റെക്കോഡ് നികുതി പിരിവ്: ലഭിച്ചത് 27.07 ലക്ഷം കോടി രൂപ

ഡെൽഹി: പ്രത്യക്ഷ നികുതിയിലും പരോക്ഷ നികുതിയിലും ഉണ്ടായ വർദ്ധനവ് കഴിഞ്ഞ സാമ്പത്തിക വർഷത്തിൽ ഇന്ത്യയുടെ നികുതി പിരിവിലും ​ഗണ്യമായ വർദ്ധനവുണ്ടാക്കി. മാർച്ച് 31ന് അവസാനിച്ച സാമ്പത്തിക വർഷത്തിൽ ഇന്ത്യയുടെ മൊത്ത നികുതി പിരിവ് 27.07 ലക്ഷം കോടി രൂപയായി ഉയർന്നു.

നികുതി-ജിഡിപി അനുപാതം രണ്ട് ദശാബ്ദത്തിനിടയിലെ ഏറ്റവും ഉയർന്ന നിരക്കായ 11.7 എന്ന നിരക്കിലെത്തിയതായി റവന്യൂ സെക്രട്ടറി തരുൺ ബജാജ് അറിയിച്ചു.

2021-22 ലെ നികുതി-ജിഡിപി അനുപാതം 1999 ന് ശേഷമുള്ള ഏറ്റവും ഉയർന്ന നിരക്കാണ്. 2020-21 സാമ്പത്തിക വർഷത്തിൽ ഈ അനുപാതം 10.3 ശതമാനമായിരുന്നു.

2021 ഏപ്രിൽ മുതൽ 2022 മാർച്ച് വരെയുള്ള ബജറ്റ് എസ്റ്റിമേറ്റ് 22.17 ലക്ഷം കോടി രൂപയായിരുന്നു. എന്നാൽ മൊത്തത്തിൽ 27.07 ലക്ഷം കോടി രൂപയുടെ നികുതി പിരിവ് ഉണ്ടായതായി അദ്ദേഹം മാധ്യമ പ്രവർത്തകരോട് പറഞ്ഞു.

"ജിഎസ്ടി കണക്കുകൾ ഇപ്പോൾ ആദായനികുതി കണക്കുകളുമായി പൊരുത്തപ്പെടുത്തുന്നുണ്ട്. സാങ്കേതികവിദ്യയുടെ ഉപയോഗം വരുമാന വർദ്ധനവിന് കാരണമായി," ബജാജ് മാധ്യമപ്രവർത്തകരോട് പറഞ്ഞു. "പ്രത്യക്ഷ നികുതികൾ പരോക്ഷ നികുതികളേക്കാൾ കൂടുതലാണ് (2021-22 ൽ), വരും വർഷങ്ങളിലും ഈ പ്രവണത തുടരുമെന്ന് ഞാൻ പ്രതീക്ഷിക്കുന്നു," ബജാജ് കൂട്ടിച്ചേർത്തു.

മൊത്തത്തിലുള്ള നികുതി ഉയർച്ച "ആരോഗ്യകരവും ശക്തവുമായ കണക്ക്" കാണിക്കുന്നതായി ബജാജ് പറഞ്ഞു. നികുതി പിരിവിലെ വളർച്ചാ നിരക്ക് ജിഡിപി വളർച്ചയുടെ ഇരട്ടി വേഗത്തിലായിരുന്നു.

