2000 രൂപയുടെ 72 ശതമാനവും ബാങ്കുകളിലെത്തി

പ്രചാരത്തില്‍നിന്നും പിന്‍വലിച്ച 2000 രൂപ കറന്‍സി നോട്ടുകളുടെ 72 ശതമാനവും ബാങ്കുകളില്‍ നിക്ഷേപമായോ മാറ്റിയെടുക്കുകയോ ചെയ്തു. മെയ് 19-നാണ് 2000 രൂപയുടെ കറന്‍സി നോട്ടുകള്‍ പ്രചാരത്തില്‍നിന്നും പിന്‍വലിക്കുന്നതായി ആര്‍ബിഐ പ്രഖ്യാപിച്ചത്. പ്രഖ്യാപനം കഴിഞ്ഞ് ഇപ്പോള്‍ ഒരു മാസം പിന്നിട്ടപ്പോഴാണ് 72 ശതമാനവും ബാങ്കുകളിലെത്തിയതായി സിഎന്‍ബിസി ടിവി18 വെള്ളിയാഴ്ച റിപ്പോര്‍ട്ട് ചെയ്തത്.

ഈ വര്‍ഷം സെപ്റ്റംബര്‍ 30 വരെ 2000 രൂപയുടെ കറന്‍സി നോട്ടുകള്‍ക്ക് നിയമ സാധുതയുണ്ട്. അതുവരെ ബാങ്കുകളില്‍നിന്നും മാറിയെടുക്കാമെന്ന് റിസര്‍വ് ബാങ്ക് ഓഫ് ഇന്ത്യയും (ആര്‍ബിഐ) അറിയിച്ചിട്ടുണ്ട്.

2016-ലാണ് 2000 രൂപയുടെ കറന്‍സി നോട്ടുകള്‍ അവതരിപ്പിച്ചത്. അന്ന് നോട്ട് നിരോധനത്തിന്റെ പശ്ചാത്തലത്തിലായിരുന്നു 2000 രൂപയുടെ കറന്‍സി നോട്ട് ഇറക്കാന്‍ തീരുമാനിച്ചത്.

പ്രചാരത്തില്‍ നിന്ന് 2,000 രൂപയുടെ നോട്ട് പിന്‍വലിക്കാനുള്ള റിസര്‍വ് ബാങ്ക് ഓഫ് ഇന്ത്യയുടെ (ആര്‍ബിഐ) തീരുമാനത്തെത്തുടര്‍ന്ന് ബാങ്ക് നിക്ഷേപത്തില്‍ വന്‍ വര്‍ധന രേഖപ്പെടുത്തിയിരുന്നു.

2023 ജൂണ്‍ രണ്ട് വരെയുള്ള കണക്ക്പ്രകാരം നിക്ഷേപയിനത്തില്‍ വിവിധ ബാങ്കുകളിലേക്ക് ഒഴുകിയെത്തിയ 2000 രൂപയുടെ നോട്ടുകള്‍ 3.26 ട്രില്യന്‍ മൂല്യമുള്ളതാണെന്ന് ആര്‍ബിഐ ഡാറ്റ വിശദമാക്കുന്നു. അതോടെ ബാങ്ക് നിക്ഷേപം 187.02 രൂപയിലെത്തിയിരുന്നു.

ബാങ്കുകള്‍ കൂടാതെ പോസ്റ്റോഫീസുകളിലും 2000 രൂപ നോട്ടുകള്‍ നിക്ഷേപിക്കാന്‍ അവസരമുണ്ടെങ്കിലും ആളുകള്‍ ഭൂരിഭാഗവും ബാങ്കുകളിലാണ് നിക്ഷേപം നടത്തുന്നത്.

ടേം ഡിപ്പോസിറ്റുകളില്‍ 2.65 ലക്ഷം കോടി രൂപയുടെയും ഡിമാന്‍ഡ് ഡിപ്പോസിറ്റുകളില്‍ 760,968 കോടി രൂപയുടെയും വര്‍ധനയുണ്ടായി. അതോടെ വാര്‍ഷിക നിക്ഷേപ വളര്‍ച്ചാ നിരക്ക് 11.8 ശതമാനവുമായി. ഇത് മുന്‍വര്‍ഷം 9.3 ശതമാനമായിരുന്നു.

2023 ജൂണ്‍ എട്ടിന് പണ നയം പ്രഖ്യാപിച്ചതിനു ശേഷം ആര്‍ബിഐ ഗവര്‍ണര്‍ എസ്.കെ. ദാസ് പറഞ്ഞത്, 2023 മാര്‍ച്ച് 31 വരെ 3.62 ലക്ഷം കോടി രൂപയുടെ 2,000 നോട്ടുകള്‍ പ്രചാരത്തിലുണ്ടെന്നാണ്. മെയ് 19-ന് 2000 രൂപയുടെ നോട്ടുകള്‍ പിന്‍വലിച്ചതിനു ശേഷം 2000 രൂപയുടെ ഏകദേശം 1.8 ലക്ഷം കോടി രൂപയുടെ നോട്ടുകള്‍ തിരിച്ചെത്തിയെന്നും എസ്.കെ. ദാസ് അറിയിച്ചിരുന്നു.

റിസര്‍വ് ബാങ്ക് 2000 രൂപയുടെ നോട്ട് പിന്‍വലിക്കുന്നതായി പ്രഖ്യാപനം നടത്തി ഒരാഴ്ച പിന്നിട്ടപ്പോള്‍ 17,000 കോടി രൂപയുടെ 2000 രൂപാ നോട്ടുകളാണ് എസ്ബിഐയില്‍ തിരിച്ചെത്തിയതെന്നു ചെയര്‍മാന്‍ ദിനേശ് കുമാര്‍ ഖാര അറിയിച്ചു. ഇതില്‍ 14,000 കോടി രൂപയും നിക്ഷേപമായിട്ടാണ് തിരിച്ചെത്തിയതെന്നും അദ്ദേഹം പറഞ്ഞു.

ബാങ്കുകളില്‍ നിന്ന് ഒരേസമയം 20,000 രൂപ വരെ മൂല്യമുള്ള 2000 രൂപാ നോട്ടുകള്‍ മാറ്റിയെടുക്കാന്‍ അവസരമുണ്ട്. നോട്ടുകള്‍ മാറ്റിയെടുക്കാന്‍ ബാങ്ക് അക്കൗണ്ട് വേണമെന്ന് നിര്‍ബന്ധമില്ലെന്ന് ആര്‍ബിഐ അറിയിച്ചിരുന്നു.

2016 നവംബര്‍ എട്ടിന് രാജ്യത്ത് 500, 1000 രൂപയുടെ നോട്ടുകള്‍ അസാധുവാക്കിയതോടെയാണ് 2000 രൂപയുടെ നോട്ടുകള്‍ അവതരിപ്പിച്ചത്. 2018-19-ല്‍ 2000 രൂപ നോട്ടുകളുടെ അച്ചടി നിര്‍ത്തുകയും ചെയ്തു.

2000 രൂപ നോട്ടുകള്‍ പിന്‍വലിക്കുന്നത് പഴയ നോട്ടുകള്‍ പിന്‍വലിക്കുന്ന ക്ലീന്‍ നോട്ട് നയത്തിന്റെ ഭാഗമാണെന്നാണ് ആര്‍ബിഐ വിശദീകരണം.