മൊത്തവില പണപ്പെരുപ്പം (-) 4.12%ലേക്ക് താഴ്ന്നു

ഭക്ഷണം, ഇന്ധനം, മാനുഫാക്ചറിംഗ് ഉല്‍പ്പന്നങ്ങള്‍ എന്നിവയുടെ വില ലഘൂകരിച്ചതിനാൽ മൊത്തവില അടിസ്ഥാനമാക്കിയുള്ള പണപ്പെരുപ്പ നിരക്ക് ജൂണിൽ (-) 4.12 ശതമാനമായി കുറഞ്ഞു. മൊത്തവില സൂചിക (WPI) അടിസ്ഥാനമാക്കിയുള്ള പണപ്പെരുപ്പം മെയ് മാസത്തിൽ (-) 3.48 ശതമാനമായിരുന്നു. കഴിഞ്ഞ വർഷം ജൂണിൽ ഇത് 16.23 ശതമാനമായിരുന്നു.

ഭക്ഷ്യവസ്തുക്കളുടെ പണപ്പെരുപ്പം മെയ് മാസത്തിലെ (-) 1.59 ശതമാനത്തിൽ നിന്ന് ജൂണിൽ (-) 1.24 ശതമാനമായി മാറിയെന്ന് വാണിജ്യ, വ്യവസായ മന്ത്രാലയം വെള്ളിയാഴ്ച പുറത്തിറക്കിയ പ്രസ്താവനയിൽ പറഞ്ഞു. ഇന്ധന, വൈദ്യുതി മേഖലയിലെ പണപ്പെരുപ്പം മെയ് മാസത്തിലെ (-) 9.17 ശതമാനത്തിൽ നിന്ന് ജൂണിൽ (-) 12.63 ശതമാനമായി കുറഞ്ഞു.

മാനുഫാക്ചറിംഗ് ഉൽപന്നങ്ങളിൽ, ജൂണില്‍ മൊത്തവില പണപ്പെരുപ്പം (-) 2.71 ശതമാനമാണ്. മെയ് മാസത്തില്‍ ഇത് (-) 2.97 ശതമാനം ആയിരുന്നു. ധാതു എണ്ണകൾ, ഭക്ഷ്യ ഉൽപന്നങ്ങൾ, അടിസ്ഥാന ലോഹങ്ങൾ, അസംസ്‌കൃത പെട്രോളിയം, പ്രകൃതി വാതകം, തുണിത്തരങ്ങൾ എന്നിവയുടെ വിലയിടിവാണ് മൊത്തവില പണപ്പെരുപ്പ നിരക്ക് കുറയാൻ പ്രധാന കാരണം.

ജൂണിലെ റീട്ടെയില്‍ പണപ്പെരുപ്പം 4.81 ശതമാനത്തിലേക്ക് ഉയര്‍ന്നെന്ന് വ്യക്തമാക്കുന്ന ഡാറ്റ സര്‍ക്കാര്‍ നേരത്തേ പുറത്തുവിട്ടിരുന്നു. മൂന്നുമാസത്തെ ഇടിവിന് ശേഷമാണ് ഉപഭോക്തൃ വില അടിസ്ഥാനമാക്കിയുള്ള പണപ്പെരുപ്പം വര്‍ധിച്ചത്.