നേട്ടത്തില്‍ വ്യാപാരം തുടര്‍ന്ന് സെന്‍സെക്സും നിഫ്റ്റിയും

ആഗോള തലത്തിലെ പോസിറ്റിവ് സൂചനകള്‍ക്കിടെ ഇക്വിറ്റി ബെഞ്ച്മാർക്ക് സൂചികകളായ സെൻസെക്സും നിഫ്റ്റിയും വ്യാഴാഴ്ച ഉയർന്നു. വിപണിയിലെ ഹെവി വെയ്റ്റായ റിലയന്‍സ് ഓഹരിയിലും, സ്വകാര്യ ബാങ്ക് ഓഹരികളിലും മികച്ച നേട്ടമുണ്ടായി.. ഇന്നത്തെ സെഷനിൽ എല്ലാ മേഖലാ സൂചികകളും ഉയർന്നു,

തുടക്ക വ്യാപാരത്തില്‍ സെൻസെക്‌സ് 341.76 പോയിന്റ് ഉയർന്ന് 71,999.47ൽ എത്തി. നിഫ്റ്റി 107.8 പോയിന്റ് ഉയർന്ന് 21,726.50 ൽ എത്തി

"ടിസിഎസ്,ഇന്‍ഫോസിസ് എന്നിവയുടെ ഫലങ്ങൾക്കൊപ്പം ഇന്ന് ആരംഭിക്കുന്ന മൂന്നാംപാദ ഫലങ്ങളുടെ സീസൺ നടപ്പു സാമ്പത്തിക വര്‍ഷത്തിലെ നിഫ്റ്റി വരുമാനത്തിന്റെ സൂചനകൾ നൽകും. ധനകാര്യം, മൂലധന ഉല്‍പ്പന്നങ്ങള്‍, ടെലികോം, ഓട്ടോമൊബൈൽസ്, ഹോട്ടലുകൾ എന്നിവ നല്ല റിസള്‍ട്ട് രേഖപ്പെടുത്തും. ഐടി ഫലങ്ങൾ മങ്ങിയതും എഫ്എംസിജി സമ്മിശ്രവുമായിരിക്കും.റിസൾട്ടുകളോടും മാനേജ്‌മെന്റ് കമന്ററിയോടും പ്രതികരണം എന്ന നിലയില്‍ പ്രത്യേക ഓഹരികളെ കേന്ദ്രീകരിച്ചായിരിക്കും വിപണി ചലനങ്ങള്‍,” ജിയോജിത് ഫിനാൻഷ്യൽ സർവീസസിലെ ചീഫ് ഇൻവെസ്റ്റ്‌മെന്റ് സ്ട്രാറ്റജിസ്റ്റ് ഡോ. വി കെ വിജയകുമാർ പറഞ്ഞു.

സെൻസെക്‌സ് സ്ഥാപനങ്ങളിൽ ആക്‌സിസ് ബാങ്ക്, ബജാജ് ഫിൻസെർവ്, ബജാജ് ഫിനാൻസ്, റിലയൻസ് ഇൻഡസ്‌ട്രീസ്, ഇൻഡസ്‌ഇൻഡ് ബാങ്ക്, എൻടിപിസി തുടങ്ങിയ ഓഹരികൾ നേട്ടമുണ്ടാക്കി. ഇൻഫോസിസ്, നെസ്‌ലെ, വിപ്രോ, എച്ച്‌ഡിഎഫ്‌സി ബാങ്ക് തുടങ്ങിയവയാണ് പിന്നോക്കം പോയത്.

ഏഷ്യൻ വിപണികളിൽ സിയോൾ, ടോക്കിയോ, ഷാങ്ഹായ്, ഹോങ്കോങ് തുടങ്ങിയ ഓഹരികൾ നേട്ടത്തിലാണ്. ബുധനാഴ്ച യുഎസ് വിപണികൾ പോസിറ്റീവിലാണ് അവസാനിച്ചത്. ആഗോള എണ്ണ മാനദണ്ഡമായ ബ്രെന്റ് ക്രൂഡ് 0.39 ശതമാനം ഉയർന്ന് ബാരലിന് 77.11 ഡോളറിലെത്തി.

വിദേശ സ്ഥാപന നിക്ഷേപകർ (എഫ്‌ഐഐ) ബുധനാഴ്ച 1,721.35 കോടി രൂപയുടെ ഇക്വിറ്റികൾ ഓഫ്‌ലോഡ് ചെയ്‌തതായി എക്‌സ്‌ചേഞ്ച് ഡാറ്റ പ്രകാരം. ബിഎസ്ഇ ബെഞ്ച്മാർക്ക് 271.50 പോയിന്റ് അഥവാ 0.38 ശതമാനം ഉയർന്ന് 71,657.71 എന്ന നിലയിലാണ് ബുധനാഴ്ച അവസാനിച്ചത്. നിഫ്റ്റി 73.85 പോയിന്റ് അഥവാ 0.34 ശതമാനം ഉയർന്ന് 21,618.70 ൽ എത്തി.