കരുത്തരായി ഐടി, ബാങ്കിംഗ് ഓഹരികൾ; സെൻസെക്സും നിഫ്റ്റിയും പുതിയ റെക്കോർഡിൽ

പുതിയ റെക്കോർഡുകളോടെയാണ് ആഭ്യന്തര സൂചികകൾ ഇന്ന് വ്യപാരം അവസാനിപ്പിച്ചത്. സെൻസെക്‌സ് 443 പോയിൻ്റ് ഉയർന്ന് പുതിയ റെക്കോർഡ് ഉയരത്തിൽ ക്ലോസ് ചെയ്തു. ഏഷ്യൻ, യൂറോപ്യൻ വിപണികളിലെ നേട്ടം സൂചികകൾക്ക് കരുത്തായി. ബാങ്കിംഗ്, ഐടി ഓഹരികളിലെ ഉയർന്നു വന്ന വാങ്ങലും സൂചികകൾ ഉയരത്തിലെത്തിച്ചു.

സെൻസെക്‌സ് 443.46 പോയിൻ്റ് അഥവാ 0.56 ശതമാനം ഉയർന്ന് 79,476.19 ലും നിഫ്റ്റി 131.35 പോയിൻ്റ് അഥവാ 0.55 ശതമാനം ഉയർന്ന് 24,141.95 ലുമാണ് ക്ലോസ് ചെയ്തത്.

ടെക് മഹീന്ദ്ര, വിപ്രോ, ബജാജ് ഫിനാൻസ്, അൾട്രാടെക് സിമൻ്റ്, ഗ്രാസിം ഇൻഡസ്ട്രീസ് തുടങ്ങിയ ഓഹരികൾ നിഫ്റ്റിയിൽ നേട്ടമുണ്ടാക്കിയപ്പോൾ എൻടിപിസി, ഐഷർ മോട്ടോഴ്‌സ്, ഡോ.റെഡ്ഡീസ് ലാബ്‌സ്, എസ്ബിഐ, അപ്പോളോ ഹോസ്പിറ്റൽസ് തുടങ്ങി ഓഹരികൾ നഷ്ടത്തിലാണ് ക്ലോസ് ചെയ്തത്.

സെക്ടറിൽ സൂചികകളിൽ നിഫ്റ്റി പവർ, പിഎസ്‌യു ബാങ്ക്, റിയാലിറ്റി ഒഴികെയുള്ള എല്ലാ സൂചികകളും നേട്ടത്തോടെയാണ് ക്ലോസ് ചെയ്തത്. നിഫ്റ്റി ഐടി സൂചിക രണ്ട് ശതമാനത്തോളം ഉയർന്നു. ബിഎസ്ഇ മിഡ്‌ക്യാപ്, സ്‌മോൾക്യാപ് സൂചികകൾ 1 ശതമാനത്തിലധികം ഉയർന്നു.

ഏഷ്യൻ വിപണികളിൽ സിയോൾ, ടോക്കിയോ, ഷാങ്ഹായ് എന്നിവ നേട്ടത്തിലാണ്. യൂറോപ്യൻ വിപണികൾ നേട്ടത്തിലാണ് വ്യാപാരം തുടരുന്നത്. വെള്ളിയാഴ്ച യുഎസ് വിപണികൾ നഷ്ടത്തിലാണ് ക്ലോസ് ചെയ്തത്.

ബ്രെൻ്റ് ക്രൂഡ് 0.51 ശതമാനം ഉയർന്ന് ബാരലിന് 85.43 ഡോളറിലെത്തി. വിദേശ നിക്ഷേപ സ്ഥാപനങ്ങൾ (എഫ്ഐഐ) വെള്ളിയാഴ്ച 23.09 കോടി രൂപയുടെ ഓഹരികൾ വിറ്റു. സ്വർണം ട്രോയ് ഔൺസിന് 0.14 ശതമാനം ഉയർന്ന് 2343 ഡോളറിലെത്തി. യുഎസ് ഡോളറിനെതിരെ രൂപയുടെ മൂല്യം 11 പൈസ ഇടിഞ്ഞ് 83.45 എത്തി.

ടെക് മഹീന്ദ്ര, ഗ്രാസിം ഇൻഡസ്ട്രീസ്, അൾട്രാടെക് സിമൻ്റ്, പിബി ഫിൻടെക്, പെർസിസ്റ്റൻ്റ് സിസ്റ്റംസ്, എസിസി, എൽ ആൻഡ് ടി ഫിനാൻസ്, ഇമാമി, ഒറാക്കിൾ ഫിനാൻഷ്യൽ സർവീസസ്, ഇന്ദ്രപ്രസ്ഥ ഗ്യാസ്, ഗ്ലെൻമാർക്ക് ഫാർമ, ബയോകോൺ ഫാർമ, എൽഐസി ഹൗസിംഗ് ഫിനാൻസ് തുടങ്ങി 300-ലധികം ഓഹരികൾ ബിഎസ്ഇയിൽ 52 ആഴ്ചയിലെ ഏറ്റവും ഉയർന്ന നിലയിലെത്തി.