ഫെഡ് രക്ഷിക്കുമോ? ആഗോള വിപണികളിൽ തളർച്ച, ഇന്ത്യൻ സൂചികകൾ അസ്ഥിരമായേക്കും

ഇന്ത്യൻ ഓഹരി വിപണി ഇന്ന് താഴ്ന്ന് തുറക്കാൻ സാധ്യത. യുഎസ് ഫെഡറൽ റിസർവ് നയ തീരുമാനത്തിന് മുന്നോടിയായി നിക്ഷേപകർ ജാഗ്രത പാലിച്ചതിനാൽ ആഗോള വിപണികൾ ദുർബലമായി.

ഏഷ്യൻ വിപണികൾ സമ്മിശ്രമായി വ്യാപാരം നടത്തുന്നു. യുഎസ് ഓഹരി വിപണി നഷ്ടത്തിൽ അവസാനിച്ചു. ഡൗ ജോൺസ് തുടർച്ചയായ ഒമ്പതാം സെഷനിലും ഇടിഞ്ഞു.

ഇന്ന് പുറത്തുവരുന്ന ഫെഡറൽ റിസർവ് നയപ്രഖ്യാപനത്തിലാണ് വിപണി ശ്രദ്ധ കേന്ദ്രീകരിക്കുന്നത്.

ഗിഫ്റ്റ് നിഫ്റ്റി

ഗിഫ്റ്റ് നിഫ്റ്റി 24,365 ലെവലിലാണ് വ്യാപാരം ചെയ്യുന്നത്. നിഫ്റ്റി ഫ്യൂച്ചേഴ്സിൻ്റെ മുൻ ക്ലോസിൽ നിന്ന് ഏകദേശം 50 പോയിൻ്റിൻ്റെ ഇടിവ്. ഇത് ഇന്ത്യൻ ഓഹരി വിപണി സൂചികകൾക്ക് ഒരു നെഗറ്റീവ് തുടക്കത്തെ സൂചിപ്പിക്കുന്നു.

ഏഷ്യൻ വിപണി

വാൾസ്ട്രീറ്റിലെ നഷ്ടത്തെ തുടർന്ന് ഏഷ്യൻ വിപണികളിൽ ബുധനാഴ്ച സമ്മിശ്ര വ്യാപാരം നടക്കുന്നു. ജപ്പാനിലെ നിക്കി 0.4% ഇടിഞ്ഞപ്പോൾ ടോപ്പിക്സ് 0.1% ഉയർന്നു. ദക്ഷിണ കൊറിയയുടെ കോസ്പി 0.6% നേട്ടമുണ്ടാക്കിയപ്പോൾ കോസ്ഡാക്ക് 0.4% കുറഞ്ഞു. ഹോങ്കോംഗ് ഹാംഗ് സെംഗ് സൂചിക ഫ്യൂച്ചറുകൾ ഉയർന്ന ഓപ്പണിംഗ് സൂചിപ്പിച്ചു.

വാൾ സ്ട്രീറ്റ്

ഫെഡറൽ റിസർവിൻ്റെ ധനനയ പ്രഖ്യാപനത്തിന് മുന്നോടിയായി നിക്ഷേപകർ ജാഗ്രത പാലിച്ചതിനാൽ യുഎസ് ഓഹരി വിപണി ചൊവ്വാഴ്ച നഷ്ടത്തിലാണ് അവസാനിച്ചത്.

ഡൗ ജോൺസ് ഇൻഡസ്ട്രിയൽ ആവറേജ് 267.58 പോയിൻറ് അഥവാ 0.61 ശതമാനം ഇടിഞ്ഞ് 43,449.90 ലും എസ് ആൻ്റ് പി 23.47 പോയിൻറ് അഥവാ 0.39 ശതമാനം ഇടിഞ്ഞ് 6,050.61 ലും എത്തി. നാസ്ഡാക്ക് കോമ്പോസിറ്റ് 64.83 പോയിൻറ് അഥവാ 0.32 ശതമാനം താഴ്ന്ന് 20,109.06 ൽ അവസാനിച്ചു.

