മേയില്‍ തൊഴിലില്ലായ്മയിലും തൊഴില്‍ പങ്കാളിത്തത്തിലും ഇടിവ്

ഇന്ത്യയിലെ തൊഴിലില്ലായ്മ നിരക്ക് മേയില്‍ 7.7 ശതമാനമായി കുറഞ്ഞുവെന്ന് സ്വകാര്യ സാമ്പത്തിക ഗവേഷണ സ്ഥാപനമായ സിഎംഐഇ-യുടെ റിപ്പോര്‍ട്ട്. തൊഴിൽ പങ്കാളിത്തം 441.9 ദശലക്ഷമായി കുറഞ്ഞതാണ് കഴിഞ്ഞ മാസത്തില്‍ തൊഴിലില്ലായ്മ കുറയുന്നതില്‍ പ്രധാന പങ്കുവഹിച്ചതെന്നും റിപ്പോര്‍ട്ട് ചൂണ്ടിക്കാണിക്കുന്നു. 15 വയസും അതിനുമുകളിലും പ്രായമുള്ളവരിൽ ഇന്ത്യയിലെ തൊഴിലില്ലായ്മ നിരക്ക് ഏപ്രിലില്‍ 8.5 ശതമാനമാണ് രേഖപ്പെടുത്തിയിരുന്നത്.

ഏപ്രിലിനെ അപേക്ഷിച്ച്, മേയില്‍ തൊഴിൽ പങ്കാളിത്ത നിരക്ക് (എൽപിആർ) 1.1 ശതമാനം ഇടിഞ്ഞ് 39.6 ശതമാനമായി. "ഏപ്രിലിൽ ധാരാളം ആളുകൾ തൊഴിൽ സേനയിൽ പുതുതായി എത്തി, എന്നാൽ അതിലെ ഒരു ചെറിയ വിഹിതത്തിന് മാത്രമേ തൊഴിൽ ഉറപ്പാക്കാൻ കഴിഞ്ഞുള്ളൂ. ഇത് മെയ് മാസത്തിൽ ജോലി അന്വേഷിക്കുന്നതിൽ നിന്ന് പലരെയും നിരുത്സാഹപ്പെടുത്തുമെന്നും എൽപിആറില്‍ ഇടിവുണ്ടാകുമെന്നും പ്രതീക്ഷിക്കപ്പെട്ടിരുന്നു," റിപ്പോര്‍ട്ടില്‍ സിഎംഐഇ- യില്‍ നിന്നുള്ള നടാഷ സോമന്‍ കെ പറയുന്നു.

നഗരങ്ങളെ അപേക്ഷിച്ച് ഗ്രാമങ്ങളിലാണ് എല്‍പിആറില്‍ കൂടുതല്‍ ഇടിവുണ്ടായത്. നഗരങ്ങളിലെ തൊഴില്‍ സേനയില്‍ ഏകദേശം 4.5 ദശലക്ഷത്തിന്‍റെ ഇടിവാണ് ഉണ്ടായത്. ഏപ്രിലിൽ നഗര തൊഴിൽ സേനയിൽ ഏകദേശം 147 ദശലക്ഷം ആളുകൾ ഉണ്ടായിരുന്നു, ഇത് മെയ് മാസത്തിൽ 142.5 ദശലക്ഷമായി കുറഞ്ഞു. നഗരങ്ങളിലെ തൊഴിലവസരങ്ങളിൽ 2.4 ദശലക്ഷത്തിന്റെ കുറവും തൊഴിലില്ലാത്തവരുടെ എണ്ണത്തിൽ 2.1 ദശലക്ഷത്തിന്റെ കുറവും ഉണ്ടായി.

ഇതിന്‍റെ ഫലമായി ഇന്ത്യന്‍ നഗരങ്ങളിലെ തൊഴിൽ ജനതയുടെ എണ്ണം മൊത്തം 129.5 ദശലക്ഷമായി. തൊഴിൽരഹിതരുടെ എണ്ണം ഏകദേശം 13 ദശലക്ഷത്തിലെത്തി.

ഗ്രാമീണ ഇന്ത്യയും സമാനമായ പ്രവണത പ്രകടമാക്കി. ഗ്രാമീണ തൊഴിലാളികളുടെ എണ്ണം മുൻ മാസത്തെ 306.5 ദശലക്ഷത്തിൽ നിന്ന് 299.4 ദശലക്ഷമായി കുറഞ്ഞു. ഏപ്രിലിൽ, നഗര ഇന്ത്യയെ അപേക്ഷിച്ച് ഗ്രാമീണ ഇന്ത്യ തൊഴിലവസരങ്ങളുടെ സൃഷ്ടിയില്‍ വര്‍ധന പ്രകടിപ്പിച്ചിരുന്നു, എങ്കിലും മേയില്‍ ഈ പ്രവണത തുടരാനായിട്ടില്ലെന്നും റിപ്പോര്‍ട്ട് ചൂണ്ടിക്കാണിക്കുന്നു.