ആര്‍ ബി ഐ വായ്പാ നയം, ബാങ്ക് ഓഹരികളില്‍ മുന്നേറ്റം

ആര്‍ ബി ഐ ധനനയം പുറത്തു വന്നതോടെ ഓഹരി വിപണിയില്‍ ഉയര്‍ച്ച. സെന്‍സെക്‌സ് 479 പോയിന്റും നിഫ്റ്റി 144 പോയിന്റും ഉയര്‍ന്നു. പലിശ നിരക്കില്‍ മാറ്റമുണ്ടാകില്ല എന്ന വാര്‍ത്ത തുണയായത് പ്രധാനമായും ബാങ്കിംഗ് ഓഹരകള്‍ക്കാണ്. റിപ്പോ, റിവേഴ്‌സ് റിപ്പോയില്‍ സ്ഥിരത നിലനിര്‍ത്തിയാണ് ആര്‍ ബി ഐ ധനനയം വ്യാഴാഴ്ച പ്രഖ്യാപിച്ചത്.

നിരക്കില്‍ പ്രത്യേകിച്ച് റിവേഴ്‌സ് റിപ്പോയില്‍ നേരിയ വര്‍ധനയെങ്കിലും വരുത്തുമെന്ന് പ്രതീക്ഷിച്ചിരുന്നുവെങ്കിലും ഉണ്ടായില്ല. ഇതോടെ ഭവന വായ്പ അടക്കമുള്ളവയുടെ നിരക്കുകള്‍ മാറ്റമില്ലാതെ തുടരും. ആര്‍ ബി ഐ യുടെ ധന നയ സമിതിയാണ് നിരക്ക് തുടരാന്‍ തീരുമാനിച്ചത്. പണപ്പെരുപ്പവും സാമ്പത്തിക വളര്‍ച്ചയും തമ്മിലുള്ള സംതുലിതാവസ്ഥ നിലനിര്‍ത്തുകയാണ് ആര്‍ ബി ഐ പുതിയ പ്രഖ്യാപനത്തിലൂടെ ലക്ഷ്യമിടുന്നത്. കാര്യങ്ങള്‍ കുടുതല്‍ മെച്ചപ്പെടുന്ന അവസരത്തില്‍ പലിശ നിരക്ക് കൂട്ടുന്ന കാര്യം പരിഗണിച്ചേക്കും. ബജറ്റിന് ശേഷം വരുന്ന ആദ്യത്തെ ധനനയമാണ് ഇത്.

അതേ സമയം 2022-23 ലെ പ്രിതീക്ഷിക്കുന്ന ജിഡിപി വളര്‍ച്ചാ നിരക്ക് 7.8 ശതമാനമാക്കി. ഉപഭോക്തൃ വില സൂചിക ഈ സാമ്പത്തിക വര്‍ഷം 5.3 ശതമാനത്തില്‍ തുടരുമെന്നാണ് ആര്‍ ബി ഐ വിലയിരുത്തല്‍. അടുത്ത വര്‍ഷത്തെ കണക്ക് കൂട്ടല്‍ 4.5 ശതമാനമാണ്. ഇക്കഴിഞ്ഞ ഡിസംബറില്‍ പണപ്പെരുപ്പ നിരക്ക് 5.59 ശതമാനമായി ഉയര്‍ന്നിരുന്നു.