5,589 കോടി രൂപയ്ക്ക് മാന്‍കൈന്‍ഡ് ഫാര്‍മ ഓഹരികള്‍ വിറ്റ് ക്രിസ്‍കാപിറ്റലും കാപിറ്റല്‍ ഗ്രൂപ്പും

ഫാർമസ്യൂട്ടിക്കൽ കമ്പനിയായ മാൻകൈൻഡ് ഫാർമയിലെ മൊത്തം 7.6 ശതമാനം ഓഹരികൾ ക്രിസ്‌ക്യാപിറ്റലും ക്യാപിറ്റൽ ഗ്രൂപ്പും 5,589 കോടി രൂപയ്ക്ക് ഓപ്പൺ മാർക്കറ്റ് ഇടപാടുകളിലൂടെ വിറ്റഴിച്ചു. ചൊവ്വാഴ്ച നടന്ന ഓഹരി വിൽപ്പനയെത്തുടർന്ന്, മാൻകൈൻഡ് ഫാർമ ലിമിറ്റഡിന്റെ ഓഹരികൾ എൻഎസ്ഇയിൽ 3.65 ശതമാനം ഇടിഞ്ഞ് 1,850 രൂപയിലെത്തി. ബിഎസ്‌ഇയിൽ 3.61 ശതമാനം ഇടിഞ്ഞ് 1,849.45 രൂപയിലെത്തി.

ഇന്ന് ഉച്ചയ്ക്ക് 2.00 മണിക്കുള്ള വിവരം അനുസരിച്ച് മാന്‍കൈന്‍ഡ് ഫാര്‍മ ഓഹരികള്‍ 13.90 രൂപയുടെ നേട്ടത്തോടെ (0.75%) 1,867 രൂപയിലാണ് വില്‍പ്പന നടക്കുന്നത്.

പ്രൈവറ്റ് ഇക്വിറ്റി സ്ഥാപനമായ ക്രിസ്‌ക്യാപിറ്റലിന്റെ അഫിലിയേറ്റ് ആയ ബീജ് ലിമിറ്റഡ് 4.47 ശതമാനം ഓഹരികൾ വിറ്റഴിച്ചപ്പോൾ ക്യാപിറ്റൽ ഗ്രൂപ്പിന്റെ അഫിലിയേറ്റുകളായ കെയ്‌ൺഹിൽ സിഐപിഇഎഫ്, ഹേമ സിഐപിഇഎഫ് (ഐ) ലിമിറ്റഡ് എന്നിവ ചേര്‍ന്ന് 3.14 ശതമാനം ഓഹരികൾ വിറ്റു. ബൾക്ക് ഡീൽ ഡാറ്റ അനുസരിച്ച്, ബിഎസ്ഇയിലും എൻഎസ്ഇയിലും മാൻകൈൻഡ് ഫാർമയുടെ മൊത്തം 1,79,10,132 ഓഹരികൾ ബീജ് ലിമിറ്റഡ് വിറ്റഴിച്ചു, കെയർൺഹിൽ സിഐപിഇഎഫും ഹേമ സിഐപിഇഎഫ് (ഐ) ലിമിറ്റഡും എൻഎസ്ഇയിൽ കമ്പനിയുടെ 1,25,88,400 ഓഹരികൾ ഓഫ്ലോഡ് ചെയ്തു.

ഒരു ഓഹരിക്ക് 1,832.30-1,832.80 രൂപ നിരക്കിലായിരുന്നു വില്‍പ്പന.

ഇടപാടിന് ശേഷം, ബെയ്ജ് ലിമിറ്റഡിന്റെ ഓഹരി പങ്കാളിത്തം 7.46 ശതമാനത്തിൽ നിന്ന് 2.99 ശതമാനമായി കുറഞ്ഞപ്പോൾ ഹേമ സിഐപിഇഎഫ് (ഐ) ലിമിറ്റഡിന്‍റെ ഓഹരി പങ്കാളിത്തം 3.63 ശതമാനത്തിൽ നിന്ന് 2.23 ശതമാനമായി കുറഞ്ഞു. കൂടാതെ, കെയ്‌ൺഹിൽ സിഐപിഇഎഫ് തങ്ങളുടെ കൈവശം ഉണ്ടായിരുന്ന 1.74 ശതമാനം ഓഹരികളും വിറ്റഴിച്ച് സ്ഥാപനത്തിൽ നിന്ന് പുറത്തുപോകുകയും ചെയ്തു.

ബിഎസ്ഇയിൽ, മാൻകൈൻഡ് ഫാർമയുടെ 20.29 ലക്ഷം ഓഹരികൾ കൊട്ടക് ഫണ്ട്‌സ് ഇന്ത്യ മിഡ്‌ക്യാപ് ഫണ്ട് സ്വന്തമാക്കി. ഓഹരി ഒന്നിന് ശരാശരി 1,832.30 രൂപ നിരക്കിൽ നടന്ന ഡീലിന്‍റെ മൊത്തം വലുപ്പം 372 കോടി രൂപയാണ്.

1991-ൽ സ്ഥാപിതമായ, മാൻകൈൻഡ് ഫാർമ നിരവധി ഉപഭോക്തൃ ആരോഗ്യ സംരക്ഷണ ഉൽപ്പന്നങ്ങളും ഫാർമസ്യൂട്ടിക്കൽ ഫോർമുലേഷനുകളും വികസിപ്പിക്കുകയും നിർമ്മിക്കുകയും വിപണനം ചെയ്യുകയും ചെയ്യുന്നു.