ടെസ്‌ല ഓഹരി വില 3.6% ഉയർന്നപ്പോൾ ഫൈസർ ഓഹരികൾ 4.7% കുതിച്ചു, എൻവിഡിയ ഓഹരികൾ 1.22% ഇടിഞ്ഞു, ആപ്പിൾ ഓഹരി വില 0.97% ഉയർന്നു.

ഇന്ത്യൻ വിപണി

ആഭ്യന്തര വിപണി ഇന്നലെ വ്യാപാരം അവസാനിപ്പിച്ചത് വമ്പൻ ഇടിവോടെയായാണ്. തുടർച്ചയായ രണ്ടാം ദിവസമാണ് വിപണി നഷ്ടത്തോടെ ക്ലോസ് ചെയുന്നത്. സെൻസെക്സും നിഫ്റ്റിയും ഒരു ശതമാനത്തിലധികം ഇടിഞ്ഞു, യുഎസ് ഫെഡ് പലിശ നിരക്ക് തീരുമാനത്തിന് മുന്നോടിയായി നിക്ഷേപകർ ജാഗ്രത പുലർത്തിയത് സൂചികകളുടെ ഇടിവിന് കാരണമായി.

സെൻസെക്സ് 1,064.12 പോയിൻ്റ് അഥവാ 1.30 ശതമാനം ഇടിഞ്ഞ് 80,684.45ൽ ക്ലോസ് ചെയ്തു. നിഫ്റ്റി 332.25 പോയിൻ്റ് അഥവാ 1.35 ശതമാനം ഇടിഞ്ഞ് 24,336ലും വ്യാപാരം അവസാനിപ്പിച്ചു.

ശ്രീറാം ഫിനാൻസ്, ഭാരതി എയർടെൽ, ഗ്രാസിം ഇൻഡസ്ട്രീസ്, ഹീറോ മോട്ടോകോർപ്പ്, ജെഎസ്ഡബ്ല്യു സ്റ്റീൽ എന്നിവ നിഫ്റ്റിയിൽ ഏറ്റവും കൂടുതൽ ന്മഷ്ടം രേഖപെടുത്തിയപ്പോൾ ഐടിസിയും സിപ്ലയും മാത്രമാണ് നേട്ടമുണ്ടാക്കിയത്.

നിഫ്റ്റി ഓട്ടോ, ബാങ്ക്, എനർജി, മെറ്റൽ, ഓയിൽ ആൻഡ് ഗ്യാസ് സൂചികൾ ഒരു ശതമാനം വീതം ഇടിഞ്ഞത്തോടെ എല്ലാ മേഖലാ സൂചികകളും നഷ്ടത്തിലാണ് അവസാനിച്ചത്. ബിഎസ്ഇ മിഡ്ക്യാപ്, സ്മോൾക്യാപ് സൂചികകൾ 0.5 ശതമാനം വീതം ഇടിഞ്ഞു.

പ്രതിരോധവും പിൻതുണയും

പിവറ്റ് പോയിൻ്റുകളെ അടിസ്ഥാനമാക്കിയുള്ള പ്രതിരോധം: 24,544, 24,619, 24,742

പിന്തുണ: 24,299, 24,223, 24,101

ബാങ്ക് നിഫ്റ്റി

പിവറ്റ് പോയിൻ്റുകളെ അടിസ്ഥാനമാക്കിയുള്ള പ്രതിരോധം: 53,328, 53,518, 53,826

പിന്തുണ: 52,712, 52,522, 52,214

പുട്ട്-കോൾ അനുപാതം

വിപണിയുടെ മൂഡ് സൂചിപ്പിക്കുന്ന നിഫ്റ്റി പുട്ട്-കോൾ അനുപാതം (പിസിആർ), മുൻ സെഷനിലെ 0.90 ലെവലിൽ നിന്ന് ഡിസംബർ 17 ന് 0.65ലേക്ക് (വീണ്ടും കുറഞ്ഞു.

ഇന്ത്യ വിക്സ്

ഇന്ത്യ വിക്സ് 3.32 ശതമാനം ഉയർന്ന് 14.49 ആയി.

