നിഫ്റ്റി താണ്ടിയത് പുതു ഉയരം; വ്യാപാരവസാനം സൂചികകൾ ഇടിവിൽ

വളരെ അസ്ഥിരമായ ദിവസത്തിനൊടുവിൽ ആഭ്യന്തര സൂചികകൾ ഇന്നത്തെ വ്യാപാരം അവസാനിപ്പിച്ചത് ഇടിവിൽ. ഐടി, മെറ്റൽ, മീഡിയ, ഓയിൽ ആൻഡ് ഗ്യാസ് ഓഹരികളുടെ വിൽപ്പനയ്ക്കിടയിൽ വിപണി നേട്ടങ്ങളെല്ലാം മായ്ച്ചുകളഞ്ഞു. മികച്ച തുടക്കത്തിന് ശേഷം നിഫ്റ്റി പുതിയ റെക്കോർഡ് ഉയരത്തിലെത്തി. തുടർന്നുള്ള വ്യാപാരത്തിൽ നേട്ടം വിപുലീകരിച്ചു. സെൻസെക്സും ഓട്ടോ, പവർ, റിയാലിറ്റി ഓഹരികളുടെ നേതൃത്വത്തിൽ 75,124.28 എന്ന റെക്കോർഡ് നിലയിലേക്ക് അടുത്തു. എന്നാൽ അവസാന മണിക്കൂറിലെ ലാഭമെടുപ്പ് എല്ലാ നേട്ടങ്ങളും ഇല്ലാതാക്കി.

സെൻസെക്‌സ് 188.50 പോയിൻ്റ് അഥവാ 0.25 ശതമാനം ഇടിഞ്ഞ് 74,482.78 ലും നിഫ്റ്റി 38.55 പോയിൻ്റ് അഥവാ 0.17 ശതമാനം ഇടിഞ്ഞ് 22,604.85 ലുമാണ് ക്ലോസ് ചെയ്തത്. ഉച്ചകഴിഞ്ഞുള്ള വ്യാപാരത്തിൽ, നിഫ്റ്റി 139.95 പോയിൻ്റ് അഥവാ 0.61 ശതമാനം ഉയർന്ന് 22,783.35 എന്ന എക്കാലത്തെയും ഉയർന്ന നിലയിലെത്തി.

നിഫ്റ്റിയിൽ എം ആൻ്റ് എം, പവർ ഗ്രിഡ് കോർപ്പറേഷൻ, ശ്രീറാം ഫിനാൻസ്, ഹീറോ മോട്ടോകോർപ്പ്, ബജാജ് ഓട്ടോ എന്നിവ മികച്ച നേട്ടമുണ്ടാക്കിയപ്പോൾ ടെക് മഹീന്ദ്ര, ബിപിസിഎൽ, ജെഎസ്ഡബ്ല്യു സ്റ്റീൽ, എച്ച്സിഎൽ ടെക്നോളജീസ്, സൺ ഫാർമ എന്നിവ നഷ്ടത്തിലാണ് വ്യാപാരം അവസാനിപ്പിച്ചത്.

നിഫ്റ്റി ഐടി, മെറ്റൽ, മീഡിയ, ഓയിൽ ആൻഡ് ഗ്യാസ്, ഹെൽത്ത്‌കെയർ എന്നിവ 0.4-1 ശതമാനം ഇടിഞ്ഞപ്പോൾ ഓട്ടോ, പവർ, റിയൽറ്റി എന്നിവ ഒരു ശതമാനത്തിലധികം ഉയർന്നു. ബിഎസ്ഇ മിഡ്‌ക്യാപ് സൂചിക 0.5 ശതമാനം ഉയർന്ന് പുതിയ ഉയരത്തിലെത്തി. സ്‌മോൾക്യാപ് സൂചിക ഫ്ലാറ്റായി ക്ലോസ് ചെയ്തു.

ഏഷ്യൻ വിപണികളിൽ സിയോൾ, ടോക്കിയോ, ഹോങ്കോംഗ് എന്നിവ നേട്ടത്തോടെ ക്ലോസ് ചെയ്തു. ഷാങ്ഹായ് നഷ്ടത്തിലാണ് ക്ലോസ് ചെയ്തത്. യൂറോപ്യൻ വിപണികളിൽ മിക്കതും താഴ്ന്ന നിലയിലാണ്. വാൾസ്ട്രീറ്റ് തിങ്കളാഴ്ച നേട്ടത്തോടെയാണ് അവസാനിച്ചത്.

ബ്രെൻ്റ് ക്രൂഡ് 0.21 ശതമാനം ഉയർന്ന് ബാരലിന് 88.59 ഡോളറിലെത്തി. സ്വർണം ട്രോയ് ഔൺസിന് 1.38 ശതമാനം താഴ്ന്ന് 2325 ഡോളറിലെത്തി. യുഎസ് ഡോളറിനെതിരെ രൂപയുടെ മൂല്യം 4 പൈസ ഉയർന്ന് 83.41 ലെത്തി. തിങ്കളാഴ്ച വിദേശ നിക്ഷേപ സ്ഥാപനങ്ങൾ (എഫ്ഐഐ) 169.09 കോടി രൂപയുടെ ഓഹരികൾ വാങ്ങി.

സെൻസെക്സ് 941.12 പോയിൻ്റ് അഥവാ 1.28 ശതമാനം ഉയർന്ന് 74,671.28 ലും നിഫ്റ്റി 223.45 പോയിൻ്റ് അഥവാ ഒരു ശതമാനം ഉയർന്ന് 22,643.40 ലുമാണ് തിങ്കളാഴ്ച ക്ലോസ് ചെയ്തത്.

മെയ് ഒന്ന് മഹാരാഷ്ട്ര ദിനമായതിനാൽ ആഭ്യന്തര ഓഹരി വിപണികൾക്ക് അവധിയായിരിക്കും.