ഡോളറിനെതിരെ നേട്ടവുമായി രൂപ

ഇന്ത്യന്‍ രൂപയുടെ മൂല്യത്തില്‍ മുന്നേറ്റം. ഡോളറിനെതിരെ 33 പൈസ ഉയർന്ന് രൂപയുടെ മൂല്യം 86.65 എന്ന നിലയിലെത്തി. വിദേശ വിപണിയിൽ അമേരിക്കന്‍ ഡോളര്‍ ദുര്‍ബലമായതാണ് മൂല്യമുയരാന്‍ കാരണമായത്.

86.88 എന്ന നിലയിലാണ് ഇന്ന് രൂപയുടെ വിനിമയം തുടങ്ങിയത്. വ്യാപാരത്തിനിടെ ഒരു ഘട്ടത്തില്‍ ഡോളറിനെതിരെ രൂപയുടെ മൂല്യം 86.58 ലേക്ക് ഉയർന്ന ശേഷമാണ്‌ രൂപ 33 പൈസയുടെ നേട്ടത്തോടെ വ്യാപാരം അവസാനിച്ചത്. അതേസമയം ആറ് കറൻസികളുടെ ഒരു ബാസ്കറ്റിനെതിരെ ഗ്രീൻബാക്കിന്റെ ശക്തി അളക്കുന്ന യുഎസ് ഡോളർ സൂചിക 0.21 ശതമാനം കുറഞ്ഞ് 106.95 ൽ വ്യാപാരം നടത്തി.

ആഗോള എണ്ണ മാനദണ്ഡമായ ബ്രെന്റ് ക്രൂഡ് ഓയിൽ ഫ്യൂച്ചേഴ്‌സ് വ്യാപാരത്തിൽ 0.04 ശതമാനം ഉയർന്ന് ബാരലിന് 76.07 യുഎസ് ഡോളറിലെത്തി.