വ്യക്തികൾ അടക്കുന്ന ആദായനികുതിയും, കോർപ്പറേറ്റ് നികുതിയും അടങ്ങുന്ന പ്രത്യക്ഷ നികുതി 14.10 ലക്ഷം കോടി രൂപയായി വർധിച്ചു. ബജറ്റ് എസ്റ്റിമേറ്റിനേക്കാൾ 3.02 ലക്ഷം കോടി രൂപ കൂടുതലാണിത്. എക്സൈസ് തീരുവ പോലുള്ള പരോക്ഷ നികുതികൾ ബജറ്റ് എസ്റ്റിമേറ്റിനേക്കാൾ 1.88 ലക്ഷം കോടി രൂപ കൂടുതലാണ്. പരോക്ഷ നികുതിയിലെ 11.02 ലക്ഷം കോടി രൂപയുടെ ബജറ്റ് എസ്റ്റിമേറ്റിനെതിരെ 12.90 ലക്ഷം കോടി രൂപ ലഭിച്ചതായും അദ്ദേഹം പറഞ്ഞു.

പ്രത്യക്ഷ നികുതിയിൽ 49 ശതമാനം വളർച്ചയുണ്ടായപ്പോൾ പരോക്ഷ നികുതി പിരിവിൽ കഴിഞ്ഞ സാമ്പത്തിക വർഷത്തേക്കാൾ 30 ശതമാനം വർധനയുണ്ടായെന്നും അദ്ദേഹം കൂട്ടിച്ചേർത്തു. നികുതി-ജിഡിപി അനുപാതം 2021 സാമ്പത്തിക വർഷത്തിലെ 10.3 ശതമാനത്തിൽ നിന്ന് 2022ൽ 11.7 ശതമാനമായി ഉയർന്നു. 1999 ന് ശേഷമുള്ള ഏറ്റവും ഉയർന്ന നിരക്കാണിത്.

കോർപ്പറേറ്റ് നികുതി 56.1 ശതമാനം വർധിച്ച് 8.58 ലക്ഷം കോടി രൂപയായപ്പോൾ വ്യക്തിഗത ആദായ നികുതി പിരിവ് 43 ശതമാനം ഉയർന്ന് 7.49 ലക്ഷം കോടി രൂപയായി.

വിലക്കയറ്റം കാരണം ഭക്ഷ്യ എണ്ണകളുടെയും പയറുവർഗങ്ങളുടെയും ഇറക്കുമതി തീരുവ പൂർണമായും പുനഃസ്ഥാപിക്കാൻ സാധിക്കാത്തതിനാൽ നടപ്പ് സാമ്പത്തിക വർഷം ബജറ്റിൽ ലക്ഷ്യമിട്ട കസ്റ്റംസ് വരുമാനം കൈവരിക്കുന്നത് ബുദ്ധിമുട്ടാണെന്ന് ബജാജ് പറഞ്ഞു. ആഭ്യന്തര വില കുതിച്ചുയരുന്നത് തടയാൻ കഴിഞ്ഞ സാമ്പത്തിക വർഷം ഭക്ഷ്യ എണ്ണയുടെയും പയറുവർഗങ്ങളുടെയും കസ്റ്റംസ് തീരുവ സർക്കാർ കുറച്ചിരുന്നു.

ഏപ്രിൽ ഒന്നിന് ആരംഭിച്ച 2022-23 സാമ്പത്തിക വർഷത്തിൽ നേരിട്ടുള്ള നികുതി പിരിവ് ലക്ഷ്യം 14.20 ലക്ഷം കോടി രൂപയാണ്. ഇതിൽ കോർപ്പറേറ്റ് നികുതിയിൽ നിന്നുള്ള 7.20 ലക്ഷം കോടിയും, വ്യക്തിഗത ആദായനികുതിയിൽ നിന്നുള്ള 7 ലക്ഷം കോടിയും ഉൾപ്പെടുന്നു.

13.30 ലക്ഷം കോടി രൂപയാണ് പരോക്ഷ നികുതി പിരിവ് പ്രതീക്ഷിക്കുന്നത്. ഇതിൽ കസ്റ്റംസിൽ നിന്നുള്ള 2.13 ലക്ഷം കോടിയും, എക്സൈസ് പിരിവ് 3.35 ലക്ഷം കോടിയും, സിജിഎസ്ടിയും സെസും 7.80 ലക്ഷം കോടി രൂപയും ഉൾപ്പെടുന്നു.