തുടര്‍ച്ചയായ രണ്ടാം ദിനത്തിലും ഓഹരി വിപണികളില്‍ ഇടിവ്

രാജ്യത്തെ പ്രമുഖ ഓഹരി വിപണി സൂചികകളായ സെൻസെക്സും നിഫ്റ്റിയും തുടർച്ചയായ രണ്ടാം ദിനത്തിലും ഇടിവ് പ്രകടമാക്കി. കൊട്ടക് മഹീന്ദ്ര ബാങ്ക്, ഐസിഐസിഐ ബാങ്ക്, ഭാരതി എയർടെൽ എന്നീ പ്രമുഖ ഓഹരികള്‍ ഉള്‍പ്പടെയുള്ളവ നഷ്ടത്തിലാണ് വ്യാപാരം അവസാനിപ്പിച്ചത്. ആഗോള വിപണിയിലെ സമ്മിശ്ര പ്രവണതകള്‍ സൃഷ്ടിച്ച ചാഞ്ചാട്ടങ്ങള്‍ക്കൊടുവില്‍ വ്യാപാരം അവസാനിപ്പിക്കുമ്പോള്‍ 30-ഷെയർ ബിഎസ്ഇ സെൻസെക്സ് 193.70 പോയിന്റ് അല്ലെങ്കിൽ 0.31 ശതമാനം ഇടിഞ്ഞ് 62,428.54 എന്ന നിലയിലെത്തി. വ്യാപാരത്തിനിടെ ഇത് 263.1 പോയിന്റ് അല്ലെങ്കിൽ 0.42 ശതമാനം ഇടിഞ്ഞ് 62,359.14 എന്ന നിലയിലേക്ക് താഴ്ന്നിരുന്നു. എൻഎസ്ഇ നിഫ്റ്റി 46.65 പോയിന്റ് അഥവാ 0.25 ശതമാനം ഇടിഞ്ഞ് 18,487.75 ൽ എത്തി.

ബാങ്കിംഗ്, മെറ്റൽ, എനർജി വിഭാഗങ്ങളിലെ ഓഹരികളില്‍ ചാഞ്ചാട്ടം പ്രകടമായി. സെൻസെക്‌സില്‍ ഭാരതി എയർടെൽ 3.42 ശതമാനവും കൊട്ടക് മഹീന്ദ്ര ബാങ്ക് 3.31 ശതമാനവും ഇടിഞ്ഞു. ഐസിഐസിഐ ബാങ്ക്, ഐടിസി, എച്ച്‌ഡിഎഫ്‌സി ബാങ്ക്, അൾട്രാടെക് സിമന്റ്, എച്ച്‌സിഎൽ ടെക്‌നോളജീസ്, മാരുതി എന്നിവയാണ് ഇടിവ് രേഖപ്പെടുത്തിയ മറ്റ് പ്രധാന പിന്നാക്ക കമ്പനികൾ.

ടാറ്റ മോട്ടോഴ്‌സ്, ഹിന്ദുസ്ഥാൻ യുണിലിവർ, ഏഷ്യൻ പെയിന്റ്‌സ്, സൺ ഫാർമ, നെസ്‌ലെ, ടാറ്റ കൺസൾട്ടൻസി സർവീസസ്, വിപ്രോ, ബജാജ് ഫിനാൻസ്, ആക്‌സിസ് ബാങ്ക്, ഇൻഡസ്ഇൻഡ് ബാങ്ക് തുടങ്ങിയ ഓഹരികൾ നേട്ടത്തിലായിരുന്നു. എക്‌സ്‌ചേഞ്ച് ഡാറ്റ പ്രകാരം ബുധനാഴ്ച 3,405.90 കോടി രൂപയുടെ ഇക്വിറ്റികൾ വാങ്ങിയ വിദേശ സ്ഥാപന നിക്ഷേപകർ (എഫ്‌ഐഐകൾ) അറ്റ ​​വാങ്ങലുകാരായി തുടർന്നു.

ഏഷ്യൻ വിപണികളിൽ സിയോൾ, ഹോങ്കോങ് എന്നിവ നഷ്ടത്തിലാണ് വ്യാപാരം അവസാനിപ്പിച്ചത്. യൂറോപ്പിലെ ഇക്വിറ്റി വിപണികൾ പോസിറ്റീവ് മേഖലയിലാണ് വ്യാപാരം നടത്തുന്നത്. യുഎസ് വിപണികൾ ബുധനാഴ്ച നഷ്ടത്തിലാണ് അവസാനിച്ചത്.

മാർച്ച് പാദത്തില്‍, പ്രതീക്ഷകള്‍ക്കപ്പുറം 6.1 ശതമാനമെന്ന ജിഡിപി വളര്‍ച്ച സ്വന്തമാക്കിയതോടെ 2022-23 മൊത്തം സാമ്പത്തിക വര്‍ഷത്തിലെ വളര്‍ച്ച 7.2 ശതമാനത്തിലേക്ക് എത്തി. ഇത് ഇന്ത്യന്‍ വിപണിയെ കുറിച്ചുള്ള നിക്ഷേപകരുടെ പ്രതീക്ഷ ഉയര്‍ത്തിയിട്ടുണ്ട്.

ആഗോള എണ്ണ മാനദണ്ഡമായ ബ്രെന്റ് ക്രൂഡ് 0.17 ശതമാനം ഇടിഞ്ഞ് ബാരലിന് 72.48 ഡോളറിലെത്തി. യുഎസിൽ, വായ്പാ പരിധി ഉയര്‍ത്തിയതും ബജറ്റ് വെട്ടിക്കുറയ്ക്കൽ പാക്കേജും അംഗീകരിക്കപ്പെട്ടതും വരുംദിവസങ്ങളില്‍ വിപണിയെ സ്വാധീനിച്ചേക്കും.