ജോലി ചെയ്യുന്ന സ്ത്രീകള്‍ക്ക് മികച്ച നഗരം ബെംഗളൂരു; ചെന്നൈ രണ്ടാമത്

സ്ത്രീകളെ സാമൂഹികമായും വ്യാവസായികമായും അംഗീകരിക്കുന്നതില്‍ മികവ് പുലര്‍ത്തുന്ന ഇന്ത്യയിലെ ഏറ്റവും മികച്ച മൂന്ന് നഗരങ്ങളില്‍ ഒന്നായി ചെന്നൈ മാറിയതായി പഠനം. തമിഴ്നാട്ടില്‍ നിന്നുള്ള എട്ട് നഗരങ്ങള്‍ പട്ടികയില്‍ ഇടംപിടിച്ചിട്ടുണ്ട്. ജോലിചെയ്യുന്ന സ്ത്രീകള്‍ക്ക് സുരക്ഷിതവും സുസ്ഥിരവുമായ നഗരമെന്ന നിലയില്‍ ചെന്നൈ രണ്ടാമതാണ്.

ജോലി ചെയ്യുന്ന സ്ത്രീകള്‍ക്ക് രാജ്യത്തെ ഏറ്റവും മികച്ച നഗരമെന്ന നിലയില്‍ ബെംഗളൂരുവാണ് ഒന്നാം സ്ഥാനത്തെത്തിയത്.

സ്ത്രീകളുടെ സുരക്ഷയില്‍ തിരുവനന്തപുരം, മുംബൈ, ഹൈദരാബാദ് എന്നിവ ഒന്നാം സ്ഥാനത്തും ബെംഗളൂരു, കൊച്ചി, ഗുരുഗ്രാം എന്നിവ സുരക്ഷിതത്വത്തില്‍ താരതമ്യേന പിന്നിലാണെന്നും റിപ്പോര്‍ട്ട് വെളിപ്പെടുത്തുന്നു.

അവതാര്‍ ഗ്രൂപ്പിന്റെ ഇന്ത്യയിലെ സ്ത്രീകള്‍ക്കായുള്ള മികച്ച നഗരങ്ങള്‍ 2024 റിപ്പോര്‍ട്ട് പ്രകാരം, ദക്ഷിണേന്ത്യ ഏറ്റവും ജെന്‍ഡര്‍ ഇന്‍ക്ലൂസീവ് ആയ മേഖലയായി ഉയര്‍ന്നു. ദക്ഷിണേന്ത്യയിലെ 16 നഗരങ്ങളാണ് ആദ്യ 25-ല്‍ ഇടംപിടിച്ചത്.

ജോലി ചെയ്യുന്ന സ്ത്രീകള്‍ക്ക് സുരക്ഷിതമായ നഗരം നിലയില്‍ ചെന്നൈ രണ്ടാം സ്ഥാനത്താണെന്നും കോയമ്പത്തൂര്‍, തിരുച്ചിറപ്പള്ളി, വെല്ലൂര്‍, മധുര, സേലം, ഈറോഡ്, തിരുപ്പൂര്‍ എന്നിവിടങ്ങളും സര്‍വ്വേ ഫലങ്ങളില്‍ ആധിപത്യം പുലര്‍ത്തിയെന്നും അവതാര്‍ ഗ്രൂപ്പ് സ്ഥാപക-പ്രസിഡന്റ് സൗന്ദര്യ രാജേഷ് പറഞ്ഞു.

'നഗരങ്ങള്‍ അവസരങ്ങളുടെ അടിത്തറയാണ്. സ്ത്രീകള്‍ എങ്ങനെ ജോലി ചെയ്യുകയും അഭിവൃദ്ധി പ്രാപിക്കുകയും ചെയ്യുന്നു എന്ന് അവ രൂപപ്പെടുത്തുന്നു. നമ്മുടെ നഗരങ്ങളുടെ അടിസ്ഥാന തത്വങ്ങളെയും സാംസ്‌കാരിക ഘടനയെയും കുറിച്ചുള്ള വ്യക്തമായ ധാരണ സ്ത്രീകളുടെ പുരോഗതിക്കും ഉള്‍പ്പെടുത്തലിനും നിര്‍ണായകമാണ്.', കണ്ടെത്തലുകളില്‍ സൗന്ദര്യ രാജേഷ് പറഞ്ഞു.

'2047-ഓടെ വികസിത ഭാരതം എന്ന സ്വപ്നം സാക്ഷാത്കരിക്കുന്നതിന്, പുരുഷന്മാര്‍ക്ക് തുല്യമായി വിജയിക്കാന്‍ ഞങ്ങള്‍ക്ക് വനിതാ പ്രൊഫഷണലുകള്‍ ആവശ്യമാണ്. നഗരങ്ങള്‍ യഥാര്‍ത്ഥത്തില്‍ ലിംഗഭേദം ഉള്‍ക്കൊള്ളുകയും സ്ത്രീകളുടെ ശക്തികള്‍ ഒപ്റ്റിമൈസ് ചെയ്യാന്‍ കഴിയുന്ന അന്തരീക്ഷം പ്രദാനം ചെയ്യുകയും ചെയ്താല്‍ മാത്രമേ ഇത് സാധ്യമാകൂ,' അവര്‍ കൂട്ടിച്ചേര്‍ത്തു. സര്‍വേയില്‍ 60 നഗരങ്ങളില്‍ നിന്നുള്ള സ്ത്രീകള്‍ പങ്കെടുത്തു.

2024-ലെ സ്ത്രീകള്‍ക്കായുള്ള മികച്ച 10 നഗരങ്ങളില്‍ ബെംഗളൂരു, ചെന്നൈ, മുംബൈ, ഹൈദരാബാദ്, ഡല്‍ഹി, കോയമ്പത്തൂര്‍ എന്നിവ ഉള്‍പ്പെടുന്നു. അവതാര്‍ ഗ്രൂപ്പിന്റെ ഗവേഷണത്തിന്റെയും നിലവിലുള്ള സര്‍ക്കാര്‍ ഡാറ്റയുടെയും അടിസ്ഥാനത്തിലാണ് ഓരോ നഗരങ്ങളെയും റാങ്ക് ചെയ്തത്.

സംസ്ഥാനങ്ങളില്‍ ഏറ്റവും ഉയര്‍ന്ന ഇന്‍ക്ലൂഷന്‍ സ്‌കോറായ 20.89 ആയി കേരളം മുന്നിലും തെലങ്കാന 20.57, മഹാരാഷ്ട്ര 19.93, തമിഴ്നാട് 19.38, കര്‍ണാടക 17.50 എന്നിവ തൊട്ടുപിറകിലുമാണ്.

നൈപുണ്യവും സ്ത്രീകള്‍ക്ക് തൊഴില്‍ വാഗ്ദാനം ചെയ്യുന്ന നഗരങ്ങളും അടിസ്ഥാനമാക്കി, ഗുരുഗ്രാം ഒന്നാം സ്ഥാനത്തെത്തി. മുംബൈ, ബെംഗളൂരു, ചെന്നൈ, ഹൈദരാബാദ്, തിരുവനന്തപുരം എന്നിവ നേരിയ തോതില്‍ പിന്നിലാണെന്ന് റിപ്പോര്‍ട്ട് പറയുന്നു.

സര്‍ക്കാര്‍ സ്ഥാപനങ്ങളുടെ കാര്യക്ഷമതയില്‍ തിരുവനന്തപുരം ഒന്നാം സ്ഥാനത്തും പൂനെ രണ്ടാം സ്ഥാനത്തുമാണ്.