ഇന്ത്യയുടെ സേവന മേഖല മന്ദഗതിയില്‍

സെപ്റ്റംബറില്‍ ഇന്ത്യയുടെ സേവന മേഖലയുടെ പ്രവര്‍ത്തനം 10 മാസത്തെ ഏറ്റവും താഴ്ന്ന നിലയിലേക്ക് എത്തിയതായി പ്രതിമാസ സര്‍വേ. പുതിയ ബിസിനസുകള്‍, അന്താരാഷ്ട്ര വില്‍പന, ഉല്‍പ്പാദന വളര്‍ച്ച എന്നിവ മിതമായമായതാണ് കാരണമെന്ന് വിലയിരുത്തല്‍.

എച്ച്എസ്ബിസി ഇന്ത്യ സര്‍വീസസ് ബിസിനസ് ആക്ടിവിറ്റി സൂചിക ഓഗസ്റ്റിലെ 60.9 ല്‍ നിന്ന് സെപ്റ്റംബറില്‍ 57.7 ആയാണ് കുറഞ്ഞത്. ഉല്‍പാദനത്തില്‍ വര്‍ധനവ് രേഖപ്പെടുത്തിയിട്ടുണ്ടെങ്കിലും വളര്‍ച്ചയുടെ വേഗത 2023 നവംബറിന് ശേഷമുള്ള ഏറ്റവും മന്ദഗതിയിലാണെന്ന് സൂചിപ്പിക്കുന്നു.

പര്‍ച്ചേസിംഗ് മാനേജര്‍മാരുടെ സൂചിക (പിഎംഐ) ഭാഷയില്‍, 50-ന് മുകളിലുള്ള സ്‌കോര്‍ വിപുലീകരണത്തെ അര്‍ത്ഥമാക്കുന്നു, അതേസമയം 50-ല്‍ താഴെയുള്ള സ്‌കോര്‍ സങ്കോചത്തെ സൂചിപ്പിക്കുന്നു.

സെപ്റ്റംബറില്‍ സേവന മേഖല മന്ദഗതിയിലാണ് വികസിച്ചതെന്ന് ഇന്ത്യയുടെ സേവനങ്ങളുടെ പിഎംഐ ഡാറ്റ കാണിക്കുന്നു. 2024 ല്‍ ആദ്യമായി ബിസിനസ് പ്രവര്‍ത്തന സൂചിക 60 ന് താഴെയായി, പക്ഷേ 57.7 ല്‍, അത് ഇപ്പോഴും ദീര്‍ഘകാല ശരാശരിയേക്കാള്‍ കൂടുതലാണ്.

കടുത്ത മത്സരം, ചെലവ് സമ്മര്‍ദങ്ങള്‍, ഉപഭോക്തൃ മുന്‍ഗണനയിലെ മാറ്റങ്ങള്‍ (അതായത് ഓണ്‍ലൈന്‍ സേവനങ്ങളിലേക്ക് മാറുക), പുതിയ കയറ്റുമതി ഓര്‍ഡറുകളിലെ കുറഞ്ഞ വര്‍ധന എന്നിവയാണ് വളര്‍ച്ചയെ തടഞ്ഞത്.

സര്‍വേ പ്രകാരം, ഒമ്പത് മാസത്തിനിടയിലെ അന്താരാഷ്ട്ര ഓര്‍ഡറുകളില്‍ ഏറ്റവും ദുര്‍ബലമായ വര്‍ധനയാണ് കമ്പനികള്‍ റിപ്പോര്‍ട്ട് ചെയ്തത്. വിപുലീകരണ നിരക്ക് 2024-ല്‍ ഇതുവരെയുള്ളതില്‍ വച്ച് ഏറ്റവും ദുര്‍ബലമായ നിലയിലെത്തി. എന്നിരുന്നാലും, ചില സ്ഥാപനങ്ങള്‍ ഏഷ്യ, യൂറോപ്പ്, വടക്കേ അമേരിക്ക, മിഡില്‍ ഈസ്റ്റ്, യുഎസ് എന്നിവിടങ്ങളില്‍ നിന്നുള്ള നേട്ടങ്ങള്‍ രേഖപ്പെടുത്തി.

സെപ്റ്റംബറിലെ കണക്കുകള്‍ വര്‍ധിച്ച തൊഴിലവസരങ്ങള്‍ സൃഷ്ടിക്കപ്പെട്ടതായും പറയുന്നു. മാത്രമല്ല, ബിസിനസ് ശുഭാപ്തിവിശ്വാസവും ശക്തിപ്പെട്ടു.

അതേസമയം, ഫാക്ടറി ഉല്‍പ്പാദനവും സേവന പ്രവര്‍ത്തനങ്ങളും കുറഞ്ഞ നിരക്കില്‍ ഉയര്‍ന്നതിനാല്‍ എച്ച്എസ്ബിസി ഇന്ത്യ കോമ്പോസിറ്റ് ഔട്ട്പുട്ട് സൂചിക ഓഗസ്റ്റിലെ 60.7 ല്‍ നിന്ന് സെപ്റ്റംബറില്‍ 58.3 ആയി കുറഞ്ഞു.

വളര്‍ച്ചയുടെ വേഗത നഷ്ടപ്പെട്ടെങ്കിലും, സ്വകാര്യ മേഖലയിലെ തൊഴില്‍ ഗണ്യമായി ഉയര്‍ന്നു, ഓഗസ്റ്റ് മുതല്‍ ബിസിനസ്സ് ആത്മവിശ്വാസം ശക്തിപ്പെട്ടതായും സര്‍വേ പറയുന്നു.