മികച്ച സ്റ്റാർട്ടപ്പ് ഇക്കോസിസ്റ്റം: കേരളം ഏഷ്യയിൽ ഒന്നാം സ്ഥാനത്ത്

മികവുറ്റ സ്റ്റാർട്ടപ്പ് ഇക്കോസിസ്റ്റം ഒരുക്കുന്നതുമായി ബന്ധപ്പെട്ട റിപ്പോർട്ടിൽ കേരളം ഏഷ്യയിൽ ഒന്നാം സ്ഥാനത്തെത്തി. കഴിഞ്ഞ ദിവസം പുറത്തിറക്കിയ ഗ്ലോബൽ സ്റ്റാർട്ടപ്പ് ഇക്കോസിസ്റ്റം റിപ്പോർട്ടിലാണ് (ജിഎസ്ഇആർ) കേരളം ഒന്നാം സ്ഥാനത്തെത്തിയതായി കണ്ടെത്തിയിരിക്കുന്നു . കേരളത്തിന്റെ സ്റ്റാർട്ടപ്പ് പ്രവർത്തനങ്ങൾക്ക് ഇത് പുതിയ ഊർജ്ജം പകരുമെന്ന് കേരളാ സ്റ്റാർട്ടപ്പ് വക്താവ് പറഞ്ഞു. ആഗോള റാങ്കിംഗിലും കേരളം നിലമെച്ചപ്പെടുത്തി. ഇത് 20-ൽ നിന്ന് നാലാം സ്ഥാനത്തേക്ക് എത്തി.

പോളിസി അഡ്വൈസറി ആൻഡ് റിസർച്ച് ഓർഗനൈസേഷനായ സ്റ്റാർട്ടപ്പ് ജീനോമും ഗ്ലോബൽ എന്റർപ്രണർഷിപ്പ് നെറ്റ്‌വർക്കും സംയുക്തമായി തയ്യാറാക്കിയ ജിഎസ്ഇആറിൽ(GSER) ആഗോള റാങ്കിംഗിൽ സംസ്ഥാനം നാലാം സ്ഥാനത്താണ്.

ഇപ്പോൾ നടന്നു വരുന്ന ലണ്ടൻ ടെക് വീക്ക് 2022 ന്റെ പശ്ചാത്തലത്തിലാണ് ചൊവ്വാഴ്ച ജിഎസ്ഇആർ പുറത്തിറക്കിയത്. 2020-ൽ പ്രസിദ്ധീകരിച്ച ആദ്യ ജിഎസ്ഇആറിൽ, കേരളം ഏഷ്യയിൽ 5-ാം സ്ഥാനത്തും ലോകത്തിൽ 20-ാം സ്ഥാനത്തുമാണ്. ആഗോള സർക്കാരുകളെയും കോർപ്പറേറ്റ് നേതാക്കളെയും സ്റ്റാർട്ടപ്പ് സ്ഥാപകരെയും നിക്ഷേപകരെയും ഒരേ വേദിയിൽ എത്തിക്കുന്ന സംരംഭമാണ് ടെക് വീക്ക്.

സ്റ്റാർട്ടപ്പുകളും സാമ്പത്തിക വളർച്ചയും പ്രോത്സാഹിപ്പിക്കുന്ന അന്തരീക്ഷമാണ് കേരളത്തിലുള്ളതെന്ന് റിപ്പോർട്ടിൽ എടുത്തു പറയുന്നു. സാങ്കേതിക പ്രതിഭകളെ കണ്ടെത്തുന്നതിനും നിലനിർത്തുന്നതിനുമുള്ള കഴിവിൻറെ അടിസ്ഥാനത്തിലാണ് റാങ്കിംഗ് അളക്കുന്നത്. സ്റ്റാർട്ടപ്പുകൾ കേരളത്തിലേക്ക് മാറുന്നതിനും അഭിവൃദ്ധിപ്പെടുന്നതിനുമുള്ള കാരണങ്ങൾ സർക്കാർ പിന്തുണയും സാങ്കേതിക കഴിവുകളുംമാണെന്ന് റിപ്പോർട്ടിൽ പറയുന്നു.

“കോവിഡ്-19 മഹാമാരിയിൽ നിന്ന് പുറത്തുവരുന്ന കേരളത്തിലെ സ്റ്റാർട്ടപ്പ് മേഖലയിൽ അവിശ്വസനീയമായ വളർച്ച പ്രകടമാണ്. സ്റ്റാർട്ടപ്പ് ജീനോം കേരളത്തെ അഭിനന്ദിക്കുന്നു ,” സ്റ്റാർട്ടപ്പ് ജീനോമിന്റെ സ്ഥാപകനും പ്രസിഡന്റുമായ മാർക്ക് പെൻസൽ അവരുടെ വെബ്ബ് സൈറ്റിൽ അഭിപ്രായപ്പെട്ടു.

