വാക്ക് പാലിച്ചു; ഇനി വിയറ്റ്‌നാമിനും കൊച്ചിക്കുമിടയില്‍ ഒരു പറക്കല്‍ ദൂരം മാത്രം

വിയറ്റ്‌നാമിലെ ഹോചിമിന്‍ സിറ്റിയേയും കൊച്ചിയേയും കൂട്ടിയിണക്കുന്ന വിയറ്റ്‌ജെറ്റ് സര്‍വീസുകള്‍ ഔദ്യോഗികമായി പ്രഖ്യാപിച്ചു. വരുന്ന ആഗസ്റ്റ് 12 ന് സര്‍വീസ് ആരംഭിക്കും. കേരളത്തിനും വിയറ്റ്‌നാമിനും ഇടയിലുള്ള ആദ്യത്തെ നേരിട്ടുള്ള വിമാനം കൊച്ചി വിമാനത്താവളത്തില്‍ നിന്നായിരിക്കും സര്‍വീസ് നടത്തുക.

ഓണക്കാലം മുന്‍ നിര്‍ത്തിയുള്ള ഈ നീക്കം വിനോദ സഞ്ചാരത്തിന്റേയും വികസനത്തിലെ പ്രധാന നാഴികക്കല്ലാവുകയാണ്. ഇരുരാജ്യങ്ങളും തമ്മിലുള്ള വിനോദ സഞ്ചാരം, സാമ്പത്തിക-വ്യാപാര ബന്ധങ്ങള്‍, ഉഭയകക്ഷി ബന്ധങ്ങള്‍ തുടങ്ങിയവ പ്രോല്‍സാഹിപ്പിക്കാനും ഇതു സഹായകമാകും. സര്‍വീസ് യാഥാര്‍ത്ഥ്യമാകുന്നതോടെ ഇന്ത്യക്കും വിയറ്റ്‌നാമിനുമിടയില്‍ ആഴ്ചയില്‍ 32 വിമാന സര്‍വീസുകളുണ്ടാകും.

തിങ്കള്‍, ബുധന്‍, വെള്ളി, ശനി ദിവസങ്ങളിലായി പ്രതിവാരം നാലു വിമാനങ്ങളാവും കൊച്ചിക്കും ഹോചിമിന്‍ സിറ്റിക്കും ഇടയില്‍ ഉണ്ടാകുക. കൊച്ചിയില്‍ നിന്നു രാത്രി 11.50 ന് പുറപ്പെടുന്ന വിമാന ഹോചിമിന്‍ സിറ്റിയില്‍ പിറ്റേദിവസം രാവിലെ വെളുപ്പിന് 06.40 നാവും എത്തിച്ചേരുക. തിരിച്ചുള്ള വിമാനങ്ങള്‍ ഹോചിമിന്‍ സിറ്റിയില്‍ നിന്ന് 19.20-ന് പുറപ്പെട്ട് കൊച്ചിയില്‍ 22.50-ന് എത്തിച്ചേരും. ഇതിനു പുറമെ ഇന്ത്യക്കാര്‍ക്ക് മുംബൈ, ഡെല്‍ഹി, അഹമ്മദാബാദ് എന്നിവിടങ്ങളില്‍ നിന്നു ഹാനോയി, ഹോചിമിന്‍ സിറ്റി എന്നിവിടങ്ങളിലേക്കുള്ള വിയറ്റ്‌ജെറ്റ് വിമാനങ്ങളിലും വിയറ്റ്‌നാമിലേക്കു പോകാം.

ഈ വര്‍ഷം കടന്നു പോയ ആദ്യ അഞ്ചു മാസങ്ങളില്‍ ഇന്ത്യയില്‍ നിന്നു 1,41,000 സഞ്ചാരികളാണ് വിയറ്റ്‌നാമിലെത്തിയത്. ഇത് ഒരു വര്‍ഷം അഞ്ചു ലക്ഷമെത്തുമെന്നാണ് പ്രതീക്ഷിക്കുന്നത്. 2022ല്‍ ഇന്ത്യയില്‍ നിന്നുള്ള വിയറ്റ്‌നാം സന്ദര്‍ശകരുടെ എണ്ണം ഗണ്യമായി വര്‍ധിച്ച് 1,37,900-ത്തില്‍ എത്തി. വിയറ്റ്‌നാം സന്ദര്‍ശിക്കുന്ന ആദ്യ പത്തു വിപണികളില്‍ ഒന്‍പതാം സ്ഥാനത്ത് കേരളം എത്തുകയും ചെയ്തു. വിയറ്റ്‌ജെറ്റിന്റെ പുതിയ റൂട്ട് ഈ വര്‍ഷം ഇന്ത്യയുടെ ദക്ഷിണ മേഖലകളില്‍ നിന്നു 10,000 കൂടുതല്‍ യാത്രക്കാരെ വിയറ്റ്‌നാമിലെത്തിക്കും എന്നാണു പ്രതീക്ഷിക്കുന്നത്. 31 അന്താരാഷ്ട്ര കേന്ദ്രങ്ങളിലേക്കാണ് കൊച്ചി അന്താരാഷ്ട്ര വിമാനത്താവളത്തില്‍ നിന്നും സര്‍വീസുകളുള്ളത്.

