ലോകത്തിലെ മികച്ച ഹോട്ടലുകളുടെ പട്ടികയില്‍ ദുബൈ ബള്‍ഗാരിയും ബുര്‍ജുല്‍ അറബും

ലോകത്തിലെ മികച്ച ആയിരം ഹോട്ടലുകളുടെ പട്ടികയില്‍ ദുബൈയിലെ ബള്‍ഗാരി റിസോര്‍ട്ട് അഞ്ചാം സ്ഥാനത്ത്. അതേസയം ബുര്‍ജുല്‍ അറബ് എട്ടാം സ്ഥാനത്തുണ്ട്. ഫ്രഞ്ച് കമ്പനിയായ ലാലിസ്റ്റെ നടത്തിയ സര്‍വെയിലാണ് ഇക്കാര്യം വെളിപ്പെട്ടത്. ട്രാവല്‍ഗൈഡുകളും പ്രസിദ്ധീകരണങ്ങളും ഉപഭോക്തൃ അവലോകനങ്ങളും പരിശോധിച്ചാണ് ലോകത്തിലെ മികച്ച ആയിരം ഹോട്ടലുകള്‍ കണ്ടെത്തിയത്.

ഇറ്റാലിയന്‍ ആര്‍ക്കിടെക്ചര്‍ സ്ഥാപനമായ അന്റോണിയോ സിറ്റീരിയോ പട്രീഷ്യ വിയലാണ് ദുബൈയിലെ ബള്‍ഗാരി റിസോര്‍ട്ടിന്റെ വാസ്തുവിദ്യയും ഇന്റീരിയര്‍ ഡിസൈനും പൂര്‍ത്തിയാക്കിയത്. കടല്‍ക്കുതിരയുടെ ആകൃതിയിലുള്ള ജുമൈറ ബേ ഐലന്‍ഡിലാണ് ഇതുള്ളത്.​

ലോകത്തിലെ അതിമനോഹരവും ആഡംബര പൂര്‍ണവുമായ കാര്യങ്ങള്‍ ഒരുക്കുന്നതില്‍ അഭിമാനിക്കുന്ന നഗരമാണ് ദുബൈ. ലോകത്തിലെ ഏറ്റവും ഉയരം കൂടിയ അംബരചുംബിയായ കെട്ടിടം, ഏറ്റവും വലിയ ഷോപ്പിംഗ് മാള്‍, ഏറ്റവും ഉയര്‍ന്ന നൃത്ത ജലധാര എന്നിവ ഇവിടുത്തെ സവിശേഷതകളാണ്. നഗരത്തിലെ മുന്‍നിര ഹോട്ടലുകളില്‍ മികച്ചവയും ദുബൈയിലുണ്ട്. ബള്‍ഗാരി ഇവയില്‍ ഏറ്റവും വലുതും ആഡംബരമുള്ളതുമാണ്.

5,812 ചതുരശ്ര അടി വിസ്തീര്‍ണ്ണമുള്ള റിസോര്‍ട്ടില്‍ 5,381 ചതുരശ്ര അടി വിസ്തീര്‍ണ്ണമുള്ള പൂന്തോട്ടവും അലങ്കരിച്ച ടെറസും സ്വകാര്യ ബീച്ചും കടലിന് അഭിമുഖമായി ഒരു ഓവല്‍ പൂളും ഉണ്ട്. തിളങ്ങുന്ന ക്രിസ്റ്റല്‍ ലൈറ്റ് ഫിക്ചറിന് കീഴില്‍ മൂന്ന് കിടപ്പുമുറികളും 14 സീറ്റുകളുള്ള ഡൈനിംഗ് ടേബിളും ഇവിടെയുണ്ട്. ഒരു ലൈവ് കുക്കിംഗ് സ്‌റ്റേഷനും ബാറും വിനോദത്തിന് കൂടുതല്‍ എരിവു പകരുന്നു.