വിപണികള്‍ ആവേശത്തില്‍, കുതിപ്പില്‍ ചേര്‍ന്ന് എണ്ണയും സ്വര്‍ണവും; ഇന്ന് വിപണി തുറക്കുംമുമ്പ് അറിയേണ്ടത്

ആറു ദിവസത്തെ കണ്‍സോളിഡേഷന് ശേഷം അടിസ്ഥാന ഓഹരി വിപണി സൂചികകള്‍ ഇന്നലെ വീണ്ടും വന്‍കുതിപ്പിലേക്ക് നീങ്ങി. പുതിയ സര്‍വകാല ഉയരങ്ങളിലും റെക്കോഡ് ക്ലോസിംഗിലും സെന്‍സെക്സും നിഫ്റ്റിയും എത്തി. ബിഎസ്ഇ സെൻസെക്‌സ് ആദ്യമായി 70,500 ലെവലിൽ എത്തി, 930 പോയിന്റ് ഉയർന്ന് 70,514 ല്‍ വ്യാപാരം അവസാനിപ്പിച്ചു.. നിഫ്റ്റി-50 21,211 എന്ന പുതിയ ഉയരത്തിലെത്തി, 256 പോയിന്റ് ഉയർന്ന് 21,183ല്‍ സെഷന്‍ അവസാനിപ്പിച്ചു.

യുഎസ് ഫെഡ് റിസര്‍വ് അടുത്ത വര്‍ഷം മൂന്നു തവണ പലിശ കുറയ്ക്കാന്‍ തയാറെടക്കുന്നു എന്ന് വ്യക്തമാക്കിയതോടെ ആഗോള തലത്തില്‍ ഉണ്ടായ മുന്നേറ്റത്തെ ഇന്ത്യന്‍ വിപണികളും ഏറ്റെടുത്തു. ഇന്ത്യയിലും പലിശ നിരക്കുകള്‍‍ കുറഞ്ഞു തുടങ്ങുമെന്ന പ്രതീക്ഷയില്‍ ഇന്നലെ ബാങ്ക് നിഫ്റ്റിയും പുതിയ ഉയരം കുറിച്ചിട്ടുണ്ട്. ഐടി ഓഹരികളാണ് ഏറ്റവുമധികം നേട്ടമുണ്ടാക്കിയത്. നിഫ്റ്റി മിഡ്‌ക്യാപ് 100, സ്‌മോൾക്യാപ് 100 സൂചികകൾ യഥാക്രമം 1.3 ശതമാനവും 0.9 ശതമാനവും ഉയർന്നു.

ഹോളിഡേ ഷോപ്പിംഗ് സീസൺ നേരത്തേ ആരംഭിച്ചതിനാൽ നവംബറിൽ യുഎസ് റീട്ടെയിൽ വിൽപ്പന അപ്രതീക്ഷിതമായി ഉയർന്നു. ചില്ലറ വിൽപ്പന കഴിഞ്ഞ മാസം 0.3 ശതമാനം ഉയർന്നതായി വാണിജ്യ വകുപ്പിന്റെ സെൻസസ് ബ്യൂറോ പുറത്തുവിട്ട ഡാറ്റ വ്യക്തമാക്കുന്നു. പലിശ നിരക്കുകള്‍ മാറ്റമില്ലാതെ നിലനിര്‍ത്താനുള്ള ബാങ്ക് ഓഫ് ഇംഗ്ലണ്ടിന്‍റെയും യൂറോപ്യന്‍ കേന്ദ്ര ബാങ്കിന്‍റെയും (ഇസിബി) തീരുമാനങ്ങള്‍ ഇന്നലെ പുറത്തുവന്നതും ആഗോള ഓഹരി വിപണി നിക്ഷേപകരെ അല്‍പ്പം നിരാശയിലാക്കിയിട്ടുണ്ട്.

നിഫ്റ്റിയുടെ പ്രതിരോധവും പിന്തുണയും

പിവറ്റ് പോയിന്റ് കാൽക്കുലേറ്റർ സൂചിപ്പിക്കുന്നത് നിഫ്റ്റി 21,208 ലും തുടർന്ന് 21,240 ലും 21,293 ലും പ്രതിരോധം കാണാനിടയുണ്ട് എന്നാണ്. അതേസമയം താഴ്ച്ചയുടെ സാഹചര്യത്തില്‍ 21,104 ലും തുടർന്ന് 21,072, 21,020 ലെവലുകളിലും പിന്തുണ എടുക്കാം.