സംസ്ഥാനത്തിന്റെ വളർച്ചയിൽ നിർണായക പങ്കുവഹിക്കുന്ന സ്റ്റാർട്ടപ്പുകളുടെ ശക്തമായ ശൃംഖല കെട്ടിപ്പടുക്കാൻ ഈ റാങ്കിംഗ് സംസ്ഥാനത്തെ സഹായിക്കുമെന്ന് കേരളാ സ്റ്റാർട്ടപ്പ് മിഷൻ (കെഎസ്‌യുഎം) അഭിപ്രായപ്പെട്ടു.

2019-21 കാലയളവിൽ, 1,037.05 കോടി രൂപ മൂല്യമുള്ള ഒരു സ്റ്റാർട്ടപ്പ് ഇക്കോസിസ്റ്റം സൃഷ്ടിക്കാൻ കേരളത്തിന് കഴിഞ്ഞു. പ്രാരംഭ ഘട്ട സ്റ്റാർട്ടപ്പുകൾക്കുള്ള സർക്കാർ പിന്തുണയും ആകർഷകമായ പ്രോത്സാഹനങ്ങളും സംസ്ഥാനത്ത് ആവാസവ്യവസ്ഥയെ തഴച്ചുവളരാൻ സഹായിച്ചതായി റിപ്പോർട്ട് പറയുന്നു.

റിപ്പോർട്ടിൽ മുൻനിരയിലുള്ള 140 ആവാസവ്യവസ്ഥകളുടെ റാങ്കിംഗ്, ഭൂഖണ്ഡാന്തര സ്ഥിതിവിവരക്കണക്കുകൾ, പ്രമുഖ വിദഗ്ധരുടെ ലേഖനങ്ങൾ എന്നിവ ഉൾപ്പെടുന്നു. പ്രതിഭ, അനുഭവപരിചയം, ദീർഘകാല പ്രവണതകൾ, ആവാസവ്യവസ്ഥയിൽ കഴിവുകൾ സൃഷ്ടിക്കുന്നതിനും നിലനിർത്തുന്നതിനുമുള്ള പ്രവർത്തനം എന്നിവയുടെ അടിസ്ഥാനത്തിലാണ് ഉയർന്ന ഏഷ്യൻ എമർജിംഗ് ഇക്കോസിസ്റ്റങ്ങൾ അളക്കുന്നത്.

അടുത്ത അഞ്ച് വർഷത്തിനുള്ളിൽ 15,000 സ്റ്റാർട്ടപ്പുകൾ സൃഷ്ടിക്കുക എന്ന ലക്ഷ്യമാണ് കേരളം മുമ്പോട്ട് വയ്ക്കുന്നത്. ഇന്നൊവേഷൻ ആൻഡ് എന്റർപ്രണർഷിപ്പ് ഡെവലപ്‌മെന്റ് സെന്ററുകൾ (ഐഇഡിസികൾ), യംഗ് ഇന്നൊവേറ്റേഴ്‌സ് പ്രോഗ്രാമുകൾ, ഇൻകുബേഷൻ, ആക്സിലറേഷൻ പ്രോഗ്രാമുകൾ തുടങ്ങി വിവിധ സർക്കാർ സംരംഭങ്ങൾ ഈ ശ്രമത്തിൽ പങ്കുചേരുന്നു. സംസ്ഥാനത്തെ സ്റ്റാർട്ടപ്പുകൾക്കായി വെഞ്ച്വർ ക്യാപിറ്റൽ ഫണ്ട് രൂപീകരിക്കാനും കേരളം ശ്രമിക്കുന്നുണ്ട്.

സംസ്ഥാനത്തെ നൈപുണ്യവികസനത്തിന് 2,500 കോടി രൂപ വകയിരുത്തിയിട്ടുണ്ട്. കേരള യൂണിവേഴ്സിറ്റി ഓഫ് ഡിജിറ്റൽ സയൻസസ്, ഇന്നൊവേഷൻ ആൻഡ് ടെക്നോളജി (ഡിജിറ്റൽ യൂണിവേഴ്സിറ്റി കേരള)എന്നിവിടങ്ങളിൽ വ്യവസായത്തിന് തയ്യാറുള്ള പ്രതിഭകളെ പരിശീലിപ്പിക്കുന്നു.