ആഗോള വിപണികളി‍ല്‍ ശുഭ സൂചന; ഇന്ന് വിപണി തുറക്കും മുമ്പ് അറിയേണ്ടത്

ആഭ്യന്തര ഓഹരി വിപണി സൂചികകള്‍ കുത്തനെയുള്ള ഇടിവിലേക്ക് നീങ്ങുന്നതാണ് ഇന്നലെ കാണാനായത്. ബിഎസ്ഇ സെൻസെക്‌സ് 610 പോയിന്റ് അഥവാ 0.92 ശതമാനം ഇടിഞ്ഞ് 65,508 ലും നിഫ്റ്റി 193 പോയിന്റ് താഴ്ന്ന് 19,523 ലും എത്തി. ബ്രെന്‍റ് ക്രൂഡ് ഓയില്‍ വില 100 ഡോളറിലേക്ക് അടുത്തതാണ് നിക്ഷേപകരുടെ വികാരത്തെ ബാധിച്ച പ്രധാന ഘടകം. ഇതിനൊപ്പം വിലക്കയറ്റവും പലിശ നിരക്കും സംബന്ധിച്ച ആശങ്കകള്‍ ആഗോള തലത്തിലും ആഭ്യന്തര തലത്തിലും കനത്തു.

രണ്ടാം പാദത്തില്‍ (ഏപ്രില്‍-ജൂണ്‍) യുഎസിന് 2.1 % റിയല്‍ ജിഡിപി വളര്‍ച്ച നേടാനായെന്ന സാമ്പത്തിക റിപ്പോര്‍ട്ടും പുറത്തുവന്നിട്ടുണ്ട്. നിക്ഷേപകര്‍ ഇതിന്‍റെ വിശദാംശങ്ങള്‍ അവലോകനം ചെയ്യുകയാണ്.

ഇന്ത്യയില്‍ ഗാര്‍ഹിക സമ്പാദ്യം 50 വര്‍ഷത്തെ താഴ്ന്ന നിലയിലാണെന്ന ആര്‍ബിഐ റിപ്പോര്‍ട്ടും ജി20 ഉച്ചകോടിക്ക് പിന്നാലെ എത്തിയ നയതന്ത്ര പ്രശ്നങ്ങളും തെരഞ്ഞെടുപ്പിന് മുന്നോടിയായുള്ള സാമൂഹ്യ-രാഷ്ട്രീയ അന്തരീക്ഷവും നിക്ഷേപകര്‍ ജാഗ്രതയോടെ വിലയിരുത്തുന്നു. വിദേശ ഫണ്ടുകളുടെ പുറത്തേക്കൊഴുക്ക് മാറ്റമില്ലാതെ തുടരുന്നതും വിപണികളുടെ തിരിച്ചുവരവിന് തടസമാണ്.

ഈ മാസം ഏകദേശം 12 ഗെയ്മിംഗ് കമ്പനികള്‍ക്കായി 55 ,000 കോടി രൂപയ്ക്ക് മുകളിലുള്ള നികുതി ഡിമാന്‍ഡ് നോട്ടീസ് ജിഎസ്‍ടി അധികൃതര്‍ അയച്ചിട്ടുണ്ട്. ഗെയ്മിംഗ് കമ്പനികളുടെ മൊത്തം വാതുവെപ്പ് തുകയ്ക്കു മേലുള്ള ജിഎസ്‍ടി 28 ശതമാനമായി ഉയര്‍ത്തിയത് ഒക്റ്റോബര്‍ 1 മുതല്‍ നിലവില്‍ വരികയാണ്. ഇത് ഈ മേഖലയിലെ ഓഹരികളെ പുറകോട്ടു വലിച്ചേക്കും.

ഐസിഐസിഐ ലംബാര്‍ഡ് പോലെ മറ്റ് മേഖലയിലുള്ള കമ്പനികള്‍ക്കു മുന്നിലും വലിയ നികുതി ക്ലൈമുകള്‍ അധികൃതര്‍ മുന്നോട്ടുവെച്ചിട്ടുണ്ട്. രാജ്യം പൊതുതെരഞ്ഞെടുപ്പിലേക്ക് നീങ്ങിക്കൊണ്ടിരിക്കെ ഇത്തരം നീക്കങ്ങള്‍ എങ്ങനെ വിലയിരുത്തപ്പെടും എന്നതും ശ്രദ്ധ നേടും.

നിഫ്റ്റിയുടെ പ്രതിരോധവും പിന്തുണയും

നിഫ്റ്റിക്ക് 19,489 ലും തുടർന്ന് 19,424 ലും 19,320 ലും സപ്പോർട്ട് സ്വീകരിക്കുമെന്നാണ്. ഉയർന്ന ഭാഗത്ത്, 19,699 പ്രധാന റെസിസ്റ്റന്‍സ് ആകാം, തുടർന്ന് 19,764ഉം 19,869ഉം.

