ഉയര്‍ന്ന വളര്‍ച്ചാ റാങ്കിംഗില്‍ 71 ഇന്ത്യന്‍ കമ്പനികള്‍

ദി ഫിനാന്‍ഷ്യല്‍ ടൈംസും (എഫ്ടി) ഡാറ്റാ കമ്പനിയായ സ്റ്റാറ്റിസ്റ്റയും സംയുക്തമായി പുറത്തിറക്കിയ ആറാമത് വാര്‍ഷിക 'ഉയര്‍ന്ന വളര്‍ച്ചാ കമ്പനികളുടെ ഏഷ്യ-പസഫിക് 2024'റിപ്പോര്‍ട്ടിന്റെ റാങ്കില്‍ ഇടംനേടിയത് എഴുപത്തിയൊന്ന് ഇന്ത്യന്‍ കമ്പനികള്‍. ഇലക്ട്രിക്-വെഹിക്കിള്‍ പ്ലാറ്റ്‌ഫോമായ സിപ്പ് ഇലക്ട്രിക് ഒന്നാം സ്ഥാനവും അഗ്രിടെക് സ്ഥാപനമായ ബിഗ്ഹാറ്റ് രണ്ടാം സ്ഥാനവും നേടി.

കമ്പനികളുടെ എണ്ണത്തില്‍ ദക്ഷിണ കൊറിയ ഒന്നാം സ്ഥാനത്താണ്. അവിടെ 123 സ്ഥാപനങ്ങള്‍ ഉയര്‍ന്ന വളര്‍ച്ച രേഖപ്പെടുത്തി. ജപ്പാനും സിംഗപ്പൂരും യഥാക്രമം 101, 93 കമ്പനികളുമായി രണ്ടും മൂന്നും സ്ഥാനത്തെത്തി. ഇന്ത്യ നാലാം സ്ഥാനം നേടി.

15.1 ശതമാനം കുറഞ്ഞ സംയുക്ത വാര്‍ഷിക വളര്‍ച്ചാ നിരക്ക് (സിഎജിആര്‍) പ്രകടിപ്പിക്കുന്ന കമ്പനികളാണ് പട്ടികയില്‍ ഇടംനേടുന്നത്. ഇന്ത്യയില്‍ നിന്ന് 2017-ല്‍ സ്ഥാപിതമായ സിപ്പ് ഇലക്ട്രിക്, 2019 മുതല്‍ 2022 വരെ ശ്രദ്ധേയമായ 396 ശതമാനം സിഎജിആര്‍ നേടി മുന്നിലെത്തി. തുടര്‍ന്ന് 2015-ല്‍ സ്ഥാപിതമായ ബിഗ് ഹാറ്റ്,304 ശതമാനം സിഎജിആര്‍ നേടി. സിംഗപ്പൂര്‍ ആസ്ഥാനമായുള്ള ലോജിസ്റ്റിക്‌സ് കമ്പനിയായ ഐഎസ്ഒ ടാങ്ക് മാനേജ്‌മെന്റ് 286 ശതമാനം സിഎജിആറോടെ മൂന്നാം സ്ഥാനം നേടി.

വ്യവസായ പ്രാതിനിധ്യത്തിന്റെ കാര്യത്തില്‍, റാങ്കിംഗില്‍ 30 ശതമാനം കമ്പനികളുമായി ഐടി, സോഫ്റ്റ് വെയര്‍ മേഖല ആധിപത്യം പുലര്‍ത്തി. തൊട്ടുപിന്നാലെ ഫിന്‍ടെക്, സാമ്പത്തിക സേവനങ്ങള്‍, ഇന്‍ഷുറന്‍സ് മേഖലകള്‍(എട്ട് ശതമാനം), സേഫ്‌ഗോള്‍ഡ് (റാങ്ക് 9), റെസിക്കല്‍ (12), സഫെക്‌സ് പേ (21), സ്‌കേലര്‍ (22), സ്വമാന്‍ ഫിനാന്‍ഷ്യല്‍ സര്‍വീസസ് (26), എം2പി ഫിന്‍ടെക് (27), എയ്‌സ് ടെക്‌നോളജീസ് തുടങ്ങി നിരവധി ഇന്ത്യന്‍ കമ്പനികളും ആദ്യ 100 റാങ്കുകളില്‍ ഇടം നേടി.

2019ല്‍ കുറഞ്ഞത് 100,000 ഡോളര്‍ വരുമാനം നേടുക, 2022-ല്‍ ഒരു മില്യണ്‍ ഡോളറെങ്കിലും വരുമാനം നേടുക, 2019-നും 2022-നും ഇടയില്‍ പ്രാഥമികമായി ഓര്‍ഗാനിക് വരുമാന വളര്‍ച്ച പ്രകടമാക്കുക, നിര്‍ദ്ദിഷ്ട 13 പ്രദേശങ്ങളില്‍ ഒന്നില്‍ ആസ്ഥാനമായി പ്രവര്‍ത്തിക്കുക എന്നിവയാണ് റിപ്പോര്‍ട്ടില്‍ ഉള്‍പ്പെടുത്തുന്നതിനുള്ള മാനദണ്ഡം. ഓസ്‌ട്രേലിയ, ഹോങ്കോങ്, ഇന്ത്യ, ഇന്തോനേഷ്യ, ജപ്പാന്‍, മലേഷ്യ, ന്യൂസിലാന്‍ഡ്, ഫിലിപ്പീന്‍സ്, സിംഗപ്പൂര്‍, ദക്ഷിണ കൊറിയ, തായ്വാന്‍, തായ്‌ലന്‍ഡ്, വിയറ്റ്‌നാം എന്നിവയായിരുന്നു 13 പ്രദേശങ്ങള്‍.

അതിവേഗം വളരുന്ന പല കമ്പനികളും സാമ്പത്തിക വിശദാംശങ്ങള്‍ സ്വകാര്യമായി സൂക്ഷിക്കാന്‍ താല്‍പ്പര്യപ്പെടുന്നതിനാല്‍ റാങ്കിംഗ് സമഗ്രമായേക്കില്ലെന്ന് ഫിനാന്‍ഷ്യല്‍ ടൈംസ് വെളിപ്പെടുത്തി. കൂടാതെ, ഡാറ്റ പരിശോധിക്കുന്നതിലെ ബുദ്ധിമുട്ടുകള്‍ കാരണം ചൈനീസ് കമ്പനികളെ ഉള്‍പ്പെടുത്തിയിട്ടില്ല.