നഷ്‍ടക്കണക്ക് തുടര്‍ന്ന് വിപണികള്‍

ആഗോള വിപണികളിലെ ദുർബലമായ പ്രവണതകളുടെയും വിദേശ ഫണ്ടുകളുടെ പുറത്തേക്കൊഴുക്കിന്‍റെയും പശ്ചാത്തലത്തില്‍ ആഭ്യന്തര ഓഹരി വിപണി സൂചികകൾ വ്യാഴാഴ്ച ആദ്യ വ്യാപാരത്തിൽ ഇടിഞ്ഞു, തുടര്‍ച്ചയായ രണ്ടാം ദിവസമാണ് വിപണികള്‍ ഇടിവില്‍ തുടരുന്നത്. ഐടി സേവന കമ്പനിയായ വിപ്രോയിൽ നിന്നുള്ള നിരാശാജനകമായ വരുമാന പ്രഖ്യാപനവും നിക്ഷേപക വികാരത്തെ തളര്‍ത്തി. തുടക്ക വ്യാപാരത്തില്‍ സെൻസെക്‌സ് 490.44 പോയിന്റ് ഇടിഞ്ഞ് 65,386.58 എന്ന നിലയിലെത്തി. നിഫ്റ്റി 137.5 പോയിന്റ് താഴ്ന്ന് 19,533.60 ൽ എത്തി.

വിപ്രോ ഏകദേശം 4 ശതമാനം ഇടിവ് രേഖപ്പെടുത്തി. ടാറ്റ സ്റ്റീൽ, ജെഎസ്‌ഡബ്ല്യു സ്റ്റീൽ, പവർ ഗ്രിഡ്, ബജാജ് ഫിനാൻസ്, ടാറ്റ മോട്ടോഴ്‌സ്, ബജാജ് ഫിൻസെർവ്, മഹീന്ദ്ര ആൻഡ് മഹീന്ദ്ര എന്നിവയും ഇടിവിലാണ്. ഇൻഡസ്ഇൻഡ് ബാങ്കും ഐടിസിയും നേട്ടത്തിലായിരുന്നു.

ഏഷ്യൻ വിപണികളിൽ, സിയോൾ, ടോക്കിയോ, ഷാങ്ഹായ്, ഹോങ്കോംഗ് എന്നിവ നെഗറ്റീവ് ടെറിട്ടറിയിലാണ് വ്യാപാരം നടത്തുന്നത്. യുഎസ് വിപണികൾ ബുധനാഴ്ച നഷ്ടത്തിലാണ് അവസാനിച്ചത്.

ആഗോള എണ്ണ മാനദണ്ഡമായ ബ്രെന്റ് ക്രൂഡ് 0.52 ശതമാനം ഇടിഞ്ഞ് ബാരലിന് 91.02 ഡോളറിലെത്തി. വിദേശ സ്ഥാപന നിക്ഷേപകർ (എഫ്‌ഐഐകൾ) ബുധനാഴ്ച 1,831.84 കോടി രൂപയുടെ ഇക്വിറ്റികൾ ഓഫ്‌ലോഡ് ചെയ്തുവെന്ന് എക്സ്ചേഞ്ച് ഡാറ്റ പ്രകാരം.

"വിദേശ സ്ഥാപന നിക്ഷേപകരുടെ ഓഹരി വിറ്റഴിക്കൽ, ഇസ്രായേൽ-പാലസ്തീൻ സംഘർഷം, കോർപ്പറേറ്റ് പ്രകടനം, യുഎസ് ട്രഷറി യീൽഡുകളുടെ വർദ്ധനവ്, ജെറോം പവലിന്റെ (ഫെഡ് ചെയർ) വരാനിരിക്കുന്ന പ്രസംഗം എന്നിവ ഉൾപ്പെടെ വിവിധ ആശങ്കകൾ നിക്ഷേപകർ അഭിമുഖീകരിക്കുന്നു," മേത്ത ഇക്വിറ്റീസ് ലിമിറ്റഡിലെ സീനിയർ വിപി (റിസര്‍ച്ച്) ആയ പ്രശാന്ത് തപ്സെ പറഞ്ഞു.

ബിഎസ്ഇ ബെഞ്ച്മാർക്ക് ബുധനാഴ്ച 551.07 പോയിന്റ് അഥവാ 0.83 ശതമാനം ഇടിഞ്ഞ് 65,877.02 എന്ന നിലയിലെത്തി. നിഫ്റ്റി 140.40 പോയിന്റ് അഥവാ 0.71 ശതമാനം ഇടിഞ്ഞ് 19,671.10 ൽ എത്തി.