കോര്‍പ്പറേറ്റ് നികുതി ഇളവിനുള്ള ഫോം സമര്‍പ്പിക്കേണ്ട തീയതി നീട്ടി കേന്ദ്ര സര്‍ക്കാര്‍

ആദായനികുതി വകുപ്പിന്റെ നേരിട്ടുള്ള നികുതി വിഭാഗമായ കേന്ദ്ര പ്രത്യക്ഷ നികുതി ബോര്‍ഡ് (CBDT) 22 ശതമാനം കോര്‍പ്പറേറ്റ് നികുതി ഇളവ് നിരക്ക് ലഭിക്കുന്നതിന് ആവശ്യമായ ഫോം 10-IC, സമര്‍പ്പിക്കാനുള്ള അവസാന തീയതി നീട്ടി. കേന്ദ്ര പ്രത്യക്ഷ നികുതി ബോര്‍ഡിന്റെ പ്രസ്താവന പ്രകാരം ഫോം സമര്‍പ്പിക്കാനുള്ള പുതിയ സമയപരിധി 2022 ജൂണ്‍ 30 വരെയാണ് നീട്ടിയത്. കോര്‍പ്പറേറ്റുകള്‍ക്ക് 2020 സാമ്പത്തിക വര്‍ഷം മുതലുള്ള വരുമാനത്തിന് ബാധകമായ നികുതി ഇളവ് ലഭ്യമാക്കുന്നത് അനുവദിച്ചുകൊണ്ട് 2019-ല്‍ ആദായനികുതി വകുപ്പ് 10-IC, 10-ID ഫോമുകള്‍ അവതരിപ്പിച്ചു.

2019 സെപ്റ്റംബറില്‍, നിലവിലുള്ള കമ്പനികള്‍ക്കും 2019 ഒക്ടോബര്‍ 1-ന് ശേഷം സംയോജിപ്പിച്ചതും 2023 മാര്‍ച്ച് 31-ന് മുമ്പ് പ്രവര്‍ത്തനം ആരംഭിക്കുന്നതുമായ പുതിയ നിര്‍മ്മാണ യൂണിറ്റുകള്‍ക്കും സര്‍ക്കാര്‍ കുറഞ്ഞ അടിസ്ഥാന കോര്‍പ്പറേറ്റ് നികുതി പ്രഖ്യാപിച്ചു. ഈ നികുതി ഇളവ് ലഭിക്കുന്നതിന്, കോര്‍പ്പറേറ്റുകള്‍ അവസാന തീയതിക്ക് മുമ്പ് 10-IC, 10-ID ഫയല്‍ ചെയ്യേണ്ടതുണ്ട്. വ്യക്തമാക്കിയ നിശ്ചിത തീയതിയിലോ അതിനുമുമ്പോ അത്തരം ഈ ഫോമുകള്‍ നല്‍കുന്നതില്‍ പരാജയപ്പെട്ടാല്‍ അത്തരം ബിസിനസുകള്‍ക്ക് 22 ശതമാനം നികുതി ഇളവ് നിഷേധിക്കും.

1961-ലെ ആദായനികുതി നിയമത്തിലെ സെക്ഷന്‍ 115BAA പ്രകാരം ആഭ്യന്തര കമ്പനികള്‍ ചില നിര്‍ദ്ദിഷ്ട വ്യവസ്ഥകള്‍ ഉപേക്ഷിക്കാന്‍ തീരുമാനിക്കുകയാണെങ്കില്‍, സര്‍ചാര്‍ജും സെസും ഉള്‍പ്പെടെ ഇളവുള്ള ആദായനികുതി തിരഞ്ഞെടുക്കാം. ഒരു ബിസിനസ്സ് ഒരിക്കല്‍ ഇളവുള്ള നികുതി നിരക്കുകള്‍ തിരഞ്ഞെടുത്തിട്ടുണ്ടെങ്കില്‍, അത് തുടര്‍ന്നുള്ള അനുമാന വര്‍ഷങ്ങളില്‍ പ്രയോഗിക്കേണ്ടതുണ്ട്. അത് പിന്‍വലിക്കാന്‍ കഴിയില്ല.