ആഗോള വിപണികൾ ഇടിഞ്ഞു, ഇന്ത്യൻ സൂചികകൾ താഴ്ന്ന് തുറക്കും

ഇന്ത്യൻ ഓഹരി വിപണി ഇന്ന് താഴ്ന്ന് തുറക്കുമെന്ന് പ്രതീക്ഷിക്കുന്നു. ഗിഫ്റ്റ് നിഫ്റ്റി ഇടിവിലാണ്. ആഗോള വിപണികളെല്ലാം തന്നെ നഷ്ടത്തിലാണ്. ഏഷ്യൻ വിപണികൾ ഇടിവിൽ വ്യാപാരം നടത്തുന്നു. യുഎസ് ഓഹരി വിപണി ഇന്നലെ നഷ്ടത്തിൽ അവസാനിച്ചു.

ഗിഫ്റ്റ് നിഫ്റ്റി

ഗിഫ്റ്റ് നിഫ്റ്റി 241 പോയിന്റ് അഥവാ 1.07 ശതമാനം ഇടിഞ്ഞ് 22,357.50 ൽ വ്യാപാരം നടത്തുന്നു. ഇത് ബുധനാഴ്ച ദലാൽ സ്ട്രീറ്റ് നെഗറ്റീവ് തുടക്കത്തിലേക്ക് നീങ്ങുന്നതിന്റെ സൂചനയാണിത്.

ഏഷ്യൻ വിപണികൾ

ഓസ്‌ട്രേലിയയിലും ജപ്പാനിലും ഓഹരികൾ ഇടിഞ്ഞു. എസ്ആൻറ് പി 500 ന്റെ ഇക്വിറ്റി-ഇൻഡെക്സ് ഫ്യൂച്ചറുകൾ 1.8% ൽ കൂടുതൽ ഇടിഞ്ഞു. ജപ്പാന്റെ നിക്കി അതിന്റെ നഷ്ട പരമ്പര തുടരുന്നു. നിലവിൽ 3.5% ത്തിലധികം കുറഞ്ഞു. ദക്ഷിണ കൊറിയയുടെ കോസ്പി 20% ഇടിഞ്ഞു.

വാൾസ്ട്രീറ്റ്

യുഎസ് ഓഹരി വിപണി ഇന്നലെ നഷ്ടത്തിൽ അവസാനിച്ചു. എസ് ആൻറ് പി 1.6% ഇടിഞ്ഞ് 4,982.77 ലെത്തി. ഒരു വർഷത്തിനിടെ ആദ്യമായി 5,000 ന് താഴെയായി. ഡൗ ജോൺസ് ഇൻഡസ്ട്രിയൽ ആവറേജ് 0.8% ഇടിഞ്ഞ് 37,645.59 ലെത്തി. നാസ്ഡാക്ക് കോമ്പോസിറ്റ് 2.2% ഇടിഞ്ഞ് 15,267.91 ലെത്തി ടെക് ഓഹരികളിൽ കനത്ത നഷ്ടം രേഖപ്പെടുത്തി.

ടെസ്ല ഓഹരി വില 4.90% ഇടിഞ്ഞു. എൻവിഡിയ ഓഹരി വില 1.37% ഇടിഞ്ഞു. അഡ്വാൻസ്ഡ് മൈക്രോ ഡിവൈസസ് ഓഹരികൾ 6.49% ഇടിഞ്ഞപ്പോൾ, ഇന്റൽ ഓഹരികൾ 7.36% ഇടിഞ്ഞു. ആപ്പിൾ ഓഹരി വില 4.98% ഇടിഞ്ഞു.

ഇന്ത്യൻ വിപണി

സെൻസെക്സ് 1089.18 പോയിന്റ് അഥവാ 1.49 ശതമാനം ഉയർന്ന്‌ 74,227.08 ലും നിഫ്റ്റി 374.25 പോയിന്റ് അഥവാ 1.69 ശതമാനം ഉയർന്ന്‌ 22,535.85 ലും ക്ലോസ് ചെയ്തു. സെൻസെക്സ് ഓഹരികളിൽ പവർ ഗ്രിഡ് ഒഴികെയുള്ള എല്ലാ ഓഹരികളും നേട്ടത്തിൽ അവസാനിച്ചു. ടൈറ്റൻ, ബജാജ് ഫിനാൻസ്, സ്റ്റേറ്റ് ബാങ്ക് ഓഫ് ഇന്ത്യ, ആക്സിസ് ബാങ്ക്, ബജാജ് ഫിൻസെർവ്, ഏഷ്യൻ പെയിന്റ്സ്, സൊമാറ്റോ എന്നിവയാണ് ഏറ്റവും കൂടുതൽ നേട്ടമുണ്ടാക്കിയ ഓഹരികൾ.

