ഇന്ത്യയുമായുള്ള സ്വതന്ത്ര വ്യാപാരം ആഗോള താല്‍പ്പര്യം: ജിടിആര്‍ഐ

യൂറോപ്പ്, യുകെ തുടങ്ങിയ വലിയ സമ്പദ്‌വ്യവസ്ഥകൾ മുതൽ ഒമാനും പെറുവും ഉൾപ്പെടെയുള്ള ചെറിയ രാജ്യങ്ങൾ വരെ ഇന്ത്യയുമായി സ്വതന്ത്ര വ്യാപാര കരാർ (എഫ്‍ടിഎ) ഉണ്ടാക്കാൻ ആഗ്രഹിക്കുന്നതായി സാമ്പത്തിക ഗവേഷണ സ്ഥാപനമായ ജിടിആർഐയുടെ റിപ്പോർട്ട് പറയുന്നു. ഒരു വ്യാപാര കരാർ നടപ്പിലാക്കുന്നതിലൂടെ, ഇറക്കുമതി തീരുവകള്‍ ഇല്ലാതെയോ വളരേ കുറഞ്ഞ തീരുവകളിലൂടെയോ ഇന്ത്യൻ വിപണിയിലേക്ക് പ്രവേശിക്കാൻ കഴിയും. വലുതും വൈവിധ്യപൂര്‍ണവുമായ ജനസംഖ്യ, വേഗത്തില്‍ വളരുന്ന വിപണി എന്നിവയെല്ലാമാണ് ഇന്ത്യയെ ആകര്‍ഷകമാക്കുന്നത്.

നിലവില്‍ സ്വതന്ത്ര വ്യാപാര കരാര്‍ ഒപ്പുവെക്കാത്ത രാജ്യങ്ങളിൽ നിന്നാണ് ഇന്ത്യ ഇറക്കുമതിയുടെ 75 ശതമാനത്തിലധികം നിര്‍വഹിക്കുന്നത്. അതിനാല്‍ എഫ്‍ടിഎ നടപ്പിലാക്കാനായാല്‍ ഇന്ത്യന്‍ വിപണിയില്‍ മത്സരാധിഷ്ഠിത വിലയുമായി തങ്ങളുടെ ഉല്‍പ്പന്നങ്ങളെ അവതരിപ്പിക്കാനും നേട്ടംകൊയ്യാനും മികച്ച അവസരമുണ്ടെന്ന് വിവിധ രാജ്യങ്ങള്‍ വിലയിരുത്തുന്നു.

യുഎസ്, യൂറോപ്പ്, ജപ്പാൻ, യുകെ തുടങ്ങിയ വലിയ സമ്പദ്‌വ്യവസ്ഥകൾ മുതൽ ഒമാൻ, പെറു, മൗറീഷ്യസ് തുടങ്ങിയ ചെറിയ രാജ്യങ്ങൾ വരെ ഇതിനകം ഇന്ത്യയുമായി എഫ്‌ടിഎ ഉണ്ടാക്കുകയോ അതിനായി സജീവമായി ശ്രമിക്കുകയോ ചെയ്തിട്ടുണ്ട്. ഇന്ത്യ ചുമത്തുന്ന ഉയർന്ന ഇറക്കുമതി തീരുവയാണ് ഇതിന് പ്രധാന കാരണം, ഇത് ഇന്ത്യയുടെ വിപുലമായ വിപണിയിലേക്ക് പ്രവേശിക്കുന്നത് ഈ രാജ്യങ്ങൾക്ക് ബുദ്ധിമുട്ടാക്കുന്നു.

"എന്നിരുന്നാലും, നിലവില്‍ ചര്‍ച്ചകള്‍ പുരോഗമിക്കുന്ന എഫ്‍ടിഎകളില്‍ ഇന്ത്യയുടെ കയറ്റുമതിക്ക് കാര്യമായ മെച്ചമുണ്ടാകില്ല ഇന്ത്യയുമായി വ്യാപാര കരാറുകൾ ചർച്ച ചെയ്യുന്ന രാജ്യങ്ങൾക്ക് ഇതിനകം കുറഞ്ഞ ഇറക്കുമതി തീരുവകളാണുള്ളത്. ഉദാഹരണത്തിന്, യുകെയുടെ തീരുവ 4.1 ശതമാനവും കാനഡയുടേത് 3.3 ശതമാനവും യുഎസ്എയുടേത് 2.3 ശതമാനവുമാണ്. അതേസമയം ഇന്ത്യയുടെ ഇറക്കുമതി തീരുവ 12.6 ശതമാനത്തിൽ കൂടുതലാണ്," ജിടിആർഐ സഹസ്ഥാപകൻ അജയ് ശ്രീവാസ്തവ പറഞ്ഞു.

കൂടാതെ, ഈ രാജ്യങ്ങളിലെ ഇറക്കുമതിയുടെ ഗണ്യമായ പങ്ക് എംഎഫ്എൻ (ഏറ്റവും പരിഗണനയുള്ള രാഷ്ടങ്ങള്‍) അടിസ്ഥാനത്തില്‍ പൂജ്യം തീരുവയിലാണ് നടക്കുന്നത്. കാനഡയുടെ 70.8 ശതമാനം ഇറക്കുമതിയും പൂജ്യം എംഎഫ്എൻ ഡ്യൂട്ടിയിലാണ് നടക്കുന്നത്. സ്വിറ്റ്സർലൻഡ് (61 ശതമാനം), യുഎസ് (58.7 ശതമാനം), യുകെ (52 ശതമാനം), യൂറോപ്യൻ യൂണിയൻ (51.8 ശതമാനം) എന്നിവയുടെ ഇറക്കുമതിയിലും ഗണ്യമായ പങ്ക് എംഎഫ്എന്‍ വിഭാഗത്തിലാണ്. എന്നാല്‍ ഇന്ത്യയുടെ ഇറക്കുമതിയില്‍ 6.1 ശതമാനം മാത്രമാണ് എംഎഫ്‍എന്‍.