തെരഞ്ഞെടുപ്പിലെ ഇടപെടല്‍; കനേഡിയന്‍ റിപ്പോര്‍ട്ട് ഇന്ത്യ തള്ളി

തിരഞ്ഞെടുപ്പ് പ്രക്രിയയില്‍ ഇന്ത്യയും ചൈനയും ഇടപെടുന്നുവെന്ന് ആരോപിക്കുന്ന കനേഡിയന്‍ കമ്മീഷന്‍ റിപ്പോര്‍ട്ട് ഇന്ത്യ തള്ളി. കാനഡയിലെ തിരഞ്ഞെടുപ്പുകളില്‍ വിദേശ ഇടപെടല്‍ ഒരു പുതിയ പ്രതിഭാസമല്ലെന്നും എന്നാല്‍ അത് വര്‍ധിച്ചു വരികയാണെന്നും ഫോറിന്‍ ഇന്റര്‍ഫെറന്‍സ് കമ്മീഷന്‍ അതിന്റെ റിപ്പോര്‍ട്ടില്‍ വ്യക്തമാക്കിയിരുന്നു.

ഇന്ത്യയുടെ ആഭ്യന്തര കാര്യങ്ങളില്‍ എപ്പോഴും ഇടപെടുന്നത് കാനഡയാണെന്നും റിപ്പോര്‍ട്ട് തള്ളി വിദേശകാര്യ മന്ത്രാലയം (എംഇഎ) കൂട്ടിച്ചേര്‍ത്തു.

'വിദേശ ഇടപെടല്‍ സംബന്ധിച്ച പ്രവര്‍ത്തനങ്ങളെക്കുറിച്ചുള്ള ഒരു റിപ്പോര്‍ട്ട് ഞങ്ങള്‍ കണ്ടു. ഇന്ത്യയുടെ ആഭ്യന്തര കാര്യങ്ങളില്‍ തുടര്‍ച്ചയായി ഇടപെടുന്നത് കാനഡയാണ്. അനധികൃത കുടിയേറ്റത്തിനും സംഘടിത ക്രിമിനല്‍ പ്രവര്‍ത്തനങ്ങള്‍ക്കും അത് സാഹചര്യമൊരുക്കിയിട്ടുണ്ട്. ഇന്ത്യയെക്കുറിച്ചുള്ള റിപ്പോര്‍ട്ടിന്റെ സൂചനകള്‍ ഞങ്ങള്‍ നിരസിക്കുന്നു, ''എംഇഎ പറഞ്ഞു.

കാനഡയിലെ 2019-ലെയും 2021-ലെയും തെരഞ്ഞെടുപ്പുകളില്‍ ചൈനയുടെ ഇടപെടല്‍ സംബന്ധിച്ച് മാധ്യമറിപ്പോര്‍ട്ടുകള്‍ക്ക് മറുപടിയായി 2023 സെപ്റ്റംബറില്‍ ആരംഭിച്ച അന്വേഷണത്തിന്റെ റിപ്പോര്‍ട്ടാണ് പുറത്തുവന്നത്.

വിദേശ ഇടപെടല്‍ തിരഞ്ഞെടുപ്പിന്റെ ഫലത്തെ മാറ്റിമറിച്ചിട്ടില്ലെന്നും എന്നാല്‍ അത് സംവിധാനത്തിലുള്ള ജനങ്ങളുടെ വിശ്വാസത്തെ ഇല്ലാതാക്കിയെന്നും കഴിഞ്ഞ വര്‍ഷം മേയില്‍ പുറത്തിറക്കിയ ഇടക്കാല റിപ്പോര്‍ട്ടിലെ കണ്ടെത്തലുകള്‍ റിപ്പോര്‍ട്ട് സ്ഥിരീകരിച്ചു.

ഇന്ത്യയെപ്പോലെ ചൈനയും റിപ്പോര്‍ട്ടിനെ അപലപിച്ചു. 'അടിസ്ഥാനമില്ലാത്ത ആരോപണങ്ങള്‍' എന്ന് വിളിക്കുന്ന ചൈന, കാനഡയുടെ ആഭ്യന്തര കാര്യങ്ങളില്‍ ഒരിക്കലും ഇടപെട്ടിട്ടില്ലെന്നും അങ്ങനെ ചെയ്യാന്‍ താല്‍പ്പര്യമില്ലെന്നും പറഞ്ഞു.

കനേഡിയന്‍ കമ്മീഷന്‍ റിപ്പോര്‍ട്ട് പ്രകാരം തിരഞ്ഞെടുപ്പ് വിദേശ ഇടപെടലിന്റെ കാര്യത്തില്‍ ഏറ്റവും സജീവമായ രണ്ടാമത്തെ രാജ്യമാണ് ഇന്ത്യ. ചൈനയെപ്പോലെ ഇന്ത്യയും ലോക വേദിയില്‍ ഒരു നിര്‍ണായക ശക്തിയാണെന്നും ഇന്ത്യയും ചൈനയും ഒരുമിച്ച് പ്രവര്‍ത്തിക്കുമ്പോള്‍, ബന്ധത്തില്‍ വെല്ലുവിളികള്‍ ഉണ്ടെന്നും 123 പേജുള്ള റിപ്പോര്‍ട്ടില്‍ പറയുന്നു.

ഒക്ടോബറില്‍ ആറ് നയതന്ത്ര ഉദ്യോഗസ്ഥരെ പുറത്താക്കിയതും അവരെ ഏജന്റുമാര്‍ എന്ന് വിളിച്ചതും റിപ്പോര്‍ട്ട് എടുത്തുകാണിച്ചു. കാനഡയുടെ അടിസ്ഥാന രഹിതമായ ആരോപണങ്ങള്‍ക്കും രാജ്യത്തെ ഇന്ത്യന്‍ ഹൈക്കമ്മീഷണറെ ലക്ഷ്യമിട്ടതിനും വിമര്‍ശിച്ചതിന് ശേഷം ആറ് കനേഡിയന്‍ നയതന്ത്രജ്ഞരെ ഇന്ത്യ പുറത്താക്കുകയും ചെയ്തിരുന്നു.