പുറത്തിറങ്ങിയിട്ട് രണ്ടാഴ്ച; ചാറ്റ്ജിപിടിയെ മറികടന്ന് ചൈനീസ് എഐ സ്റ്റാര്‍ട്ടപ്പ്

ചാറ്റ്ജിപിടിയെല്ലാം ഇനി പഴങ്കഥ. പുറത്തിറങ്ങി രണ്ടാഴ്ചയ്ക്കുള്ളില്‍ ആപ്പ് സ്റ്റോറില്‍ ചാറ്റ്ജിപിടിയെ പിന്തള്ളി ചൈനയുടെ എഐ സ്റ്റാര്‍ട്ടപ്പ് ഡീപ്‌സീക്ക് (DeepSeek). യുഎസിലെ ആപ്പ് സ്റ്റോറില്‍ ഏറ്റവും മികച്ച റേറ്റിംഗ് ഉള്ള സൗജന്യ ആപ്ലിക്കേഷനാണ് ഇപ്പോള്‍ ഈ ചൈനീസ് സംരംഭം.

ടെക് സ്ഥാപനങ്ങളുടെ പറുദീസയായ കിഴക്കന്‍ ചൈനീസ് നഗരമായ ഹാങ്ഷൗ ആസ്ഥാനമായുള്ള ഒരു സ്റ്റാര്‍ട്ടപ്പാണ് ഡീപ്സീക്ക് വികസിപ്പിച്ചത്. ഡീപ് സീക്ക്-വി3 എന്ന സംരംഭമാണ് ഇന്ന് ആഗോളതലത്തിലെ സംസാരവിഷയം. വര്‍ഷങ്ങളായി, യുഎസ് ആര്‍ട്ടിഫിഷ്യല്‍ ഇന്റലിജന്‍സിന്റെ കാര്യത്തില്‍ തര്‍ക്കമില്ലാത്ത നേതാവാണ്. അവിടേക്കാണ് ഇതുവരെ കേട്ടുകേള്‍വി പോലുമില്ലാതിരുന്ന ഒരു സ്റ്റാര്‍ട്ടപ്പ് അവതരിച്ചിറങ്ങിയത്. കേവലം രണ്ടാഴ്ചകൊണ്ട് ആഗോളതലത്തിലെ ഓപ്പണ്‍ എഐ,ഗൂഗില്‍,മെറ്റ എന്നിവരെ പരിഭഭ്രാന്തിയിലാഴ്ത്താന്‍ ഇതിനു കഴിഞ്ഞു. കൂടാതെ പടിഞ്ഞാറന്‍ രാജ്യങ്ങളുടെ സംഭാവനയായ ജെമിനി, ചാറ്റ്ജിപിടി എന്നിവയേക്കാള്‍ ചെലവ് കുറവ് എന്നവസ്തുതയും വന്‍ ടെക് കമ്പനികള്‍ക്ക് തിരിച്ചടിയായി.

ഡീപ്സീക്ക്-വി3 മോഡല്‍ നിരവധി ഓപ്പണ്‍ സോഴ്സ് മോഡലുകളെ മറികടക്കുന്നുവെന്നും ആഗോളതലത്തില്‍ ഏറ്റവും വികസിത ക്ലോസ്ഡ് സോഴ്സ് മോഡലുകള്‍ക്ക് എതിരാളികളാണെന്നും ഡീപ്സീക്ക് ഡെവലപ്പര്‍മാര്‍ അവകാശപ്പെടുന്നു. ഡീപ് സീക്ക് വി3 ക്കുവേണ്ടി ചെലവിട്ടത് ആറ് മില്യണ്‍ ഡോളറില്‍ താഴെയാണ് എന്ന വാര്‍ത്തയും പുറത്തുവന്നു.

ഈ നേട്ടം നടന്നുകൊണ്ടിരിക്കുന്ന ആഗോള ആര്‍ട്ടിഫിഷ്യല്‍ ഇന്റലിജന്‍സ് മത്സരത്തിലെ ഒരു പ്രധാന വികാസത്തെ അടയാളപ്പെടുത്തുന്നു. ഈ മേഖലയിലെ യുഎസ് ആധിപത്യത്തെ വെല്ലുവിളിക്കുന്നതാണ് ചൈനീസ് മുന്നേറ്റം.

