image

13 May 2023 4:15 AM

Business

കാര്യക്ഷമത ഉറപ്പാക്കാന്‍ സപ്ലൈകോ; ഇആര്‍പി, ഇ-ഓഫീസ് സംവിധാനങ്ങളുടെ ഉദ്ഘാടനം തിങ്കളാഴ്ച

Kochi Bureau

കാര്യക്ഷമത ഉറപ്പാക്കാന്‍ സപ്ലൈകോ; ഇആര്‍പി, ഇ-ഓഫീസ് സംവിധാനങ്ങളുടെ ഉദ്ഘാടനം തിങ്കളാഴ്ച
X

Summary

  • ഭക്ഷ്യ പൊതുവിതരണ ഉപഭോക്തൃകാര്യ മന്ത്രി അഡ്വ. ജിആര്‍ അനില്‍ പരിപാടി ഉദ്ഘാടനം ചെയ്യും.


പൊതു വിതരണ മേഖലയിലെ സേവനങ്ങള്‍ കാര്യക്ഷമവും സുതാര്യവുമാക്കാന്‍ ലക്ഷ്യമിട്ടുള്ള സപ്ലൈകോയുടെ എന്റര്‍പ്രൈസ് റിസോഴ്സ് പ്ലാനിംഗ് (ഇ.ആര്‍.പി), ഇ-ഓഫീസ് സംവിധാനങ്ങളുടെ ഉദ്ഘാടനം തിങ്കളാഴ്ച്ച. ഭക്ഷ്യ പൊതുവിതരണ ഉപഭോക്തൃകാര്യ മന്ത്രി അഡ്വ. ജിആര്‍ അനില്‍ തിങ്കള്‍ രാവിലെ 9.30ന് സപ്ലൈകോയുടെ കടവന്ത്ര കേന്ദ്ര കാര്യാലയത്തില്‍ പരിപാടി ഉദ്ഘാടനം ചെയ്യും.

സപ്ലൈകോയുടെ 1630 ലധികം വില്‍പ്പനശാലകള്‍, 56 ഡിപ്പോകള്‍, അഞ്ചു മേഖലാ ഓഫീസുകള്‍ എന്നിവയെ സമഗ്ര രൂപരേഖയുടെ അടിസ്ഥാനത്തില്‍ കമ്പ്യൂട്ടര്‍ നെറ്റ് വര്‍ക്കിലൂടെ ബന്ധിപ്പിച്ചാണ് ഇആര്‍പി സംവിധാനം നടപ്പാക്കുന്നത്.

കൃത്യമായ ഏകോപനവും ഡാറ്റാ സുരക്ഷയും ഉറപ്പാക്കുന്ന ഇആര്‍പിയിലൂടെ വിതരണ ശൃംഖലയുടെ ഏകോപനം സുഗമമാക്കാന്‍ സാധിക്കുന്നതാണ്. അതിലൂടെ ഉപഭോക്താക്കള്‍ക്ക് മികച്ച സേവനം ലഭ്യമാക്കുന്നതിനും ഉപകരിക്കും. സ്റ്റോക്ക്, വില്‍പ്പന, വരുമാനം തുടങ്ങിയവ സംബന്ധിച്ച വിവരങ്ങള്‍ വില്‍പ്പനശാലകളിലെ കമ്പ്യൂട്ടറുകളില്‍ തന്നെയാണ് നിലവില്‍ സൂക്ഷിക്കുന്നത്. ഈ വിവരങ്ങള്‍ തത്സമയം ലഭ്യമല്ലാത്തത് അവശ്യ സാഹചര്യങ്ങളില്‍ അടിയന്തര ഇടപെടലുകള്‍ നടത്തുന്നതിന് തടസമാകുന്നുണ്ട്. ഈ സ്ഥിതിയില്‍ മാറ്റമുണ്ടാക്കുന്നതിനും പുതിയ സംവിധാനം സഹായകമാകും.

വിവിധ ആവശ്യങ്ങള്‍ക്കായി 30 ഓളം സോഫ്റ്റ് വെയറുകള്‍ ഉപയോഗിക്കുന്ന നിലവിലെ സ്ഥിതിക്കും ഇതോടെ മാറ്റമാകും. കേന്ദ്ര കാര്യാലയത്തിലെ ഫയല്‍ നീക്കം ഡിജിറ്റല്‍ പ്ലാറ്റ്ഫോമിലേക്ക് മാറ്റി ഇ-ഓഫീസ് ഏര്‍പ്പെടുത്തുന്നതിലൂടെ പ്രവര്‍ത്തനത്തില്‍ സമ്പൂര്‍ണ സുതാര്യത ഉറപ്പാക്കാന്‍ കഴിയും.

ഉദ്ഘാടന ചടങ്ങില്‍ ടി ജെ വിനോദ് എംഎല്‍എ അധ്യക്ഷത വഹിക്കും. മേയര്‍ എം അനില്‍കുമാര്‍, ഹൈബി ഈഡന്‍ എംപി എന്നിവര്‍ വിശിഷ്ടാതിഥികളാവും. ഭക്ഷ്യ പൊതുവിതരണ വകുപ്പ് സെക്രട്ടറി പി.എം. അലി അസ്ഗര്‍ പാഷ മുഖ്യപ്രഭാഷണം നടത്തും. സപ്ലൈകോ ചെയര്‍മാനും മാനേജിംഗ് ഡയറക്ടറുമായ ഡോ. ശ്രീറാം വെങ്കിട്ടരാമന്‍ സംസാരിക്കും.

നഗരസഭ കൗണ്‍സിലര്‍ ബിന്ദു ശിവന്‍, രാഷ്ട്രീയ പാര്‍ട്ടികളുടെയും സംഘടനകളുടെയും പ്രതിനിധികളായ കെ എം ദിനകരന്‍, മുഹമ്മദ് ഷിയാസ്, മണി സി, ബാബു ജോസഫ്, കെ.എ. അബ്ദുള്‍ മജീദ്, കെ.എസ്. ഷൈജു, പി. രാജു, എന്‍.എ. മണി, ആര്‍. വിജയകുമാര്‍, ടി. നസറുദ്ദീന്‍, അനില്‍കുമാര്‍ എസ്, സതീഷ് കുമാര്‍ ആര്‍ വി, ഷിജു കെ. തങ്കച്ചന്‍, ജില്ലാ സപ്ലൈ ഓഫീസര്‍ ബി ജയശ്രീ, സപ്ലൈകോ അഡീഷണല്‍ ജനറല്‍ മാനേജര്‍മാരായ പി.ടി സൂരജ്, ആര്‍.എന്‍. സതീഷ്, ഷീബ ജോര്‍ജ്, സപ്ലൈകോ ജീവനക്കാര്‍ തുടങ്ങിയവര്‍ പങ്കെടുക്കും.