അവസാനം നേരിയ നേട്ടത്തിൽ സൂചികകൾ; 5.50 ട്രില്യൺ ഡോളറിലെത്തി വിപണി മൂല്യം

ആഭ്യന്തര വിപണി ഇന്ന് വ്യാപാരം അവസാനിപ്പിച്ചത് നേരിയ നേട്ടത്തോടെയാണ്. തുടർച്ചയായി മൂന്നാം ദിവസമാണ് സൂചികകൾ നേട്ടത്തോടെ ക്ലോസ് ചെയ്യുന്നത്. ഏറെ ചാഞ്ചാട്ടം നിറഞ്ഞ വ്യാപാരത്തിൽ സൂചികകൾക്ക് കരുത്തേകിയത് ടാറ്റ മോട്ടോർസ്, എച്ഡിഎഫ്സി ഓഹരികളാണ്. ബിഎസ്ഇ-ലിസ്റ്റുചെയ്ത എല്ലാ കമ്പനികളുടെ സംയുക്ത വിപണി മൂല്യം ആദ്യമായി 5.50-ട്രില്യൺ ഡോളറെന്ന നാഴികകല്ലിലെത്തി.

സെൻസെക്സ് 99.56 പോയിൻറ് അഥവാ 0.12 ശതമാനം ഉയർന്ന് 81,455.40-ൽ ക്ലോസ് ചെയ്തു. നിഫ്റ്റി 21.20 പോയിൻ്റ് അഥവാ 0.09 ശതമാനം ഉയർന്ന് 24,857.30 എന്ന എക്കാലത്തെയും ഉയർന്ന ക്ലോസിംഗിലെത്തി.

സെൻസെക്സിൽ ടാറ്റ മോട്ടോഴ്‌സ്, എൻടിപിസി, ബജാജ് ഫിൻസെർവ്, പവർ ഗ്രിഡ് കോർപ്, ടൈറ്റൻ, ഏഷ്യൻ പെയിൻ്റ്‌സ്, ഇൻഡസ്ഇൻഡ് ബാങ്ക്, മാരുതി സുസുക്കി ഇന്ത്യ, ടാറ്റ സ്റ്റീൽ തുടങ്ങിയ ഓഹരികൾ നേട്ടത്തിലാണ് ക്ലോസ് ചെയ്തത്. സൺ ഫാർമസ്യൂട്ടിക്കൽസ്, ഐടിസി, ഹിന്ദുസ്ഥാൻ യുണിലിവർ, ഭാരതി എയർടെൽ, അൾട്രാടെക് സിമൻ്റ്, റിലയൻസ് ഇൻഡസ്ട്രീസ് തുടങ്ങിയ ഓഹരികൾ ഇടിഞ്ഞു.

ഏഷ്യൻ വിപണികളിൽ സിയോൾ, ടോക്കിയോ, ഷാങ്ഹായ്, ഹോങ്കോംഗ് എന്നിവ നേട്ടത്തോടെയാണ് ക്ലോസ് ചെയ്തത്. യൂറോപ്യൻ വിപണികൾ സമ്മിശ്ര വ്യാപാരം തുടരുന്നു. ചൊവ്വാഴ്ച്ച യുഎസ് വിപണികൾ നേട്ടത്തോടെയാണ് ക്ലോസ് ചെയ്തത്.

ബ്രെൻ്റ് ക്രൂഡ് 0.05 ശതമാനം ഇടിഞ്ഞ് ബാരലിന് 79.73 ഡോളറിലെത്തി. വിദേശ നിക്ഷേപ സ്ഥാപനങ്ങൾ (എഫ്ഐഐ) തിങ്കളാഴ്ച 2,474.54 കോടി രൂപയുടെ ഓഹരികൾ വിറ്റു. സ്വർണം ട്രോയ് ഔൺസിന് 0.25 ശതമാനം ഉയർന്ന് 2431 ഡോളറിലെത്തി.

സെക്ടറൽ സൂചികകളിൽ നിഫ്റ്റി എനർജി സൂചികയാണ് ഏറ്റവും വലിയ നേട്ടമുണ്ടാക്കിയത്. എൻടിപിസി, പവർ ഗ്രിഡ് ഹാരികളിലെ കുതിപ്പ് സൂചികയേ ഒരു ശതമാനത്തിലധികം നേട്ടത്തിലെത്തിച്ചു. നിഫ്റ്റി ഫാർമ, ഐടി, എഫ്എംസിജി സൂചികകൾ ഇടിവ് നേരിട്ടു. ബിഎസ്ഇ സ്മോൾക്യാപ്, മിഡ്ക്യാപ് സൂചിക യഥാക്രമം 0.9 ശതമാനവും 0.3 ശതമാനവും ഉയർന്നു.