യുഎസ് നിര്‍മ്മിത ചിപ്പുകള്‍ ചൈനയിലെത്തുന്നത് തടയാന്‍ മുന്‍ ജോ ബൈഡന്‍ ഭരണകൂടം ശ്രമിച്ചിരുന്നു. ഡീപ്സീക്കിന്റെ വിജയം സൂചിപ്പിക്കുന്നത് ചൈന വെല്ലുവിളികള്‍ മറികടന്നു എന്നാണ്.

ഡീപ്സീക്ക്-വി3 മോഡല്‍ എന്‍വിഡിയയുടെ എച്ച്800 ചിപ്പുകള്‍ ഉപയോഗിച്ചാണ് പരീക്ഷിച്ചതെന്ന് ഡീപ്സീക്ക് ഗവേഷകര്‍ റിപ്പോര്‍ട്ട് ചെയ്തു. പരിശീലനച്ചെലവ് 6 മില്യണില്‍ താഴെയാണെന്ന് വാര്‍ത്താ ഏജന്‍സിയായ റോയിട്ടേഴ്സ് റിപ്പോര്‍ട്ടില്‍ പരാമര്‍ശിച്ച വിവരങ്ങള്‍.

2023-ല്‍ ഹാങ്ഷൗവില്‍ സ്ഥാപിതമായ ഡീപ്‌സീക്ക്, എഐ മോഡലുകള്‍ പുറത്തിറക്കുന്ന നിരവധി ചൈനീസ് ടെക് സ്ഥാപനങ്ങളിലൊന്നാണ്. എന്നാല്‍ യുഎസിലെ മുന്‍നിര എഐ മോഡലുകളുടെ പ്രകടനവുമായി പൊരുത്തപ്പെടുന്നതിനോ അതിനെ മറികടക്കുന്നതിനോ വേണ്ടി യുഎസില്‍ അംഗീകാരം നേടുന്ന ആദ്യ സ്റ്റാര്‍ട്ടപ്പാണിത്.

ഡീപ്സീക്കിന്റെ സാങ്കേതിക നേട്ടം സിലിക്കണ്‍ വാലി മുതല്‍ ലോകത്തെ മുഴുവന്‍ ആശ്ചര്യപ്പെടുത്തിയിട്ടുണ്ട്.

ചൈനീസ് ക്വാണ്ടിറ്റേറ്റീവ് ഹെഡ്ജ് ഫണ്ടായ ഹൈ-ഫ്ളയറിന്റെ ആഴത്തിലുള്ള പഠന ശാഖയായ ഫയര്‍-ഫ്ളയറില്‍ നിന്ന് ഉയര്‍ന്നുവന്ന ഒരു ആര്‍ട്ടിഫിഷ്യല്‍ ഇന്റലിജന്‍സ് ഗവേഷണ ലാബാണ് ഡീപ്സീക്ക്.

2015ല്‍ സ്ഥാപിതമായ ഹൈ-ഫ്‌ളയര്‍ സാമ്പത്തിക ഡാറ്റ വിശകലനം ചെയ്യുന്നതിനായി വിപുലമായ കമ്പ്യൂട്ടിംഗ് പ്രയോജനപ്പെടുത്തി പ്രാധാന്യം നേടി. 2023-ഓടെ, അതിന്റെ സ്ഥാപകനായ ലിയാങ് വെന്‍ഫെംഗ്, തകര്‍പ്പന്‍ എഐ മോഡലുകള്‍ വികസിപ്പിക്കാന്‍ ആഗ്രഹിച്ചുകൊണ്ട് ഡീപ്‌സീക്ക് സൃഷ്ടിക്കുന്നതിലേക്ക് വിഭവങ്ങള്‍ റീഡയറക്ട് ചെയ്തു. ചൈനീസ് സര്‍വകലാശാലകളില്‍നിന്നുള്ള പുതിയ ബിരുദധാരികളാണ് ഡീപ്‌സീക്കില്‍ ജോലിചെയ്യുന്നത്.