ആഗോള വിപണികളില്‍ ഇന്ന്

ആഴ്‌ചയിലെ അവസാന വ്യാപാര ദിനത്തിന്‍റെ തുടക്കത്തില്‍ ഏഷ്യ-പസഫിക് വിപണികൾ പൊതുവില്‍ മുന്നേറ്റത്തിലാണ്. ജപ്പാന്റെ നിക്കൈ 225 ആദ്യ വ്യാപാരത്തിൽ 0.1 ശതമാനം നേട്ടമുണ്ടാക്കി, അതേസമയം ടോപിക്സ് നഷ്ടം തുടരുകയും 0.2 ശതമാനം ഇടിയുകയും ചെയ്തു. നിക്കൈ പിന്നീട് ചാഞ്ചാട്ടത്തിലേക്ക് നീങ്ങി. ഓസ്‌ട്രേലിയയിൽ, എസ്&പി/എഎസ്എക്സ് 200 മൂന്ന് ദിവസത്തെ തുടർച്ചയായ നഷ്ടത്തിന് ശേഷം തിരിച്ചുവരവ് പ്രകടമാക്കി. ഹോങ്കോങ്ങിന്റെ ഹാംഗ് സെങ് സൂചികയും നേട്ടത്തിലാണ്. ദക്ഷിണ കൊറിയൻ, മെയിൻലാൻഡ് ചൈനീസ് വിപണികൾ ഇന്ന് അവധിയിലാണ്.

യുഎസ് വിപണികള്‍ ഇന്നലെ പൊതുവില്‍ നേട്ടത്തിലാണ്. യുഎസ് ബോണ്ടുകളില്‍ നിന്നുള്ള ആദായം 15 വര്‍ഷത്തിനിടയിലെ ഉയര്‍ന്ന നിലയില്‍ നിന്ന് അല്‍പ്പം താഴേക്ക് ഇറങ്ങിയതാണ് ഇതിന് കാരണമായത്. വ്യാഴാഴ്ച വൈകിട്ടത്തെ വ്യാപാരത്തില്‍ സ്റ്റോക്ക് ഫ്യൂച്ചറുകൾ അൽപ്പം ഉയർന്നു. ഡൗ ജോൺസ് ഇൻഡസ്ട്രിയൽ ആവറേജ് ഫ്യൂച്ചറുകൾ 0.1 ശതമാനം മുന്നേറി. എസ് & പി 500 ഫ്യൂച്ചറുകൾ 0.09 ശതമാനം ഉയർന്നപ്പോൾ നാസ്ഡാക്ക് 100 ഫ്യൂച്ചറുകൾ 0.1 ശതമാനം ഉയർന്നു. വ്യാഴാഴ്ചത്തെ പതിവ് ട്രേഡിങ്ങിൽ, ഓഹരികൾ അല്പം ഉയർന്ന് ക്ലോസ് ചെയ്തു. എസ് & പി 500 0.59 ശതമാനം കൂട്ടി, അതേസമയം ഡൗ 0.35 ശതമാനം ഉയർന്നു. നാസ്ഡാക്ക് കോമ്പോസിറ്റ് 0.83 ശതമാനം മുന്നേറി.

അഞ്ചു ദിവസത്തെ തുടര്‍ച്ചയായ നഷ്ടങ്ങള്‍ക്ക് ശേഷം യൂറോപ്യന്‍ വിപണികള്‍ ഇന്നലെ തിരിച്ചുവരവ് പ്രകടമാക്കി. പൊതുവില്‍ നേട്ടത്തിലാണ് വിപണികള്‍ ക്ലോസ് ചെയ്തത്.

ഗിഫ്റ്റ് നിഫ്റ്റി 15 പോയിന്റ് നേട്ടത്തോടെ വിശാലമായ സൂചികയ്ക്ക് നേരിയ പോസിറ്റീവ് ആരംഭത്തെ സൂചിപ്പിക്കുന്നു. ഗിഫ്റ്റ് നിഫ്റ്റി ഫ്യൂച്ചറുകൾ 19,649 പോയിന്റ് ഉയർന്നതിന് ശേഷം 19,638 പോയിന്റിലാണ്.

ഇന്ന് ശ്രദ്ധ നേടുന്ന ഓഹരികള്‍

എസ്ബിഐ ലൈഫ് ഇൻഷുറൻസ് കമ്പനി: ലൈഫ് ഇൻഷുറൻസ് കമ്പനിക്ക് 2023 ഒക്ടോബർ 1 മുതൽ മാനേജിംഗ് ഡയറക്ടറും സിഇഒയുമായി അമിത് ജിൻഗ്രാനെ നിയമിക്കുന്നതിനുള്ള ബോർഡ് അംഗീകാരം ലഭിച്ചു. കമ്പനിയുടെ നിലവിലെ മാനേജിംഗ് ഡയറക്ടറും സിഇഒയുമായ മഹേഷ് കുമാർ ശർമ്മ കോർപ്പറേറ്റ് സെന്ററിലെ എസ്ബിഐയിൽ ഡെപ്യൂട്ടി മാനേജിംഗ് ഡയറക്ടറായി നിയമിച്ചു.

