തുടക്കത്തിലെ നേട്ടത്തിനു ശേഷം ഇടിവിലേക്ക് വീണ് വിപണികള്‍

ആഭ്യന്തര ഓഹരി വിപണി സൂചികകൾ വ്യാഴാഴ്ച തുടക്ക വ്യാപാരത്തിൽ ഉയർന്നെങ്കിലും പിന്നീട് നേട്ടങ്ങള്‍ കൈവിട്ട് ഇടിവിലേക്ക് നീങ്ങി. പ്രതിമാസ ഡെറിവേറ്റീവുകള്‍ കാലഹരണപ്പെടുന്ന സാഹചര്യത്തിനും യുഎസ് വിപണികളിലെ നിശബ്ദ പ്രവണതയ്‌ക്കുമിടയിൽ നിക്ഷേപകര്‍ ലാഭം എടുക്കലിലേക്ക് നീങ്ങിയതാണ് വിപണികളെ പ്രധാനമായും താഴോട്ടേക്ക് വലിച്ചത്.

തുടക്ക വ്യാപാരത്തില്‍ സെൻസെക്‌സ് 118.2 പോയിന്റ് ഉയർന്ന് 67,020.11 ലെത്തി. നിഫ്റ്റി 39.55 പോയിന്റ് ഉയർന്ന് 20,136.15ലെത്തി. പിന്നീട്, രണ്ട് ബെഞ്ച്മാർക്ക് സൂചികകളും എല്ലാ ആദ്യകാല നേട്ടങ്ങളും ഉപേക്ഷിച്ച് ചുവപ്പില്‍ വ്യാപാരം നടത്തുകയാണ്.

അൾട്രാടെക് സിമന്റ്, മഹീന്ദ്ര ആൻഡ് മഹീന്ദ്ര, ആക്‌സിസ് ബാങ്ക്, വിപ്രോ, ഹിന്ദുസ്ഥാൻ യുണിലിവർ, സൺ ഫാർമ, കൊട്ടക് മഹീന്ദ്ര ബാങ്ക്, ലാർസൺ ആൻഡ് ടൂബ്രോ തുടങ്ങിയ ഓഹരികൾ നേട്ടത്തിലായിരുന്നു. ടാറ്റ സ്റ്റീൽ, റിലയൻസ് ഇൻഡസ്ട്രീസ്, ടാറ്റ മോട്ടോഴ്‌സ്, എൻടിപിസി തുടങ്ങിയ കമ്പനികൾ ഇടിവ് നേരിട്ടു.

ഏഷ്യൻ വിപണികളിൽ, ഷാങ്ഹായ്, ഹോങ്കോങ് എന്നിവ നേട്ടത്തിലാണ് വ്യാപാരം നടത്തിയത്, സിയോൾ, ടോക്കിയോ എന്നിവ നെഗറ്റീവ് ടെറിട്ടറിയിൽ ഉദ്ധരിച്ചു. ബുധനാഴ്ച യുഎസ് വിപണികൾ മിക്കവാറും നഷ്ടത്തിലാണ് അവസാനിച്ചത്.

" യുഎസ് വിപണികളിലെ തളർച്ചയും ഏഷ്യൻ സൂചികകളിലെ അതിന്‍റെ തുടര്‍ച്ചയും ഇന്ത്യന്‍ വിപണികളിലെ നേട്ടങ്ങളെ പരിമിതപ്പെടുത്തും. ഇന്ന് പ്രതിമാസ ഡെറിവേറ്റിവുകള്‍ കാലഹരണപ്പെടുന്ന തീയതി കൂടിയാണ്, ഇൻട്രാ-ഡേ ചാഞ്ചാട്ടം കാണാനാകും,” മേത്ത ഇക്വിറ്റീസ് ലിമിറ്റഡ് സീനിയർ വിപി (റിസർച്ച്) പ്രശാന്ത് തപ്‌സെ തന്റെ പ്രീ-ഓപ്പണിംഗ് അഭിപ്രായത്തിൽ പറഞ്ഞു.

ആഗോള എണ്ണ മാനദണ്ഡമായ ബ്രെന്റ് ക്രൂഡ് 0.18 ശതമാനം ഇടിഞ്ഞ് ബാരലിന് 82.95 ഡോളറിലെത്തി.

വിദേശ സ്ഥാപന നിക്ഷേപകർ (എഫ്‌ഐഐ) ബുധനാഴ്ച 71.91 കോടി രൂപയുടെ ഓഹരികൾ വാങ്ങിയതായി എക്‌സ്‌ചേഞ്ച് ഡാറ്റ വ്യക്തമാക്കുന്നു. ഇന്നലെ ബിഎസ്ഇ ബെഞ്ച്മാർക്ക് 727.71 പോയിന്റ് അഥവാ 1.10 ശതമാനം ഉയർന്ന് 66,901.91 എന്ന നിലയിലെത്തി. രണ്ട് മാസത്തെ ഇടവേളയ്ക്ക് ശേഷം നിഫ്റ്റി 206.90 പോയിന്റ് അഥവാ 1.04 ശതമാനം ഉയർന്ന് 20,096.60ൽ അവസാനിച്ചു.