എന്താണ് കരോഷി? ജപ്പാന്‍ തൊഴിലാളികള്‍ അതിനെ മറികടക്കുന്നത് എങ്ങനെ?

വര്‍ഷങ്ങളായി, ജപ്പാനിലെ തൊഴില്‍ സംസ്‌കാരം നിര്‍വചിക്കപ്പെട്ടിരിക്കുന്നത് ദൈര്‍ഘ്യമേറിയ ജോലി സമയം, നിരന്തരമായ സമ്മര്‍ദ്ദം, തൊഴിലാളികളുടെ ക്ഷേമത്തെ ബാധിക്കുന്ന ടോള്‍ എന്നിവ സംബന്ധിച്ചാണ്. എന്നാല്‍ ഇപ്പോള്‍, തൊഴില്‍ മേഖലയെ എന്നന്നേക്കുമായി മാറ്റാന്‍ കഴിയുന്ന കാര്യങ്ങള്‍ അവിടെ സംഭവിക്കുന്നു.

അമിത ജോലി മൂലമുണ്ടാകുന്ന മരണങ്ങളാണ്് കരോഷി എന്നറിയപ്പെടുന്നത്. ജപ്പാനില്‍ മുമ്പ് തൊഴില്‍ മേഖലയെ ആകെ ഗ്രസിച്ചിരുന്ന വിപത്തായിരുന്നു ഇത്. ഇന്നും ദാരുണമായ പ്രതിഭാസം അവസാനിച്ചു എന്നു കരുതാനാവില്ല. എന്നാല്‍ അത് കുറയുകയാണ്. അതിന് കാരണമാകുന്നത് പുതിയ തലമുറയുടെ തൊഴില്‍ സംസ്‌കാരമാണ്. പുതിയ തലമുറ ജാപ്പനീസ് തൊഴിലാളികള്‍ കുറഞ്ഞ മണിക്കൂറുകളുടെ ജോലികളാണ് ഇപ്പോള്‍ തെരഞ്ഞെടുക്കുന്നത്.

2022-ല്‍, അമിത ജോലിയുമായി ബന്ധപ്പെട്ട ആത്മഹത്യകള്‍ ഏകദേശം 3,000 ആയിരുന്നു. കൂടാതെ നിരവധി പേര്‍ അമിത ജോലിയുമായി ബന്ധപ്പെട്ട ആരോഗ്യപ്രശ്‌നങ്ങള്‍ക്ക് കീഴടങ്ങിയതായും കരുതപ്പെടുന്നു.

ഇതിനെത്തുടര്‍ന്ന് സമീപ വര്‍ഷങ്ങളില്‍, ജപ്പാനില്‍ വാര്‍ഷിക ജോലി സമയം ഗണ്യമായി കുറയുകയാണ്. 2000-ത്തില്‍ തൊഴില്‍സമയത്തില്‍ നിന്ന് 2022 ആകുമ്പോഴേക്കും 11.6 ശതമാനം കുറവുണ്ടായി.

20 വയസ്സുള്ള പുരുഷന്മാര്‍, ഒരിക്കല്‍ 2000-ല്‍ ആഴ്ചയില്‍ ശരാശരി 46.4 മണിക്കൂര്‍ ജോലി ചെയ്തിരുന്നെങ്കില്‍ ഇപ്പോള്‍ അത് 38.1 മണിക്കൂര്‍ മാത്രമാണ്- റിപ്പോര്‍ട്ട് പറയുന്നു. ഇത് ജപ്പാന്റെ തൊഴില്‍ സംസ്‌കാരത്തെ പല യൂറോപ്യന്‍ രാജ്യങ്ങള്‍ക്കും അനുസൃതമായി കൊണ്ടുവന്നു.

തലമുറകളുടെ വ്യത്യാസങ്ങളാണ് ഈ മാറ്റത്തെ നയിക്കുന്നത്. ജോലി സുരക്ഷിതത്വത്തിനും സാമ്പത്തിക വളര്‍ച്ചയ്ക്കും പകരമായി, ചെറുപ്പക്കാരായ തൊഴിലാളികള്‍ തൊഴില്‍-ജീവിത സന്തുലിതാവസ്ഥയ്ക്ക് മുന്‍ഗണന നല്‍കുന്നു.

1970-കളിലെയും 1980-കളിലെയും സാമ്പത്തികമായ കുതിച്ചുചാട്ട വര്‍ഷങ്ങളില്‍ നിന്ന് വ്യത്യസ്തമായി ഇന്നത്തെ യുവ ജീവനക്കാര്‍ കുറഞ്ഞ പ്രതിഫലത്തിനായി കഠിനമായ തൊഴില്‍ സാഹചര്യങ്ങള്‍ സ്വീകരിക്കാന്‍ വിസമ്മതിക്കുന്നു.

ജപ്പാനിലെ തൊഴിലാളി ക്ഷാമം ഈ മാറ്റത്തിന് ആക്കം കൂട്ടി. നിരാശരായ കമ്പനികള്‍, ബിരുദം നേടുന്നതിന് മുമ്പ് ഇന്ന് വിദ്യാര്‍ത്ഥികളെ ആകര്‍ഷിക്കുന്നു. യുവ തൊഴിലാളികള്‍ക്ക് അഭൂതപൂര്‍വമായ നേട്ടം വാഗ്ദാനം ചെയ്യുന്നു. അതുവഴി 20-കളിലെ തൊഴിലാളികള്‍ അവരുടെ ജീവിത നിലവാരം മെച്ചപ്പെടുത്തുന്നു. റിക്രൂട്ട് വര്‍ക്ക്‌സ് ഇന്‍സ്റ്റിറ്റ്യൂട്ടിലെ അനലിസ്റ്റായ തകാഷി സകാമോട്ടോ പറയുന്നതനുസരിച്ച്, ഈ ഗ്രൂപ്പിന്റെ വേതനം 2000 മുതല്‍ 25 ശതമാനം വര്‍ദ്ധിച്ചു.

വെല്ലുവിളികള്‍ക്കിടയിലും, ഈ സാംസ്‌കാരിക മാറ്റത്തിന് ഒരു വെള്ളിവെളിച്ചമുണ്ടാകാം. കരോഷിയുമായുള്ള ജപ്പാന്റെ ദീര്‍ഘകാല പോരാട്ടം, അമിത അധ്വാനത്തിന്റെ ഉയര്‍ന്ന മനുഷ്യച്ചെലവിന്റെ വ്യക്തമായ ഓര്‍മ്മപ്പെടുത്തലാണ്.