ടിസിഎസ്: കാന്‍റര്‍ ബ്രാന്‍ഡ്‍സ് ടോപ്പ് 75 റിപ്പോർട്ട് അനുസരിച്ച് ടാറ്റ കൺസൾട്ടൻസി സർവീസസ് 43 ബില്യൺ ഡോളര്‍ മൂല്യവുമായി ഇന്ത്യയിലെ ഏറ്റവും മൂല്യമുള്ള ബ്രാൻഡായി തുടരുന്നു.

ഹാപ്പിയസ്റ്റ് മൈൻഡ്സ് ടെക്നോളജീസ്: സിഎന്‍ബിസി റിപ്പോർട്ട് അനുസരിച്ച്, പ്രൊമോട്ടർ അശോക് സൂട കമ്പനിയുടെ ഏകദേശം 1.1 ശതമാനം ഓഹരികൾ ബ്ലോക്ക് ഡീലുകൾ വഴി വിറ്റു. മെഡിക്കൽ ഗവേഷണത്തിനായുള്ള പബ്ലിക് ചാരിറ്റബിൾ ട്രസ്റ്റായ എസ്കെഎഎന്‍, ഹാപ്പിയസ്റ്റ് ഹെൽത്ത് എന്നിവയ്ക്കാണ് ഓഹരികൾ വിറ്റത്. ഇതോടെ അശോക് സൂതയുടെ ഓഹരി 51.24 ശതമാനത്തിൽ നിന്ന് 50.13 ശതമാനമായി കുറഞ്ഞു.

അദാനി ഗ്രീൻ എനർജി & അദാനി എനർജി സൊല്യൂഷൻസ്: അദാനി ഗ്രീൻ എനർജി, അദാനി എനർജി സൊല്യൂഷൻസ് എന്നീ രണ്ട് അദാനി ഗ്രൂപ്പ് കമ്പനികളിൽ ഒരു ശതമാനത്തിലധികം ഓഹരികൾ കൈവശം വച്ചിരുന്ന അബുദാബി ആസ്ഥാനമായുള്ള ഇന്റർനാഷണൽ ഹോൾഡിംഗ് കമ്പനി (ഐഎച്ച്‌സി) തങ്ങളുടെ ഓഹരികള്‍ വില്‍ക്കുന്നതിനായി കരാറില്‍ എത്തിയതായി സിഎന്‍ബിസി റിപ്പോര്‍ട്ട് ചെയ്യുന്നു.

ഇമാമി: ആക്‌സിയം ആയുർവേദയിലും അതിന്റെ അനുബന്ധ സ്ഥാപനങ്ങളിലും 26 ശതമാനം ഇക്വിറ്റി ഓഹരികൾ സ്വന്തമാക്കിക്കൊണ്ട് ജ്യൂസ് വിഭാഗത്തിലേക്ക് കടക്കുന്നതായി ഈ പെഴ്സണല്‍ കെയര്‍-ഹെല്‍ത്ത് കെയര്‍ കമ്പനി പ്രഖ്യാപിച്ചു. ഇടപാട് മുൂല്യം വെളിപ്പെടുത്തിയിട്ടില്ല. അലോഫ്രൂട്ട് എന്ന ബ്രാൻഡിന് കീഴിലാണ് ആക്‌സിയം പാനീയങ്ങള്‍ വിപണനം ചെയ്യുന്നത്.

സരേഗമ ഇന്ത്യ: ഡിജിറ്റൽ വിനോദ കമ്പനിയായ പോക്കറ്റ് ഏസസ് പിക്‌ചേഴ്‌സിന്റെ 51.8 ശതമാനം ഓഹരികൾ 174 കോടി രൂപയ്ക്ക് ഈ മ്യൂസിക് ലേബൽ വമ്പന്‍ സ്വന്തമാക്കും. അടുത്ത 15 മാസത്തിനുള്ളിൽ മറ്റൊരു ~41 ശതമാനം ഓഹരികൾ സ്വന്തമാക്കാനും പദ്ധതിയുണ്ട്.