സെക്ടറൽ സൂചികകളിൽ നിഫ്റ്റി മീഡിയ സൂചികയാണ് കൂടുതല്‍ നേട്ടമുണ്ടാക്കിയത്. സൂചിക 4.72 ശതമാനം ഉയർന്നു. നിഫ്റ്റി റിയലിറ്റി (+2.47%), നിഫ്റ്റി ഓട്ടോ (+1.63%), നിഫ്റ്റി ഓയിൽ & ഗ്യാസ് (+2.20%), നിഫ്റ്റി ഫാർമ (+1.91%), നിഫ്റ്റി കൺസ്യൂമർ ഡ്യൂറബിൾസ് +2.59 ശതമാനവും ഉയർന്നു. ബിഎസ്‌ഇ മിഡ്‌ക്യാപ് സൂചിക 1.8 ശതമാനവും സ്‌മോൾക്യാപ് സൂചിക 2 ശതമാനവും ഉയർന്നു.

പിന്തുണയും പ്രതിരോധവും

നിഫ്റ്റി

പിവറ്റ് പോയിന്റുകളെ അടിസ്ഥാനമാക്കിയുള്ള പ്രതിരോധം: 22,664, 22,765, 22,928

പിന്തുണ: 22,338, 22,238, 22,075

ബാങ്ക് നിഫ്റ്റി

പിവറ്റ് പോയിന്റുകളെ അടിസ്ഥാനമാക്കിയുള്ള പ്രതിരോധം: 50,737, 50,917, 51,208

പിന്തുണ: 50,154, 49,974, 49,682

പുട്ട്-കോൾ അനുപാതം

വിപണിയുടെ മാനസികാവസ്ഥയെ സൂചിപ്പിക്കുന്ന നിഫ്റ്റി പുട്ട്-കോൾ അനുപാതം (PCR), ഏപ്രിൽ 8 ന് 0.84 ആയി ഉയർന്നു.

ഇന്ത്യ വിക്സ്

വിപണിയിലെ ചാഞ്ചാട്ടം അളക്കുന്ന ഇന്ത്യ വിക്സ്, കഴിഞ്ഞ ഒറ്റ സെഷനിൽ 65.7 ശതമാനം വർദ്ധനവിന് ശേഷം 10.31 ശതമാനം ഇടിഞ്ഞ് 20.44 ലെവലിലെത്തി. എന്നിരുന്നാലും, അത് ഉയർന്ന തലത്തിൽ തന്നെ തുടർന്നു.

വിദേശ പോർട്ട്‌ഫോളിയോ നിക്ഷേപകർ

വിദേശ പോർട്ട്‌ഫോളിയോ നിക്ഷേപകർ ചൊവ്വാഴ്ച 4,995 കോടി രൂപയുടെ ഓഹരികൾ വിറ്റു. ആഭ്യന്തര നിക്ഷേപകർ 3,097 കോടി രൂപയുടെ ഓഹരികൾ വാങ്ങി.

രൂപ

ചൊവ്വാഴ്ച യുഎസ് ഡോളറിനെതിരെ രൂപയുടെ മൂല്യം 50 പൈസ ഇടിഞ്ഞ് 86.26 ൽ ക്ലോസ് ചെയ്തു.

എണ്ണവില

എണ്ണവില ബാരലിന് 1 ഡോളറിൽ കൂടുതൽ ഇടിഞ്ഞ് നാല് വർഷത്തെ ഏറ്റവും താഴ്ന്ന നിലയിലെത്തി. ബ്രെന്റ് ക്രൂഡ് ഓയിൽ 1.47 ഡോളർ (2.29%) ഇടിഞ്ഞ് 62.74 ഡോളറിലെത്തി. യുഎസ് ഡബ്ല്യുടിഐ ക്രൂഡ് ഓയിൽ ബാരലിന് 1.26 ഡോളർ (2.08%) കുറഞ്ഞ് 59.44 ഡോളറിലെത്തി. യുഎസ്-ചൈന വ്യാപാര സംഘർഷവുമായി ബന്ധപ്പെട്ട മാന്ദ്യ ഭീതിയാണ് വിലയിടിവിന് കാരണം.