കൊച്ചിയേയും ഹോചിമിന്‍ സിറ്റിയേയും ബന്ധിപ്പിച്ചുള്ള റൂട്ടിനു തുടക്കം കുറിക്കുന്നത് സാമ്പത്തിക, വ്യാപാര, വിനോദ സഞ്ചാര സഹകരണങ്ങള്‍ക്കാണ്. മാത്രമല്ല വിയറ്റ്‌നാമിനും ദക്ഷിണേന്ത്യയ്ക്കും ഇടയിലുള്ള ജനങ്ങളുടെ യാത്രയ്ക്കും പുതിയ പ്രേരകശക്തിയാകുമെന്ന് പരിപാടിയില്‍ സംസാരിക്കവെ ഇന്ത്യയിലെ വിയറ്റ്‌നാം അംബാസിഡര്‍ ന്യൂയെന്‍ തങ് ഹായ് വ്യക്തമാക്കി

വിയറ്റ്‌നാമിന്റേയും ഹോചിമിന്‍ സിറ്റിയുടെയും ഭൂമിശാസ്ത്രപരമായ പ്രത്യേകതകള്‍ മൂലം സന്ദര്‍ശകര്‍ക്ക് വിയറ്റ്‌നാമിലെ ടൂറിസ്റ്റ് കേന്ദ്രങ്ങളിലും മറ്റ് രാജ്യങ്ങളിലെ ടൂറിസ്റ്റ് കേന്ദ്രങ്ങളിലും ഏറെ സൗകര്യപ്രദമാണെന്ന് അദ്ദേഹം കൂട്ടിച്ചേര്‍ത്തു. ഇന്ത്യയിലെ മധ്യനിര പട്ടണങ്ങളും വിയറ്റ്‌നാമും തമ്മിലുള്ള യാത്രാബന്ധത്തിനു തുടക്കം കുറിച്ച, ഇരു രാജ്യങ്ങള്‍ക്കുമിടയില്‍ ഏറ്റവും കൂടുതല്‍ വിമാന സര്‍വീസുകള്‍ നടത്തുന്ന വിയറ്റ്‌ജെറ്റിനെ അദ്ദേഹം അഭിനന്ദിക്കുകയും ചെയ്തു.

ഇന്ത്യയേയും വിയറ്റ്‌നാമിനേയും ബന്ധിപ്പിക്കുന്ന എയര്‍ലൈന്‍ എന്ന നിലയില്‍ വിയറ്റ്‌ജെറ്റിന്റെ ഈ പുതിയ റൂട്ട് ഇരു രാജ്യങ്ങള്‍ക്കും ഇടയിലുള്ള യാത്രാസൗകര്യം വര്‍ധിപ്പിക്കുമെന്ന് ചടങ്ങില്‍ വിയറ്റ്‌ജെറ്റ് വൈസ് പ്രസിഡന്റ് ഓഫ് കോമേഴ്‌സ് ജെയ് എല്‍ ലിംഗേശ്വര പറഞ്ഞു. വിപുലമായ ഉത്പന്നങ്ങളും സേവനങ്ങളും മല്‍സരാധിഷ്ഠിതവും ന്യായവുമായ നിരക്കുകളില്‍ ലഭ്യമാക്കി കേരളത്തിലേയും ഇന്ത്യയിലേയും വിയറ്റ്‌നാമിലേയും വിനോദ സഞ്ചാര മേഖലയ്ക്ക് ഗണ്യമായ സംഭാവനയായിരിക്കും വിയറ്റ്‌ജെറ്റ് നല്‍കുകയെന്നും അദ്ദേഹം പറഞ്ഞു.

ഈ അവസരത്തില്‍ വിയറ്റ്‌ജെറ്റിന്റെ സിഗ്നേചര്‍ മെഗാ സെയില്‍ പ്രമോഷന്‍ അവതരിപ്പിച്ചു കൊണ്ട് ബുധന്‍, വ്യാഴം, വെള്ളി ദിവസങ്ങളില്‍ നിബന്ധനകള്‍ക്ക് വിധേയമായി 5555 രൂപ മുതലുള്ള ഒരു ഭാഗത്തേക്കുള്ള നിരക്കും ബിസനസ്, സ്‌കൈബോസ് ടിക്കറ്റുകള്‍ക്കുള്ള ഡിസ്‌കൗണ്ടഡ് നിരക്കും അവതരിപ്പിച്ചിട്ടുണ്ട്. വിശദ വിവരങ്ങള്‍ www.vietjetair.com ല്‍ ലഭ്യമാണ്.

പേള്‍ ഓഫ് ദി ഫാര്‍ ഈസ്റ്റ് എന്ന് അറിയപ്പെടുന്ന ഹോചിമിന്‍ സിറ്റിക്ക് 300ലേറെ വര്‍ഷങ്ങളുടെ ചരിത്രമുണ്ട്. സോളോ, കപ്പിള്‍, ഫാമിലി വിഭാഗങ്ങളിലായുള്ള യാത്രക്കാരുടെ കാര്യത്തില്‍ ഏഷ്യയിലെ ഏറ്റവും ജനപ്രിയമായ വിനോദ സഞ്ചാര കേന്ദ്രങ്ങളില്‍ ഒന്നു കൂടിയാണ് ഹോചിമിന്‍ സിറ്റി. എയര്‍ലൈനിന്റെ വിപുലമായ വിമാനങ്ങളും സൗകര്യപ്രദമായ സമയവും വഴി യാത്രക്കാര്‍ക്ക് വിയറ്റ്‌നാമിലെ നഗരങ്ങളും പ്രസിദ്ധമായ തീരപ്രദേശങ്ങളും ആസ്വദിക്കാനാവും.

സംസ്ഥാന സര്‍ക്കാരിന്റെ ഓഫീസര്‍ ഓണ്‍ സ്പെഷ്യല്‍ ഡ്യൂട്ടിയും മുന്‍ അംബാസിഡറുമായ വേണു രാജാമണി, കൊച്ചി അന്താരാഷ്ട്ര വിമാനത്താവളം പ്രതിനിധി മനു എന്നിവര്‍ വാര്‍ത്താ സമ്മേളനത്തില്‍ പങ്കെടുത്തു.