സ്വർണ്ണ വില

ഫെഡറൽ റിസർവിൻ്റെ പണനയ തീരുമാനത്തിന് മുന്നോടിയായി സ്വർണ വില ദൃഢമായി. സ്‌പോട്ട് ഗോൾഡ് ഔൺസിന് 0.1% ഉയർന്ന് 2,649.09 ഡോളറിലെത്തി, യുഎസ് ഗോൾഡ് ഫ്യൂച്ചറുകൾ 0.1% ഉയർന്ന് 2,665.40 ഡോളറിലെത്തി.

വിദേശ നിക്ഷേപക സ്ഥാപനങ്ങൾ

വിദേശ പോർട്ട്‌ഫോളിയോ നിക്ഷേപകർ തിങ്കളാഴ്ച 278 കോടി രൂപയുടെ ഓഹരികൾ വിറ്റു. ആഭ്യന്തര നിക്ഷേപകർ 234 കോടി രൂപയുടെ ഓഹരികൾ വിറ്റു.

രൂപ

തിങ്കളാഴ്ച യുഎസ് ഡോളറിനെതിരെ രൂപയുടെ മൂല്യം 11 പൈസ ഇടിഞ്ഞ് എക്കാലത്തെയും താഴ്ന്ന നിലവാരമായ 84.91 എന്ന നിലയിലെത്തി.

ഇന്ന് ശ്രദ്ധിക്കേണ്ട ഓഹരികൾ

മുത്തൂറ്റ് ക്യാപിറ്റൽ സർവീസസ്

പ്രൈവറ്റ് പ്ലേസ്‌മെൻ്റ് അടിസ്ഥാനത്തിൽ എൻസിഡികൾ ഇഷ്യു ചെയ്യുന്നത് പരിഗണിക്കാൻ ഡിസംബർ 20 ന് ബോർഡ് യോഗം ചേരും.

അംബുജ സിമൻ്റ്സ്

രണ്ട് സിമൻ്റ് കമ്പനികളായ സംഘി ഇൻഡസ്ട്രീസ്, പെന്ന സിമൻ്റ് ഇൻഡസ്ട്രീസ് എന്നിവ ലയിപ്പിക്കുന്നതിന് കമ്പനിയുടെ ഡയറക്ടർ ബോർഡ് അംഗീകാരം നൽകി. ഏറ്റവും പുതിയ കരാറിൻ്റെ ഭാഗമായി, അദാനി ഗ്രൂപ്പ് കമ്പനിയായ അംബുജ സിമൻ്റ്‌സ് അതിൻ്റെ ഓഹരി ഉടമകളുടെ കൈവശമുള്ള 10 രൂപ മുഖവിലയുള്ള സംഘി ഇൻഡസ്ട്രീസിൻ്റെ ഓരോ 100 ഓഹരികൾക്കും 2 രൂപ വീതം മുഖവിലയുള്ള 12 ഇക്വിറ്റി ഓഹരികൾ നൽകും. ഇതോടെ സംഘിയുടെ യോഗ്യരായ ഓഹരിയുടമകൾ അംബുജ സിമൻ്റ്‌സിൻ്റെ ഓഹരിയുടമകളാകും.

അരബിന്ദോ ഫാർമ

യുണൈറ്റഡ് സ്റ്റേറ്റ്സ് ഫുഡ് ആൻഡ് ഡ്രഗ് അഡ്മിനിസ്ട്രേഷൻ (യുഎസ് എഫ്ഡിഎ) ഡിസംബർ 9 മുതൽ ഡിസംബർ 17 വരെ തെലങ്കാനയിലെ കമ്പനിയുടെ പൂർണ ഉടമസ്ഥതയിലുള്ള അപിറ്റോറിയ ഫാർമയുടെ API നിർമ്മാണ കേന്ദ്രമായ യൂണിറ്റ്-V പരിശോധിച്ചു. രണ്ട് നിരീക്ഷണങ്ങളോടെയാണ് റെഗുലേറ്റർ പരിശോധന അവസാനിപ്പിച്ചത്. . നിരീക്ഷണങ്ങൾ നടപടിക്രമ സ്വഭാവമുള്ളതാണ്.