ആഗോള വിപണികളില്‍ ഇന്ന്

യുഎസ് വിപണികള്‍ വ്യാഴാഴ്ചത്തെ വ്യാപാരത്തിലും നേട്ടം തുടര്‍ന്നു. എസ് & പി 500 0.26 ശതമാനം ഉയർന്ന് 4,719.55 പോയിന്റിലെത്തി. 2022 ജനുവരിയിലെ റെക്കോർഡ് ക്ലോസിൽ നിന്ന് ഇത് 2 ശതമാനത്തിൽ മാത്രം താഴെയാണ്. നാസ്ഡാക്ക് കോമ്പോസിറ്റ് സൂചിക 0.19 ശതമാനം ഉയർന്ന് 14,761.56 പോയിന്റിലും ഡൗ ജോൺസ് ഇൻഡസ്ട്രിയൽ ആവറേജ് 0.43 ശതമാനം ഉയർന്ന് 37,248.35 പോയിന്റിലും എത്തി.

യൂറോപ്യന്‍ വിപണികളും പൊതുവില്‍ നേട്ടത്തോടെയാണ് വ്യാഴാഴ്ചത്തെ വ്യാപാരം അവസാനിപ്പിച്ചിട്ടുള്ളത്.

ഏഷ്യന്‍ വിപണികളും പച്ച വിടാതെ മുന്നോട്ട് നീങ്ങുകയാണ്. ഓസ്‌ട്രേലിയ എഎസ്എക്സ്, ചൈനയിലെ ഷങ്ഹായ് എസ്ഇ കോംപോസിറ്റ്, ഹോങ്കോംഗിലെ ഹാങ് സെങ്, ജപ്പാനിലെ നിക്കി എന്നിവയെല്ലാം നേട്ടത്തില്‍ വ്യാപാരം നടത്തുന്നു.

ഗിഫ്റ്റ് നിഫ്റ്റി മികട്ട നേട്ടത്തോടെയാണ് ഇന്ന് വ്യാപാരം നടത്തുന്നത്. ആഭ്യന്തര വിപണി സൂചികകളുടെ പോസിറ്റിവ് തുടക്കത്തെ ഡെറിവേറ്റിവ് വിപണി സൂചിപ്പിക്കുന്നു.

ഇന്ന് ശ്രദ്ധ നേടുന്ന ഓഹരികള്‍

ഹീറോ മോട്ടോകോർപ്പ്: രാജ്യത്തെ ഏറ്റവും വലിയ ഇരുചക്രവാഹന നിർമ്മാതാവ്, തങ്ങളുടെ അസോസിയേറ്റ് കമ്പനിയായ ആതർ എനർജിയുടെ അധിക ഓഹരികൾ നിലവിലുള്ള ഓഹരിയുടമയിൽ നിന്ന് 140 കോടി രൂപയ്ക്ക് വാങ്ങും. കൂടാതെ, വിവേക് ​​ആനന്ദിനെ ചീഫ് ഫിനാൻഷ്യൽ ഓഫീസറായി (സിഎഫ്ഒ) ഹീറോ നിയമിച്ചു, ഇത് 2024 മാർച്ച് 1 മുതൽ പ്രാബല്യത്തിൽ വരും.

സ്റ്റേറ്റ് ബാങ്ക് ഓഫ് ഇന്ത്യ: പേപ്പർ അടിസ്ഥാനമാക്കിയുള്ള പാക്കേജിംഗ് സൊല്യൂഷനുകൾ നൽകുന്ന ക്യാന്‍പാക്ക് ട്രെന്‍ഡ്‍സിൽ 6.35 ശതമാനം ഓഹരികൾ വാങ്ങുന്നതിനുള്ള ഇടപാട് എസ്ബിഐ ഏകദേശം 50 കോടി രൂപയ്ക്ക് പൂര്‍ത്തിയാക്കി. ഓഹരി ഒന്നിന് 1,349 രൂപ നിരക്കിലാണ് ഓഹരി വാങ്ങുന്നത്.

പിവിആര്‍ ഐനോക്സ്: മൾട്ടിപ്ലക്‌സ് ശൃംഖലയിലെ 2.33 ശതമാനം ഓഹരികൾ പ്ലെന്റി പ്രൈവറ്റ് ഗ്രൂപ്പ് & മൾട്ടിപ്പിൾസ് പ്രൈവറ്റ് ഗ്രൂപ്പ് വിൽക്കാൻ സാധ്യതയുണ്ടെന്ന് സിഎന്‍ബിസി റിപ്പോർട്ട് ചെയ്തു. ഓഫർ വില ഒരു ഓഹരിക്ക് 1,750-1,769.5 രൂപയാണ്, ഓഫർ വലുപ്പം 404.5 കോടി രൂപയാണെന്നും റിപ്പോര്‍ട്ടില്‍ പറയുന്നു.

