൂലമുള്ള 18,000 കോടി രൂപയുടെ കുറവ്; കണക്കുകൾ വി ദീകരിച്ചുകൊണ്ട് അദ്ദേഹം പറഞ്ഞു.

ക്ഷേമരാഷ്ട്ര സങ്കൽപ്പത്തിൽ അധിഷ്‌ഠിതമായ കേരളത്തിന്റെ വികസന മാതൃക തകർക്കാൻ ഗൂഢാലോചന നടത്തുകയാണെന്ന് വരെ ബാലഗോപാൽ കേന്ദ്രത്തിനെതിരെ രൂക്ഷവിമർശനം ഉയർത്തി.