വിപണിയിൽ ചാഞ്ചാട്ടം തുടരുന്നു; പുതു ഉയരങ്ങൾ താണ്ടി സൂചികകൾ

ആഭ്യന്തര സൂചികകൾ ഇന്ന് വ്യാപാരം ആരംഭിച്ചത് പുതിയ റെക്കോർഡുകളൊടെയാണ്. ആദ്യഘട്ട വ്യാപാരത്തിൽ സൂചികകൾ പുതിയ റെക്കോർഡ് ഉയരം താണ്ടിയെങ്കിലും നേട്ടങ്ങൾ നിലനിർത്താനായില്ല. ആഗോള വിപണികളിൽ നിന്നുള്ള ദുർബലമായ വ്യാപാരം വിപണിക്ക് വിനയായി.

സെൻസെക്‌സ് ആദ്യഘട്ട വ്യാപാരത്തിൽ 81,587.76 എന്ന എക്കാലത്തെയും ഉയർന്ന പോയിന്റിലെത്തി. തുടർന്നുള്ള വ്യാപാരത്തിൽ സൂചിക 166.93 പോയിൻ്റ് ഇടിഞ്ഞ് 81,176.53 ൽ എത്തി. നിഫ്റ്റിയും 73.1 പോയിൻ്റ് താഴ്ന്ന് 24,727.75 ലെത്തി. തുടക്ക വ്യാപാരത്തിൽ സൂചിക 24,854.80 എന്ന പുതിയ റെക്കോർഡിലെത്തിയിരുന്നു.

നിഫ്റ്റിയിൽ ഇൻഫോസിസ്, എൽടിഐ മൈൻഡ്ട്രീ, എച്ച്സിഎൽ ടെക്, ബ്രിട്ടാനിയ ഇൻഡസ്ട്രീസ്, ഐടിസി എന്നിവ മികച്ച നേട്ടമുണ്ടാക്കിയപ്പോൾ പവർ ഗ്രിഡ്, ബിപിസിഎൽ, ഹിൻഡാൽകോ, അൾട്രാടെക് സിമൻറ്, ടാറ്റ സ്റ്റീൽ എന്നിവ നഷ്ടത്തിലായി.

സെക്ടറൽ സൂചികകളിൽ ഇൻഫോസിസ് ഓഹരികളുടെ കുതിപ്പിൽ നിഫ്റ്റി ഐടി സൂചിക നേട്ടത്തിലെത്തി. എൽടിഐ മൈൻഡ്ട്രീ, എച്ച്സിഎൽ ടെക്, ടിസിഎസ് ഓഹരികളും സൂചികയ്ക്ക് കരുത്തേകി. നിഫ്റ്റി റിയൽറ്റി സൂചികയാണ് ഏറ്റവും കൂടുതൽ ഇടിഞ്ഞത്. പിന്നാലെ നിഫ്റ്റി മെറ്റൽ, പവർ സൂചികയും ഇടിവ് നേരിട്ടു.

അസ്ഥിരത അളക്കുന്ന ഇന്ത്യ വിക്സ് സൂചിക 1.6 ശതമാനം ഉയർന്ന് 14.7ൽ എത്തി.

മിഡ്‌ക്യാപ്, സ്‌മോൾക്യാപ് സൂചികകൾ യഥാക്രമം 0.9, 0.8 ശതമാനം ഇടിവ് രേഖപ്പെടുത്തി.

ഏപ്രിൽ-ജൂൺ പാദത്തിൽ സംയോജിത അറ്റാദായം 7 ശതമാനം ഉയർന്ന് 6,368 കോടി രൂപയായി റിപ്പോർട്ട് ചെയ്ത ഇൻഫോസിസ് ഏകദേശം 3 ശതമാനം ഉയർന്നു.

ഏഷ്യൻ വിപണികളിൽ സിയോൾ, ടോക്കിയോ, ഷാങ്ഹായ്, ഹോങ്കോങ് എന്നിവ നാശത്തിലാണ് വ്യാപാരം നടത്തുന്നത്. യുഎസ് വിപണികൾ ചുവപ്പിലാണ് വ്യാപാരം അവസാനിപ്പിച്ചത്.

ബ്രെൻ്റ് ക്രൂഡ് 0.41 ശതമാനം ഇടിഞ്ഞ് ബാരലിന് 84.76 ഡോളറിലെത്തി. വിദേശ നിക്ഷേപ സ്ഥാപനങ്ങൾ (എഫ്ഐഐ) വ്യാഴാഴ്ച 5,483.63 കോടി രൂപയുടെ ഓഹരികൾ വാങ്ങി. സ്വർണം ട്രോയ് ഔൺസിന് 1.17 ശതമാനം താഴ്ന്ന് 2427 ഡോളറിലെത്തി. യുഎസ് ഡോളറിനെതിരെ രൂപയുടെ മൂല്യം 1 പൈസ ഇടിഞ്ഞ് 83.64 എത്തി.