സൗദിയുടെ എണ്ണയിതര കയറ്റുമതിയില്‍ കുതിച്ചു ചാട്ടം; ഒക്ടോബറില്‍ മാത്രം 4.4 ശതമാനം വര്‍ധനവ്

സൗദി അറേബ്യയുടെ എണ്ണയിതര ഉത്പന്നങ്ങളുടെ വിദേശ കയറ്റുമതി വീണ്ടും വര്‍ധിച്ചു. കഴിഞ്ഞ ഒക്ടോബര്‍ മാസത്തില്‍ 4.4 ശതമാനം വര്‍ധനവാണ് രേഖപ്പെടുത്തിയതെന്ന് ജനറല്‍ അതോറിറ്റി ഫോര്‍ സ്റ്റാറ്റിസ്റ്റിക്‌സ് (ഗസ്റ്റാറ്റ്) പുറത്തിറക്കിയ റിപ്പോര്‍ട്ടില്‍ പറഞ്ഞു. സെപ്തംബറില്‍ ഒഴികെ ഈ വര്‍ഷത്തെ മറ്റു എല്ലാ മാസങ്ങളിലും വര്‍ധനവ് രേഖപ്പെടുത്തിയിട്ടുമുണ്ട്.

മുന്‍ വര്‍ഷത്തെ ഇതേ കാലയളവിനെ അപേക്ഷിച്ച് 4.4 ശതമാനത്തിന്റെ വര്‍ധനവാണ് ഈ വര്‍ഷം ഉണ്ടായിരിക്കുന്നത്. ഇതേ മാസത്തില്‍ 24.91 ബില്യണ്‍ റിയാലിന്റെ കയറ്റുമതിയാണ് രേഖപ്പെടുത്തിയിരിക്കുന്നത്.

അതേസമയം, 2021ല്‍ 23.71 ബില്യണ്‍ റിയാലിന്റെ കയറ്റുമതിയാണ് രേഖപ്പെടുത്തിയിരുന്നത്. രാജ്യത്തെ പ്രമുഖ തുറമുഖങ്ങളിലൊന്നായ കിംഗ് ഫഹദ് തുറമുഖം വഴിയാണ് ഏറ്റവും കൂടുതല്‍ ഉത്പന്നങ്ങള്‍ ഇത്തവണ കയറ്റുമതി ചെയ്തിരിക്കുന്നത്.

ഈ വര്‍ഷം പ്രധാനമായും കെമിക്കല്‍സ് ആആന്‍ഡ് ഇന്‍ഡസ്ട്രിയല്‍ ഉത്പന്നങ്ങളുടെയും മെഷിനറികളുടെയും കയറ്റുമതിയിലാണ് വളര്‍ച്ച രേഖപ്പെടുത്തിയിരിക്കുന്നത്. അതേ സമയം പ്ലാസ്റ്റിക്‌സ് റബ്ബര്‍ ഉത്പന്നങ്ങളുടെ കയറ്റുമതിയില്‍ ഈ വര്‍ഷം ഇടിവാണ് രേഖപ്പെടുത്തിയിരിക്കുന്നത്.