തുടര്‍ച്ചയായ മൂന്നാം സെഷനിലും ഇടിഞ്ഞ് വിപണികള്‍

ഏഷ്യൻ വിപണികളിലെ ദുർബലമായ പ്രവണതകൾക്കും മിഡിൽ ഈസ്റ്റിലെ സംഘര്‍ഷങ്ങളെ തുടര്‍ന്ന് ബ്രെന്റ് ക്രൂഡ് ഓയിൽ വിലയിലുണ്ടായ വർധനയ്‌ക്കുമിടയിൽ തിങ്കളാഴ്ച തുടക്ക വ്യാപാരത്തില്‍ ഇടിഞ്ഞ ആഭ്യന്തര ഓഹരി വിപണിസൂചികകള്‍ പിന്നീട് നഷ്ടം നികത്തി ഏറെനേരം ഫ്ളാറ്റ് ലൈനിന് സമീപം വ്യാപാരം തുടര്‍ന്നു. പക്ഷേ അവസാന മണിക്കുറുകളില്‍ വീണ്ടും ഇടിവിലേക്ക് നീങ്ങി.

.നിഫ്റ്റി 23 പോയിന്റ് (0.12 ശതമാനം) ഇടിഞ്ഞ് 19,728.15ലും സെൻസെക്സ് 116 പോയിന്റ് (0.17 ശതമാനം) ഇടിഞ്ഞ് 66,166.93ലും ക്ലോസ് ചെയ്തു.

ടാറ്റ സ്റ്റീൽ, ആക്സിസ് ബാങ്ക്, എച്ച്സിഎൽ ടെക്നോളജീസ്, മഹീന്ദ്ര ആൻഡ് മഹീന്ദ്ര, പവർ ഗ്രിഡ് കോർപ്പറേഷൻ ഓഫ് ഇന്ത്യ എന്നിവയാണ് പ്രധാനമായി നേട്ടം സ്വന്തമാക്കിയ ഓഹരികള്‍. നെസ്‌ലെ ഇന്ത്യ, ഏഷ്യൻ പെയിന്റ്‌സ്, ഇൻഡസൈൻഡ് ബാങ്ക്, ടാറ്റ കൺസൾട്ടൻസി സർവീസസ്, സൺ ഫാർമ എന്നിവ നഷ്ടം നേരിട്ടു

ഏഷ്യൻ വിപണികളിൽ സിയോൾ, ടോക്കിയോ, ഷാങ്ഹായ്, ഹോങ്കോങ് എന്നിവ നഷ്ടത്തിലാണ് വ്യാപാരം അവസാനിപ്പിച്ചത്. വെള്ളിയാഴ്ച അമേരിക്കൻ വിപണികൾ സമ്മിശ്രമായ തലത്തിലായിരുന്നു.

"ഇസ്രായേൽ-ഹമാസ് സംഘർഷത്തിന്റെ വ്യാപനത്തെക്കുറിച്ചുള്ള ആശങ്കകൾ ബ്രെന്റ് ക്രൂഡിന്റെ വില കുത്തനെ ഉയര്‍ത്തി ബാരലിന് 90 ഡോളറിന് മുകളിലെത്തിച്ചു, സുരക്ഷിതമായ നിക്ഷേപം എന്ന വികാരം സ്വർണ്ണത്തെ 1900 ഡോളറിന് മുകളിൽ എത്തിച്ചു. യുദ്ധ സാഹചര്യത്തിന്‍റെ ഭാവി അജ്ഞാതമാണ്, അതിനാൽ നിക്ഷേപകർ ജാഗ്രത പാലിക്കണമെന്ന് വിവേകം ആവശ്യപ്പെടുന്നു," ജിയോജിത് ഫിനാൻഷ്യൽ സർവീസസിലെ ചീഫ് ഇൻവെസ്റ്റ്‌മെന്റ് സ്ട്രാറ്റജിസ്റ്റ് വി കെ വിജയകുമാർ പറഞ്ഞു.

എക്‌സ്‌ചേഞ്ച് ഡാറ്റ പ്രകാരം 317.01 കോടി രൂപയുടെ ഇക്വിറ്റികൾ വാങ്ങിയ വിദേശ സ്ഥാപന നിക്ഷേപകർ (എഫ്‌ഐഐകൾ) വെള്ളിയാഴ്ച വാങ്ങലുകാരായിരുന്നു.വെള്ളിയാഴ്ച ബി‌എസ്‌ഇ ബെഞ്ച്മാർക്ക് 125.65 പോയിന്റ് (0.19 ശതമാനം) ഇടിഞ്ഞ് 66,282.74 ൽ എത്തി. എൻഎസ്ഇ നിഫ്റ്റി 42.95 പോയിന്റ് (0.22 ശതമാനം) ഇടിഞ്ഞ് 19,751.05ല്‍ ആയിരുന്നു.