ഇൻവെസ്റ്റ് കേരള ഗ്ലോബൽ സമ്മിറ്റിന് ഇനി 9 ദിവസം

കേരളം പ്രതീക്ഷയോടെ കാത്തിരിക്കുന്ന ആഗോള നിക്ഷേപക സംഗമമായ ഇൻവെസ്റ്റ് കേരള ഗ്ലോബൽ സമ്മിറ്റിന് ഇനി 9 ദിവസമെന്ന് വ്യവസായ വകുപ്പ് മന്ത്രി പി രാജീവ്. ഫെബ്രുവരി 21, 22 തീയതികളിൽ കൊച്ചിയിൽ വച്ച് സംഘടിപ്പിക്കുന്ന നിക്ഷേപക സംഗമം കേരളത്തിൻ്റെ വ്യവസായിക രംഗത്ത് വിപ്ലവകരമായ വിധത്തിൽ നിക്ഷേപങ്ങൾ ആകർഷിക്കുമെന്ന് മന്ത്രി പങ്കുവെച്ച ഫേസ്ബുക് പോസ്റ്റിൽ കുറിച്ചു . ഈസ് ഓഫ് ഡൂയിങ്ങ് ബിസിനസിൽ രാജ്യത്തുതന്നെ ഒന്നാമതുള്ള കേരളം പല ലോകോത്തര കമ്പനികളുടെയും നിക്ഷേപകേന്ദ്രമായി മാറിക്കൊണ്ടിരിക്കുന്ന ഘട്ടത്തിലാണ് നിക്ഷേപക സംഗമം കടന്നുവരുന്നത് എന്നത് അനുകൂലഘടകമാണ് എന്നും അദ്ദേഹം വ്യക്തമാക്കി.

ആഗോള നിക്ഷേപക സംഗമത്തിനായി മികച്ച മുന്നൊരുക്കങ്ങൾ സംസ്ഥാനം നടത്തുന്നുണ്ട്. ഇതിനോടകം 39 പ്രിപ്പറേറ്ററി പരിപാടികൾ സംഘടിപ്പിച്ചു കഴിഞ്ഞു. ചെന്നൈ, ബംഗളൂരു, ഹൈദരാബാദ്, മുംബൈ, ഡൽഹി എന്നീ പ്രധാന നഗരങ്ങളിൽ സംരംഭകരുമായി ഇൻ്റസ്ട്രിയൽ റോഡ് ഷോകൾ സംഘടിപ്പിച്ചു. ഇതിന് ശേഷം ഗൾഫ് മേഖലയിലും റോഡ്ഷോ സംഘടിപ്പിച്ചു. ഇൻവെസ്റ്റ് കേരള ഗ്ലോബൽ സമ്മിറ്റിന് മുന്നോടിയായി രാജ്യത്തെ ആദ്യ ഇൻ്റർനാഷണൽ ജെൻ എ ഐ കോൺക്ലേവ്, കേരളത്തിലെ ആദ്യ ഇൻ്റർനാഷണൽ റോബോട്ടിക്സ് റൗണ്ട് ടേബിൾ കോൺക്ലേവ്, മാരിടൈം ആൻ്റ് ലോജിസ്റ്റിക്സ് റൗണ്ട് ടേബിൾ, ഫുഡ് ടെക് കോൺക്ലേവ്, ഇൻ്റർനാഷണൽ ബയോടെക്നോളജി ആൻ്റ് ലൈഫ് സയൻസ് കോൺക്ലേവ്, വേസ്റ്റ് മാനേജ്മെന്റ് ആന്റ് റീസൈക്ലിങ്ങ് കോൺക്ലേവ്, ടൂറിസം കോൺക്ലേവ്, ഓട്ടോമോട്ടീവ് സമ്മിറ്റ്, വിഴിഞ്ഞം കോൺക്ലേവ്, അംബാസിഡേഴ്സ് മീറ്റ് തുടങ്ങി ബഹുഭൂരിപക്ഷം പരിപാടികളും കേരളം പൂർത്തിയാക്കിയിട്ടുണ്ട്. ദാവോസിലെ വേൾഡ് എക്കണോമിക് ഫോറത്തിലുൾപ്പെടെ കേരളത്തിന് ലഭിച്ച പ്രശംസയും ലോകമാകെ കേരളത്തിൻ്റെ പേരുയർന്നു കേൾക്കുന്നുവെന്നതും വലിയ പ്രതീക്ഷയാണ് ഇൻവെസ്റ്റ് കേരള ഗ്ലോബൽ സമ്മിറ്റിലേക്ക് നീങ്ങുന്ന ഘട്ടത്തിൽ സൃഷ്ടിക്കുന്നത്. തീർച്ചയായും കേരളം ഇന്നേവരെ കാണാത്ത ചരിത്രസംഭവമായി ഈ ആഗോള നിക്ഷേപക സംഗമം മാറുമെന്നും മന്ത്രി അറിയിച്ചു.