'സ്വാമി അയ്യപ്പൻ, സന്നിധാനം പി.ഒ, 689713 ' സ്വന്തമായി പിന്‍കോഡുള്ള ശബരിമല അയ്യപ്പൻ

മണ്ഡല- മകരവിളക്ക് കാലത്തും വിഷുവിനും മാത്രം പ്രവർത്തിക്കുന്ന സന്നിധാനത്തെ പോസ്റ്റ് ഓഫീസ് പ്രവർത്തനം തുടങ്ങിയിട്ട് 50 വർഷമാകുന്നു. 1974 ലെ മണ്ഡലകാലത്താണ് പൂർണ്ണ സംവിധാനങ്ങളോടെ ഇവിടെ തപാൽ ഓഫീസ് തുടങ്ങിയത്. ഒരു പോസ്‌റ്റ് മാസ്‌റ്ററും നാല് ജീവനക്കാരുമാണ് സന്നിധാനം പോസ്‌റ്റ് ഓഫിസിൽ നിലവിലുള്ളത്.

ഇന്ത്യയിൽ സ്വന്തമായി പിൻകോഡ് ഉള്ള രണ്ട് പേരാണുള്ളത്. ഒരാൾ ഇന്ത്യൻ രാഷ്‌ട്രപതിയും മറ്റൊരാൾ ശബരിമല അയ്യപ്പനുമാണ്. സ്വാമി അയ്യപ്പൻ, ശബരിമല സന്നിധാനം പിൻകോഡ് - 689713 എന്ന വിലാസത്തിൽ നിരവധി കത്തുകളും കാണിക്കയായി മണി ഓഡറുകളും ഈ പോസ്‌റ്റ് ഓഫിസിൽ ലഭിക്കും. പതിനെട്ടാം പടിക്കു മുകളിൽ അയ്യപ്പ വിഗ്രഹമുള്ള ഇവിടത്തെ തപാൽ മുദ്രയും പ്രത്യേകതയാണ്.

തമിഴ്, തെലുഗു, കന്നഡ ഭാഷകളിൽ സ്വാമി അയ്യപ്പന് നിരവധി സന്ദേശങ്ങളും ഭക്തർ അയക്കാറുണ്ട്. ഇവയെല്ലാം ദേവസ്വം അധികൃതർക്ക് കൈമാറും.