എംഎസ്എംഇ മേഖലയ്ക്കുള്ള ക്രെഡിറ്റ് ഗ്യാരണ്ടി കവര്‍ വര്‍ധിപ്പിക്കും

ഇന്ത്യയിലെ സൂക്ഷ്മ, ചെറുകിട, ഇടത്തരം സംരംഭങ്ങള്‍ക്ക് (എംഎസ്എംഇ) സന്തോഷവാര്‍ത്തയുമായി കേന്ദ്ര ധനമന്ത്രി നിര്‍മല സീതാരാമന്‍. മേഖലയ്ക്കുള്ള ക്രെഡിറ്റ് ഗ്യാരണ്ടി കവര്‍ വര്‍ധിപ്പിക്കുമെന്ന് ധനമന്ത്രി പ്രഖ്യാപിച്ചു. കൂടാതെ, മൈക്രോ എന്റര്‍പ്രൈസസിന് അതായത് എംഎസ്എംഇകള്‍ക്ക് ക്രെഡിറ്റ് ഗ്യാരണ്ടി കവര്‍ 5 കോടി രൂപയില്‍ നിന്ന് 10 കോടി രൂപയാക്കും. ഇത് അടുത്ത 5 വര്‍ഷത്തിനുള്ളില്‍ 1.5 ലക്ഷം കോടി രൂപയുടെ അധിക വായ്പയിലേക്ക് നയിക്കും.

ചെറുകിട ബിസിനസുകള്‍ക്കായി 5 ലക്ഷം രൂപ പരിധിയുള്ള ഇഷ്ടാനുസൃത ക്രെഡിറ്റ് കാര്‍ഡുകള്‍ നല്‍കുകയും ചെയ്യും. അതിനായി ബിസിനസുകള്‍ 'ഉദ്യം പോര്‍ട്ടലില്‍' രജിസ്റ്റര്‍ ചെയ്യേണ്ടതുണ്ട്. 2025 ലെ യൂണിയന്‍ ബജറ്റിലെ ഈ നടപടികള്‍ക്കുള്ള ക്രെഡിറ്റ് കവര്‍ വളരെയധികം വര്‍ധിപ്പിക്കുമെന്ന് പ്രതീക്ഷിക്കുന്നു.

27 മേഖലകളിലെ വായ്പകള്‍ക്ക് ഗ്യാരണ്ടി ഫീസ് ഒരു ശതമാനമായി കുറയ്ക്കും. സൂക്ഷ്മ, ചെറുകിട, ഇടത്തരം മേഖലയ്ക്കുള്ള പ്രോല്‍സാഹനം രാജ്യത്തെ തൊഴില്‍ ശക്തി വര്‍ധിപ്പിക്കുമെന്നും മന്ത്രി വ്യക്തമാക്കി. ഒപ്പം ഉല്‍പ്പാദന മേഖലയില്‍ നിന്ന് സമ്പദ് വ്യവസ്ഥയിലേക്കുള്ള സംഭാവന ഉയര്‍ത്തുന്നതും ലക്ഷ്യം വയ്ക്കുന്നു.

സൂക്ഷ്മ സംരംഭ മേഖലയില്‍ നിന്ന് പുതുതായി 10 ലക്ഷം ഉല്‍പ്പന്നങ്ങള്‍ വിപണിയില്‍ എത്തിക്കും. ഇവിടെ 22 ലക്ഷം പേര്‍ക്ക് തൊഴില്‍ സൃഷ്ടിക്കപ്പെടും. മേഖലയിലെ കയറ്റുമതി ഉയരും. 4 ലക്ഷം കോടിയുടെ വിറ്റുവരവ് മേഖലിയില്‍ നിന്നുണ്ടാവുമെന്നും ധനമന്ത്രി വ്യക്തമാക്കി. പാദരക്ഷ, തുകല്‍ തുടങ്ങിയ മേഖലകളിലെ മുന്നേറ്റമാണ് സര്‍ക്കാര്‍ പ്രധാനമായും ശ്രദ്ധ നല്‍കുന്നത്.