ജെഎസ്ഡബ്ല്യുഎനർജി

ദക്ഷിണ കൊറിയയിലെ എൽജി എനർജി സൊല്യൂഷൻ ജെഎസ്ഡബ്ല്യു എനർജിയുമായി വൈദ്യുത വാഹനങ്ങൾക്കായുള്ള ബാറ്ററികൾ നിർമ്മിക്കുന്നതിനും പുനരുപയോഗിക്കാവുന്ന ഊർജ്ജ സംഭരണത്തിനും സംയുക്ത സംരംഭത്തിൽ ഏർപ്പെട്ടു. ഇതിന് 1.5 ബില്യൺ ഡോളറിലധികം നിക്ഷേപം ആവശ്യമായി വരുമെന്ന് റോയിട്ടേഴ്‌സ് റിപ്പോർട്ട് ചെയ്യുന്നു.

ആദിത്യ ബിർള റിയൽ എസ്റ്റേറ്റ്

കമ്പനിയുടെ അനുബന്ധ സ്ഥാപനമായ ബിർള എസ്റ്റേറ്റ്സ് 104.3 കോടി രൂപയ്ക്ക് ബോയ്‌സറിൽ 70.92 ഏക്കർ ഭൂമി ഏറ്റെടുത്തു.

എക്സൈഡ് ഇൻഡസ്ട്രീസ്

കമ്പനി അതിൻ്റെ അനുബന്ധ സ്ഥാപനമായ എക്സൈഡ് എനർജി സൊല്യൂഷനിൽ അവകാശ അടിസ്ഥാനത്തിൽ 100 ​​കോടി രൂപ നിക്ഷേപിച്ചിട്ടുണ്ട്. ഈ നിക്ഷേപത്തോടെ സബ്‌സിഡിയറിയിൽ കമ്പനി നടത്തിയ മൊത്തം നിക്ഷേപം 3,152.24 കോടി രൂപയായി ഉയർന്നു. നിക്ഷേപത്തിനു ശേഷമുള്ള സബ്‌സിഡിയറിയിൽ കമ്പനിയുടെ ഷെയർഹോൾഡിംഗ് ശതമാനത്തിൽ മാറ്റമില്ല.

സൺ ടിവി നെറ്റ്‌വർക്ക്

സൗത്ത് ഏഷ്യ എഫ്എമ്മും അതിൻ്റെ സംയുക്ത സംരംഭങ്ങളും/അസോസിയേറ്റ് കമ്പനികളും തമ്മിലുള്ള സംയോജനത്തിന് ചെന്നൈയിലെ നാഷണൽ കമ്പനി ലോ ട്രിബ്യൂണൽ അംഗീകാരം നൽകി.

ഹാംപ്ടൺ സ്കൈ റിയാലിറ്റി

പഞ്ചാബിലെ ലുധിയാനയിലുള്ള രണ്ട് ഹോട്ടൽ പ്രോപ്പർട്ടികൾക്കായി ഇന്ത്യൻ ഹോട്ടൽസ് കമ്പനിയുമായും അതിൻ്റെ അനുബന്ധ സ്ഥാപനമായ റൂട്ട്സ് കോർപ്പറേഷനുമായും കമ്പനി സഹകരണം പ്രഖ്യാപിച്ചു.

അലംബിക് ഫാർമസ്യൂട്ടിക്കൽസ്

ചിലിയിലെ എച്ച്എസ്ബിസി ബാങ്കിന് കമ്പനി 10 മില്യൺ ഡോളറിൻ്റെ കോർപ്പറേറ്റ് ഗ്യാരൻ്റി നൽകിയിട്ടുണ്ട്.

അദാനി എനർജി സൊല്യൂഷൻസ്

വൈദ്യുതിയുടെയും മറ്റ് അടിസ്ഥാന സൗകര്യ സേവനങ്ങളുടെയും സംപ്രേഷണം, വിതരണം എന്നിവയ്ക്കായി അദാനി എനർജി പൂർണ്ണ ഉടമസ്ഥതയിലുള്ള ഒരു സബ്സിഡിയറി, അദാനി എനർജി സൊല്യൂഷൻസ് സ്റ്റെപ്പ്-ഇലവൻ സംയോജിപ്പിച്ചു.