ഈദിന് യാത്രക്കാരുടെ തിരക്കേറും;എമിറേറ്റ്‌സ് കൂടുതല്‍ സര്‍വീസ് നടത്തും

ഈദ് അല്‍ ഫിത്തറിന് നിരവധി പേര്‍ ബന്ധുക്കളേയും സുഹൃത്തുക്കളേയും കാണാന്‍ യാത്ര പോകാനിടയുള്ളതിനാല്‍ കൂടുതല്‍ സര്‍വീസുകള്‍ പ്രഖ്യാപിച്ച് എമിറേറ്റ്‌സ്. ദുബായിയുടെ മുന്‍നിര വിമാനക്കമ്പനിയായ എമിറേറ്റ്‌സ് 19 അധിക വിമാനങ്ങളുമായി മേഖലയിലുടനീളം ഷെഡ്യൂളുകള്‍ വിപുലീകരിക്കുന്നു. 1,50,000 പേര്‍ ഈദ് സമയത്ത് യാത്ര ചെയ്യുമെന്ന് കണക്കാക്കുന്നു. ഇത് കണക്കിലെടുത്ത് ജിദ്ദ,കുവൈറ്റ്,ബെയ്‌റൂട്ട്,അമ്മാന്‍ എന്നിവിടങ്ങളിലേക്ക് കൂടുതല്‍ സര്‍വീസ് ലക്ഷ്യമിടുന്നുണ്ട്. ഏപ്രില്‍ 7 മുതല്‍ 13 വരെ എമിറേറ്റ്‌സ് ജിദ്ദയിലേക്ക് ഏഴ് വിമാനങ്ങള്‍ അധിക സര്‍വീസ് നടത്തും.

കുവൈറ്റില്‍, എമിറേറ്റ്‌സ് ഏപ്രില്‍ 7 നും 20 നും ഇടയില്‍ ആറ് അധിക വിമാനങ്ങള്‍ സര്‍വീസ് നടത്തും. ആ സമയത്ത് ദുബായ്, ബാങ്കോക്ക്, ഒസാക്ക തുടങ്ങിയ ജനപ്രിയ വിനോദ ഗേറ്റ്വേകളിലേക്കുള്ള ഗണ്യമായ യാത്രാ ആവശ്യം നിറവേറ്റുകയും യാത്രക്കാര്‍ക്ക് ചെന്നൈ,ഹൈദരാബാദ്,സിയാല്‍കോട്ട,പെഷവാര്‍ എന്നിവിടങ്ങളിലേക്ക് പോകാനുള്ള അവസരവും നല്‍കും.

ബഹ്റൈനിലേക്കുള്ള എമിറേറ്റ്സിന്റെ ഫ്‌ലൈറ്റ് ഷെഡ്യൂള്‍ മെയ് 2 മുതല്‍ 22 പ്രതിവാര ഫ്‌ലൈറ്റുകളായി വിപുലീകരിക്കും. വിശുദ്ധ മാസത്തിന് ശേഷം കുടുംബാംഗങ്ങള്‍ ഒത്തുചേരുന്നതിനാല്‍ എമിറേറ്റ്‌സ് എയര്‍ലൈന്‍ അമ്മാനിലേക്ക് നാല് അധിക വിമാനങ്ങളും കൂടുതല്‍ യാത്രക്കാരെ ഉള്‍ക്കൊള്ളുന്നതിനായി ബെയ്റൂട്ടിലേക്ക് രണ്ട് അധിക വിമാനങ്ങളും ഷെഡ്യൂള്‍ ചെയ്യും.

ദുബായില്‍ നിന്ന് പുറപ്പെടുന്ന ഫ്‌ലൈറ്റുകളില്‍ ഉപഭോക്താക്കള്‍ക്കായി പ്രത്യേകം തയ്യാറാക്കിയ ഈദ് മെനു നല്‍കും. ചിക്കന്‍ ബിരിയാണി, ലാംബ് കിബ്ബെ ലബാനി, മക്ബൗസ്, വാനില, റോസ് മൗസ് കേക്ക് എന്നിവയും മറ്റ് രുചികരവും മധുരവുമായ വിഭവങ്ങള്‍ക്കൊപ്പം നല്‍കുന്നതാണ്.