അദാനി ഗ്രൂപ്പിന്‍റെ നികുതിക്ക് മുമ്പുള്ള ലാഭത്തില്‍ 42% ഉയര്‍ച്ച

ഗൗതം അദാനിയുടെ നേതൃത്വത്തിലുള്ള അദാനി ഗ്രൂപ്പ് 2023 -24 ആദ്യപാദത്തില്‍ നികുതിക്ക് മുമ്പുള്ള ലാഭത്തിൽ 42 ശതമാനം വാർഷിക വളർച്ച കൈവരിച്ചു, വിമാനത്താവളങ്ങൾ, വൈദ്യുതി, തുറമുഖങ്ങൾ എന്നിങ്ങനെ ഗ്രൂപ്പിന്‍റെ പ്രമുഖ ബിസിനസുകളെല്ലാം ശ്രദ്ധേയമായ വളർച്ച രേഖപ്പെടുത്തി. ഏപ്രിൽ-ജൂൺ മാസങ്ങളിൽ എക്കാലത്തെയും ഉയർന്ന എബിറ്റ്ഡ ആയ 23,532 കോടി രൂപയാണ് രേഖപ്പെടുത്തിയത്. 2018 -19 മൊത്തം സാമ്പത്തിക വര്‍ഷത്തില്‍ രേഖപ്പെടുത്തിയ 24,780 കോടി രൂപയുടെ എബിറ്റ്ഡയ്ക്ക് ഏതാണ്ട് തുല്യമാണ് ഇതെന്ന് അദാനി ഗ്രൂപ്പ് പ്രസ്താവനയിൽ പറഞ്ഞു.

അദാനി എന്റർപ്രൈസസ് ലിമിറ്റഡ് . അദാനി പോർട്ട്സ് & സെസ് ലിമിറ്റഡ്, അദാനി ഗ്രീൻ എനർജി ലിമിറ്റഡ്, അദാനി പവർ ലിമിറ്റഡ്, അദാനി എനർജി സൊല്യൂഷൻസ്, അദാനി ടോട്ടൽ ഗ്യാസ് ലിമിറ്റഡ് തുടങ്ങിയ 10 ലിസ്‌റ്റഡ് കമ്പനികൾ സ്വന്തമായുള്ള ഗ്രൂപ്പിന് 42,115 കോടി രൂപ ക്യാഷ് ബാലൻസ് കണക്കാക്കിയതിന് ശേഷം 18,689.7 കോടി രൂപയുടെ അറ്റ ​​കടം ഉണ്ട്. ഇൻഫ്രാസ്ട്രക്ചര്‍, യൂട്ടിലിറ്റി പ്ലാറ്റ്‌ഫോമുകള്‍ ചേര്‍ന്ന് 20,233 കോടി രൂപയുടെ എബിറ്റ്ഡ സൃഷ്ടിച്ചു.

ഈ വർഷം ജനുവരി 24-ന് പുറത്തിറങ്ങിയ ഹിൻഡൻബർഗ് റിപ്പോർട്ടിലെ ആരോപണങ്ങള്‍ നല്‍കിയ തിരിച്ചടികളുടെ ആഘാതം കുറയ്ക്കാന്‍ പ്രവര്‍ത്തന പ്രകടനത്തില്‍ കമ്പനി ശ്രദ്ധ കേന്ദ്രീകരിക്കുകയാണ്. അക്കൗണ്ടിംഗ് തട്ടിപ്പ്, സ്റ്റോക്ക് പ്രൈസ് കൃത്രിമം, നികുതി സങ്കേതങ്ങളുടെ അനുചിതമായ ഉപയോഗം തുടങ്ങിയ ആരോപണങ്ങളെ തുടര്‍ന്ന് 150 ബില്യൺ ഡോളറിനടുത്ത് ഇടിവ് വിപണിമൂല്യത്തില്‍ കമ്പനി നേരിട്ടിരുന്നു.

പുതിയ പദ്ധതിനീക്കങ്ങള്‍ പുനഃപരിശോധിക്കുക, ഏറ്റെടുക്കലുകൾ ഒഴിവാക്കുക, പണമൊഴുക്കിനെയും കടമെടുക്കലിനെയും കുറിച്ചുള്ള ആശങ്കകൾ പരിഹരിക്കുന്നതിന് കടം മുൻകൂറായി അടയ്ക്കുക, പുതിയ പ്രോജക്റ്റുകൾക്കുള്ള ചെലവുകളുടെ വേഗത കുറയ്ക്കൽ എന്നിവയെല്ലാം വിശ്വാസ്യത നേടി തിരിച്ചുവരാനുള്ള കമ്പനിയുടെ തന്ത്രങ്ങളില്‍ ഉള്‍പ്പെടുന്നു.

ലിസ്റ്റുചെയ്ത 10 കമ്പനികളിൽ അഞ്ചെണ്ണത്തിന്റെ ഓഹരികൾ പ്രൊമോട്ടർമാർ ജിക്യൂജി പാർട്‌ണേഴ്‌സ് പോലുള്ള നിക്ഷേപകർക്ക് വിറ്റു. ഇത് ചില നഷ്ടങ്ങൾ വീണ്ടെടുക്കാൻ ഗ്രൂപ്പിന്‍റെ ഓഹരികളെ സഹായിച്ചു.