എം ആൻഡ് എം ഫിനാൻഷ്യൽ സർവീസസ്: ലൈഫ്, ഹെൽത്ത്, ജനറൽ ഇൻഷുറൻസ് മേഖലകളിലേക്ക് പ്രവേശിക്കുന്നതിന് ഡയറക്ടർ ബോർഡിൽ നിന്ന് അനുമതി ലഭിച്ചതായി ബാങ്കിംഗ് ഇതര ധനകാര്യ കമ്പനി അറിയിച്ചു.

ടെക്‌സ്‍മാകോ റെയിൽ എഞ്ചിനീയറിംഗ്: 1,374.41 കോടി രൂപ വിലയുള്ള 3,400 BOXNS വാഗണുകൾ നിർമ്മിക്കുന്നതിനും വിതരണം ചെയ്യുന്നതിനുമായി റെയിൽവേ മന്ത്രാലയം കമ്പനിക്ക് ഓർഡർ നൽകി.

ക്രൂഡ് ഓയിലും സ്വര്‍ണവും

വ്യാഴാഴ്ച എണ്ണവില 3 ശതമാനം ഉയർന്ന് മുൻ സെഷനിലെ നേട്ടങ്ങൾ വർധിപ്പിച്ചു. ദുർബലമായ ഡോളർ , അന്താരാഷ്ട്ര ഊർജ ഏജൻസി (ഐ‌ഇ‌എ) അടുത്ത വർഷത്തേക്കുള്ള എണ്ണ ഡിമാൻഡ് പ്രവചനം ഉയർത്തിയത് എന്നിവയെല്ലാം എണ്ണ വിപണിക്ക് കരുത്തായി. ബ്രെന്റ് ഫ്യൂച്ചറുകൾ 3.2 ശതമാനം, ഒരു ബാരലിന് 76.61 ഡോളര്‍ എന്ന നിലയിലാണ്. യുഎസ് വെസ്റ്റ് ടെക്സസ് ഇന്റർമീഡിയറ്റ് (ഡബ്ല്യുടിഐ) ക്രൂഡ് 3 ശതമാനം ഉയർന്ന് 71.58 ഡോളറിലെത്തി.

യുഎസ് ഡോളറും ട്രഷറി യീൽഡും ഇടിഞ്ഞതിനാൽ വ്യാഴാഴ്ച സ്വർണ്ണ വില 10 ദിവസത്തെ ഏറ്റവും ഉയർന്ന നിലയിലെത്തി. സ്‌പോട്ട് ഗോൾഡ് 0.4 ശതമാനം ഉയർന്ന് ഔൺസിന് 2,034.31 ഡോളറിലെത്തി. യുഎസ് ഗോള്‍ഡ് ഫ്യൂച്ചറുകൾ 2.4 ശതമാനം ഉയർന്ന് 2,044.90 ഡോളറിലെത്തി.

വിദേശ നിക്ഷേപങ്ങളുടെ ഗതി

വിദേശ നിക്ഷേപക സ്ഥാപനങ്ങള്‍ (എഫ്‌ഐഐ) 3,570.07 കോടി രൂപയുടെ അറ്റവാങ്ങല്‍ ഇന്നലെ ഓഹരികളില്‍ നടത്തി, ആഭ്യന്തര നിക്ഷേപക സ്ഥാപനങ്ങള്‍ (ഡിഐഐകൾ) 553.17 കോടി രൂപയുടെ അറ്റവാങ്ങല്‍ നടത്തിയതായും നാഷണൽ സ്റ്റോക്ക് എക്‌സ്‌ചേഞ്ചിന്റെ (എൻഎസ്‌ഇ) താൽക്കാലിക കണക്കുകൾ വ്യക്തമാക്കുന്നു.

മുന്‍ ദിവസങ്ങളിലെ പ്രീ-മാര്‍ക്കറ്റ് അവലോകനങ്ങള്‍

നിരാകരണം: ഈ ലേഖനം വിജ്ഞാനത്തെ മാത്രം ഉദ്ദേശിച്ചുള്ളതാണ്, നിക്ഷേപ ശുപാര്‍ശയല്ല. ഓഹരി നിക്ഷേപം വിപണിയുടെ ലാഭ നഷ്ട സാധ്യതകൾക്ക് വിധേയമാണ്. ഓഹരി വിപണിയിൽ നിക്ഷേപിക്കും മുമ്പെ അംഗീകൃത സാമ്പത്തിക വിദഗ്ധന്റെ സേവനം തേടേണ്ടതാണ്. നിക്ഷേപങ്ങളിലൂടെയുണ്ടാകുന്ന നഷ്ടങ്ങള്‍ക്ക് ലേഖകനോ മൈഫിന്‍ പോയിന്‍റിനോ ഉത്തവരാദിത്തം ഉണ്ടായിരിക്കുന്നതല്ല.

വിപണി തുറക്കും മുന്‍പുള്ള മൈഫിന്‍ ടിവിയിലെ ലൈവ് അവലോകനം കാണാം