ഗ്ലോബല്‍ സൗത്തിലെ രാജ്യങ്ങള്‍ വെല്ലുവിളി നേരിടുന്നു: പ്രധാനമന്ത്രി

എല്ലാവരെയും ഉള്‍ക്കൊള്ളുന്ന ഒരു സമൂഹത്തിന്റെ അടിത്തറ പാകുന്നതിനും സാമൂഹിക അസമത്വങ്ങള്‍ ഇല്ലാതാക്കുന്നതിനും സാങ്കേതികവിദ്യയുടെ ജനാധിപത്യവല്‍ക്കരണം അനിവാര്യമാണെന്ന് പ്രധാനമന്ത്രി നരേന്ദ്ര മോദി. അതിനായി ലോക സമൂഹം ചയോജിച്ച് പ്രവര്‍ത്തിക്കേണ്ടതുണ്ട്. ആര്‍ട്ടിഫിഷ്യല്‍ ഇന്റലിജന്‍സ് സുതാര്യവും ന്യായവും സുരക്ഷിതവും ആക്സസ് ചെയ്യാവുന്നതും ഉത്തരവാദിത്തമുള്ളതുമാക്കാന്‍ എല്ലാ രാജ്യങ്ങളുമായും ഇന്ത്യ പ്രവര്‍ത്തിക്കുമെന്ന് ജി7 അഡ്വാന്‍സ്ഡ് എക്കണോമികളുടെ ഉച്ചകോടിയുടെ ഔട്ട്റീച്ച് സെഷനില്‍ നടത്തിയ പ്രസംഗത്തില്‍ മോദി പറഞ്ഞു.

ലഭ്യത,സ്വീകരിക്കാവുന്നവ, താങ്ങാനാവുന്നത്, സ്വീകാര്യത എന്നീ തത്വങ്ങളില്‍ അധിഷ്ഠിതമാണ് ഊര്‍ജമേഖലയിലെ ഇന്ത്യയുടെ സമീപനമെന്ന് പ്രധാനമന്ത്രി പറഞ്ഞു.ഗ്ലോബല്‍ സൗത്തിലെ രാജ്യങ്ങള്‍ നേരിടുന്ന വെല്ലുവിളികള്‍ ഉയര്‍ത്തിക്കാട്ടി, ലോകമെമ്പാടുമുള്ള അനിശ്ചിതത്വങ്ങളുടെയും പിരിമുറുക്കങ്ങളുടെയും ആഘാതം അവര്‍ വഹിക്കുകയാണെന്നും അദ്ദേഹം കൂട്ടിച്ചേര്‍ത്തു.

ഗ്ലോബല്‍ സൗത്തിലെ രാജ്യങ്ങളുടെ മുന്‍ഗണനകളും ആശങ്കകളും ലോക വേദിയില്‍ അവതരിപ്പിക്കുന്നത് ഇന്ത്യ അതിന്റെ ഉത്തരവാദിത്തമായി കണക്കാക്കുന്നു. ഈ ശ്രമങ്ങളില്‍ ഇന്ത്യ ആഫ്രിക്കയ്ക്ക് ഉയര്‍ന്ന മുന്‍ഗണന നല്‍കിയിട്ടുണ്ട്. ഇക്കാരണത്താലാണ് ആഫ്രിക്കന്‍ യൂണിയനെ ജി20യില്‍ സ്ഥിരാംഗമാക്കിയത്. എല്ലാ ആഫ്രിക്കന്‍ രാജ്യങ്ങളുടെയും സാമ്പത്തികവും സാമൂഹികവുമായ വികസനത്തിനും സ്ഥിരതയ്ക്കും സുരക്ഷയ്ക്കും ഇന്ത്യ സംഭാവന ചെയ്യുന്നു, അത് തുടരുമെന്നും മോദി വ്യക്തമാക്കി.

ഇന്ത്യ ജി 20 പ്രസിഡന്റായിരിക്കെ എഐ, ഡിജിറ്റല്‍ പൊതു അടിസ്ഥാന സൗകര്യങ്ങള്‍ എന്നിവയില്‍ പ്രധാനമന്ത്രി മോദി സ്വീകരിച്ച നടപടികളെ ഫ്രഞ്ച് പ്രസിഡന്റ് ഇമ്മാനുവല്‍ മാക്രോണ്‍ പ്രശംസിച്ചു. ബ്രസീല്‍, അര്‍ജന്റീന, ഇന്ത്യ എന്നീ രാജ്യങ്ങളെ ധാതുക്കളുടെ മേഖലകളില്‍ നിര്‍ണായക പങ്കാളികളായി യുഎസ് പ്രസിഡന്റ് ജോ ബൈഡനും പരാമര്‍ശിച്ചു.

സാങ്കേതികവിദ്യയിലെ കുത്തക അവസാനിപ്പിക്കേണ്ടതിന്റെ പ്രാധാന്യത്തെക്കുറിച്ച് പ്രധാനമന്ത്രി മോദി വിശദമായി സംസാരിച്ചു. സാങ്കേതികവിദ്യയുടെ പ്രയോജനങ്ങള്‍ സമൂഹത്തിലെ എല്ലാ വിഭാഗങ്ങളിലേക്കും എത്തുന്നുവെന്ന് നാം കൂട്ടായി ഉറപ്പാക്കണം. സമൂഹത്തിലെ ഓരോ വ്യക്തിയുടെയും കഴിവുകള്‍ തിരിച്ചറിയുക, സാമൂഹിക അസമത്വങ്ങള്‍ ഇല്ലാതാക്കാന്‍ സഹായിക്കുക, അവയെ പരിമിതപ്പെടുത്തുന്നതിന് പകരം മനുഷ്യശക്തികള്‍ വികസിപ്പിക്കുക എന്നിവ ആവശ്യമാണെന്നും മോദി പറഞ്ഞു.

ഇത് നമ്മുടെ ആഗ്രഹം മാത്രമല്ല, നമ്മുടെ ഉത്തരവാദിത്തവും ആയിരിക്കണം. സാങ്കേതികവിദ്യയിലെ കുത്തകയെ ബഹുജന ഉപയോഗമാക്കി മാറ്റണമെന്നും പ്രധാനമന്ത്രി പറഞ്ഞു.

ഇരുപത്തിയൊന്നാം നൂറ്റാണ്ട് സാങ്കേതികവിദ്യയുടെ നൂറ്റാണ്ടാണ്. സാങ്കേതികവിദ്യയുടെ സ്വാധീനം നഷ്ടപ്പെടുന്ന ഒരു വശവും മനുഷ്യജീവിതത്തില്‍ ഇല്ലെന്നും അദ്ദേഹം പറഞ്ഞു.

ഒരു വശത്ത് സാങ്കേതികവിദ്യ മനുഷ്യനെ ചന്ദ്രനിലേക്ക് കൊണ്ടുപോകാനുള്ള ധൈര്യം നല്‍കുമ്പോള്‍ മറുവശത്ത് ഇത് സൈബര്‍ സുരക്ഷ പോലുള്ള വെല്ലുവിളികള്‍ സൃഷ്ടിക്കുകയും ചെയ്യുന്നു.ആര്‍ട്ടിഫിഷ്യല്‍ ഇന്റലിജന്‍സ് സംബന്ധിച്ച് ദേശീയ തന്ത്രം രൂപീകരിക്കുന്ന ആദ്യ ഏതാനും രാജ്യങ്ങളില്‍ ഒന്നാണ് ഇന്ത്യയെന്നും പ്രധാനമന്ത്രി കൂട്ടിച്ചേര്‍ത്തു.