ക്രൂഡ് ഓയിലും സ്വര്‍ണവും

യുഎസ് ക്രൂഡ് സ്റ്റോക്കുകളുടെ കുത്തനെ ഇടിവ് ആഗോള വിതരണത്തെക്കുറിച്ചുള്ള ആശങ്കകൾക്ക് ആക്കം കൂട്ടി, കഴിഞ്ഞ സെഷനിൽ 2023 ലെ ഏറ്റവും ഉയർന്ന സെറ്റിൽമെന്റിലേക്ക് ഉയർന്നതിന് ശേഷം വ്യാഴാഴ്ച ഏഷ്യൻ വ്യാപാരത്തിന്റെ തുടക്കത്തിൽ എണ്ണ വില ഉയർന്നു. ബ്രെന്റ് ക്രൂഡ് ഫ്യൂച്ചറുകൾ 16 സെൻറ് ഉയർന്ന് ബാരലിന് 96.71 ഡോളറിലെത്തി. യുഎസ് വെസ്റ്റ് ടെക്സസ് ഇന്റർമീഡിയറ്റ് ക്രൂഡ് ഫ്യൂച്ചറുകൾ 20 സെൻറ് ഉയർന്ന് 93.88 ഡോളറിലെത്തി. എന്നാല്‍ നിക്ഷേപകര്‍ ലാഭമെടുപ്പിലേക്ക് നീങ്ങിയതോടെ വ്യാഴാഴ്ച രാത്രി വ്യാപാരത്തില്‍ ക്രൂഡ് ഫ്യൂച്ചറുകള്‍ ഒരു ശതമാനത്തോളം ഇടിവ് പ്രകടമാക്കി.

കഴിഞ്ഞ സെഷനിൽ വില ആറുമാസത്തെ ഏറ്റവും താഴ്ന്ന നിലവാരത്തിലെത്തിയെങ്കിലും വിപണികൾ യുഎസ് സാമ്പത്തിക ഡാറ്റയ്ക്കായി കാത്തിരുന്നതിനാൽ വ്യാഴാഴ്ച സ്വർണം സ്ഥിരത കൈവരിച്ചു. സ്‌പോട്ട് ഗോൾഡ് 1.4 ശതമാനം ഇടിഞ്ഞതിന് ശേഷം ഔൺസിന് 1,874.49 ഡോളറിലെത്തി, ജൂലൈയ്ക്ക് ശേഷമുള്ള ഏറ്റവും വലിയ പ്രതിദിന ഇടിവ്. യുഎസ് സ്വർണ്ണ ഫ്യൂച്ചറുകൾ 1,891.30 ഡോളറായിരുന്നു.

വിദേശ നിക്ഷേപങ്ങളുടെ ഗതി

വിദേശ നിക്ഷേപക സ്ഥാപനങ്ങള്‍ (എഫ്‌ഐഐ) 3,364.22 കോടി രൂപയുടെ ഓഹരികൾ ഇന്നലെ വിറ്റു, ആഭ്യന്തര നിക്ഷേപക സ്ഥാപനങ്ങള്‍ (ഡിഐഐ) 2,711.48 കോടി രൂപയുടെ ഓഹരികൾ വാങ്ങിയെന്നും എൻഎസ്‌ഇ-യുടെ കണക്കുകൾ വ്യക്തമാക്കുന്നു.

വിദേശ പോര്‍ട്ട്ഫോളിയോ നിക്ഷേപകര്‍ ( എഫ്‍പിഐ) ഇന്നലെ ഇക്വിറ്റികളില്‍ 2189.32 കോടി രൂപയുടെ അറ്റ വില്‍പ്പനയും ഡെറ്റ് വിപണിയില്‍ 234.86 കോടി രൂപയുടെ അറ്റ വില്‍പ്പനയും നടത്തി.

വിപണി തുറക്കും മുമ്പുള്ള മൈഫിന്‍ ടിവിയുടെ അവലോകന പരിപാടി കാണാം

നിരാകരണം: ഈ ലേഖനം വിജ്ഞാനത്തെ മാത്രം ഉദ്ദേശിച്ചുള്ളതാണ്, നിക്ഷേപ ശുപാര്‍ശയല്ല. ഓഹരി നിക്ഷേപം വിപണിയുടെ ലാഭ നഷ്ട സാധ്യതകൾക്ക് വിധേയമാണ്. ഓഹരി വിപണിയിൽ നിക്ഷേപിക്കും മുമ്പെ അംഗീകൃത സാമ്പത്തിക വിദഗ്ധന്റെ സേവനം തേടേണ്ടതാണ്. നിക്ഷേപങ്ങളിലൂടെയുണ്ടാകുന്ന നഷ്ടങ്ങള്‍ക്ക് ലേഖകനോ മൈഫിന്‍ പോയിന്‍റിനോ ഉത്തവരാദിത്തം ഉണ്ടായിരിക്കുന്നതല്ല.

കഴിഞ്ഞ ദിവസങ്ങളിലെ പ്രീ മാര്‍ക്കറ്റ് അവലോകനങ്ങള്‍ ഇവിടെ വായിക്കാം