ഐഡിബിഐ ബാങ്ക് മൂന്നാം പാദഫലം: അറ്റാദായത്തിൽ 57% വർദ്ധന

ഡിസംബർ 31 ന് അവസാനിച്ച മൂന്നാം പാദത്തിൽ ഐഡിബിഐ ബാങ്കിൻ്റെ അറ്റാദായം 57 ശതമാനം വർധിച്ച് 1,458 കോടി രൂപയായി. എൽഐസിയുടെ നിയന്ത്രണത്തിലുള്ള ബാങ്കിന് 2022 ഒക്ടോബർ-ഡിസംബർ പാദത്തിൽ 927 കോടി രൂപയായിരുന്നു അറ്റാദായം.

ബാങ്കിന്റെ പലിശ വരുമാനം കഴിഞ്ഞ സാമ്പത്തിക വർഷം ഇതേ കാലയളവിലെ 5,231 കോടി രൂപയിൽ നിന്ന് 6,541 കോടി രൂപയായി മെച്ചപ്പെട്ടു. മൊത്ത നിഷ്‌ക്രിയ ആസ്തി (എൻപിഎ) അനുപാതം 2022 ഡിസംബർ 31ലെ 13.82 ശതമാനത്തിൽ നിന്ന് 2023 ഡിസംബർ 31ന് 4.69 ശതമാനമായി മെച്ചപ്പെട്ടിട്ടുണ്ട്.

അറ്റ എൻപിഎ 2022 ഡിസംബർ അവസാനത്തെ 1.08 ശതമാനത്തിൽ നിന്ന് 0.34 ശതമാനമായി കുറഞ്ഞു. അതിൻ്റെ ഫലമായി പ്രൊവിഷനിംഗും അടിയന്തര ആവശ്യങ്ങൾക്കുള്ള ഫണ്ടും കഴിഞ്ഞ സാമ്പത്തിക വർഷത്തെ ഇതേ പാദത്തിലെ 784 കോടി രൂപയിൽ നിന്ന് 320 കോടിയായി കുറഞ്ഞു.

ത്രൈമാസത്തിൽ ബാങ്കിന്റെ മൂലധന പര്യാപ്തത അനുപാതം 2022 ഡിസംബർ അവസാനത്തെ 20.14 ശതമാനവുമായി താരതമ്യം ചെയ്യുമ്പോൾ 20.32 ശതമാനമായി മെച്ചപ്പെട്ടു.

ഡിസംബർ പാദത്തിൽ ബാങ്ക് മൂലധനം സമാഹരിച്ചിട്ടില്ലെന്നും നേരത്തെ ലഭിച്ച ഫണ്ടുകൾ പൂർണമായും വിനിയോഗിച്ചിട്ടുണ്ടെന്നും ബാങ്ക് പറയുന്നു.

ഐഡിബിഐ ബാങ്കിന്റെ 45 ശതമാനത്തിലധികം ഓഹരികൾ കൈവശമുള്ള സർക്കാർ, ബാങ്കിലെ അതിന്റെ ഓഹരികൾ വിൽക്കാൻ പദ്ധതിയിടുന്നു, അടുത്ത സാമ്പത്തിക വർഷം ഓഹരി വിറ്റഴിക്കലിന് വേഗത കൈവരിക്കാനാകും.