ഇന്ന് ശ്രദ്ധിക്കേണ്ട ഓഹരികൾ

ഹോം ഫസ്റ്റ് ഫിനാൻസ് കമ്പനി ഇന്ത്യ

ഏപ്രിൽ 8 ന് കമ്പനി 1,250 കോടി രൂപയുടെ ക്വാളിഫൈഡ് ഇൻസ്റ്റിറ്റ്യൂഷൻ പ്ലേസ്‌മെന്റ് (ക്യുഐപി) ഇഷ്യു ആരംഭിച്ചു. ഒരു ഓഹരിക്ക് 1,019.25 രൂപയായി അടിസ്ഥാന വില നിശ്ചയിച്ചു.

വോഡഫോൺ ഐഡിയ

36,950 കോടി രൂപയ്ക്ക് കമ്പനിയുടെ 3,695 കോടി ഓഹരികൾ ഇന്ത്യാ സർക്കാരിന് അനുവദിച്ചു. അലോട്ട്മെന്റിനുശേഷം, വോഡഫോണിൽ ഇന്ത്യാ സർക്കാരിന്റെ ഓഹരി പങ്കാളിത്തം 48.99% ആയി.

ഭാരത് പെട്രോളിയം കോർപ്പറേഷൻ

ഇന്ത്യയിലുടനീളമുള്ള പുനരുപയോഗ ഊർജ്ജ, ഗ്രീൻ ഹൈഡ്രജൻ പദ്ധതികൾ പര്യവേക്ഷണം ചെയ്യുന്നതിനായി സെംബ്കോർപ്പ് ഗ്രീൻ ഹൈഡ്രജൻ ഇന്ത്യയുമായി കമ്പനി ഒരു സംയുക്ത സംരംഭ (ജെവി) കരാറിൽ ഏർപ്പെട്ടു.

ഐആർബി ഇൻഫ്രാസ്ട്രക്ചർ ഡെവലപ്പേഴ്സ്

മാർച്ചിൽ ടോൾ പിരിവ് 15.8% വർദ്ധിച്ച് 556.8 കോടി രൂപയായി. കഴിഞ്ഞ വർഷം ഇതേ മാസത്തിൽ ഇത് 480.9 കോടി രൂപയായിരുന്നു. 2025 സാമ്പത്തിക വർഷത്തിൽ ടോൾ വരുമാനം 23% വർദ്ധിച്ച് 6,360 കോടി രൂപയായി. 2024 സാമ്പത്തിക വർഷത്തിൽ ഇത് 5,169 കോടി രൂപയായിരുന്നു.

എൻടിപിസി

ഗുജറാത്തിലെ ഭുജിൽ 150 മെഗാവാട്ട് ദയാപാർ വിൻഡ് എനർജി പ്രോജക്ട് ഫേസ്-I-ൽ 90 മെഗാവാട്ടിന്റെ വാണിജ്യ പ്രവർത്തനങ്ങൾ കമ്പനി പ്രഖ്യാപിച്ചു. 2023 നവംബറിൽ തന്നെ 50 മെഗാവാട്ടിന്റെ വാണിജ്യ പ്രവർത്തനത്തിൽ ഉൾപ്പെടുത്തിയതായി പ്രഖ്യാപിച്ചിരുന്നു. ഇതോടെ, എൻ‌ടി‌പി‌സി ഗ്രൂപ്പിന്റെ മൊത്തം സ്ഥാപിത, വാണിജ്യ ശേഷി 80,020 മെഗാവാട്ട് ആയി മാറും.

ഹിന്ദുസ്ഥാൻ എയറോനോട്ടിക്സ്

ഏപ്രിൽ 9 മുതൽ പ്രാബല്യത്തിൽ വരുന്ന ഒരു മാസത്തേക്ക് കൂടി പ്രതിരോധ മന്ത്രാലയം കമ്പനിയുടെ ചെയർമാനും മാനേജിംഗ് ഡയറക്ടറുമായ ഡി കെ സുനിലിന് ഡയറക്ടറുടെ (എഞ്ചിനീയറിംഗ്, ആർ ആൻറ് ഡി ) അധിക ചുമതല നൽകി.

സ്റ്റാലിയൻ ഇന്ത്യ ഫ്ലൂറോകെമിക്കൽസ്

ഏപ്രിൽ 8 മുതൽ പ്രാബല്യത്തിൽ വരുന്ന തരത്തിൽ വീരേന്ദ്രകുമാർ മേത്തയെ കമ്പനിയുടെ ചീഫ് ഫിനാൻഷ്യൽ ഓഫീസറായി ബോർഡ് നിയമിച്ചു.