ആഗോള സൂചനകള്‍ സമ്മിശ്രം, ക്രൂഡ് താഴ്ചയില്‍; ഇന്ന് വിപണി തുറക്കും മുമ്പ് അറിയേണ്ടത്

വിപണികളികളിലെ വികാരം പോസിറ്റിവായി തുടരുന്നുവെങ്കിലും ഉയര്‍ന്ന മൂല്യ നിര്‍ണയം വെല്ലുവിളിയായി ഉണ്ടെന്ന് വിദഗ്ധര്‍ വിലയിരുത്തുന്നു. ബെഞ്ച്മാര്‍ക്ക് സൂചികകള്‍ പുതിയ ഉയരങ്ങളിലെത്തിയതിനു ശേഷം വെള്ളിയാഴ്ചത്തെ സെഷിനില്‍ നിക്ഷേപകര്‍ ലാഭ ബുക്കിംഗിലേക്ക് നീങ്ങിയിരുന്നു. എങ്കിലും കാളകള്‍ സജീവമായി രംഗത്തുണ്ടെന്നാണ് വിലയിരുത്തപ്പെടുന്നത്.

ഫെബ്രുവരി 23 ന് ബിഎസ്ഇ സെൻസെക്‌സ് 15 പോയിൻ്റ് താഴ്ന്ന് 73,143ലും നിഫ്റ്റി 5 പോയിൻ്റ് നഷ്ടത്തിൽ 22,213ലും ക്ലോസ് ചെയ്തു. തുടര്‍ച്ചയായ എട്ടാം സെഷനിലും നിഫ്റ്റി പുതിയ സര്‍വകാല ഉയരം കുറിച്ചു.

നിഫ്റ്റിയുടെ പ്രതിരോധവും പിന്തുണയും

പിവറ്റ് പോയിൻ്റ് കാൽക്കുലേറ്റർ സൂചിപ്പിക്കുന്നത് നിഫ്റ്റി 22,190ലും തുടർന്ന് 22,163ലും 22,121ലും ഉടനടി പിന്തുണ സ്വീകരിക്കാൻ സാധ്യതയുണ്ട് എന്നാണ്. ഉയർന്ന ഭാഗത്ത്, അത് 22,223ലും തുടർന്ന് 22,301ലും 22,344ലും ഉടനടി പ്രതിരോധം കാണാനിടയുണ്ട്.

ആഗോള വിപണികളില്‍ ഇന്ന്

വെള്ളിയാഴ്ചത്തെ വ്യാപാരത്തില്‍ യുഎസ് വിപണികള്‍ സമ്മിശ്ര തലത്തിലായിരുന്നു. എസ് & പി 500 1.77 പോയിൻ്റ് അഥവാ 0.03 ശതമാനം ഉയർന്ന് 5,088.8 പോയിൻ്റിൽ അവസാനിച്ചു, അതേസമയം നാസ്ഡാക്ക് കോമ്പോസിറ്റ് 44.80 പോയിൻ്റ് അഥവാ 0.28 ശതമാനം നഷ്ടപ്പെട്ട് 15,996.82 ലെത്തി. ഡൗ ജോൺസ് ഇൻഡസ്ട്രിയൽ ആവറേജ് 62.42 പോയിൻ്റ് അഥവാ 0.16 ശതമാനം ഉയർന്ന് 39,131.53 എന്ന നിലയിലെത്തി. എന്‍വിഡിയയുടെ വമ്പന്‍ റിസള്‍ട്ട് സൃഷ്ടിച്ച ആക്കം യുഎസ് വിപണികളില്‍ അയഞ്ഞു തുടങ്ങിയെന്നാണ് വിലയിരുത്തപ്പെടുന്നത്.

ഏഷ്യന്‍ വിപണികള്‍ ഇന്ന് സമ്മിശ്ര തലത്തിലാണ് വ്യാപാരം ആരംഭിച്ചിട്ടുള്ളത്. ചൈനയുടെ ഷാങ്ഹായ്, ഹോംഗ്കോംഗിന്‍റെ ഹാങ്സെങ്, ദക്ഷിണ കൊറിയയുടെ കോസ്പി എന്നിവയെല്ലാം ഇടിവിലാണ്. ജപ്പാനിന്‍റെ നിക്കി, ഓസ്ട്രേലിയയുടെ എഎസ്എക്സ് എന്നിവ പച്ചയിലാണ്.

ഗിഫ്റ്റ് നിഫ്റ്റി ഇന്ന് 19 പോയിന്‍റിന്‍റെ നഷ്ടത്തോടെയാണ് വ്യാപാരം ആരംഭിച്ചിട്ടുള്ളത്. ബെഞ്ച്മാര്‍ക്ക് സൂചികകളുടെ തുടക്കവും ഇടിവിലോ ഫ്ലാറ്റായോ ആകുമെന്ന സൂചനയാണ് ഡെറിവേറ്റിവ് വിപണി നല്‍കുന്നത്.

ഇന്ന് ശ്രദ്ധ നേടുന്ന ഓഹരികള്‍

റെയിൻ ഇൻഡസ്ട്രീസ്: മൂന്നാം പാദത്തിൽ പെട്രോളിയം കോക്ക് നിർമ്മാതാവ് 107.9 കോടി രൂപയുടെ ഏകീകൃത അറ്റ ​​നഷ്ടം രേഖപ്പെടുത്തി. മുൻ വർഷം ഇതേ കാലയളവിൽ ലാഭം 12.6 കോടി രൂപയായിരുന്നു. താഴ്ന്ന വരുമാനം, തേയ്മാന ചെലവ്, ഉയർന്ന സാമ്പത്തിക ചെലവ് എന്നിവ പ്രകടനത്തെ ബാധിച്ചു. പ്രവർത്തനങ്ങളിൽ നിന്നുള്ള ഏകീകൃത വരുമാനം 25 ശതമാനം ഇടിഞ്ഞ് 410 കോടി രൂപയായി.

ബയോകോൺ: ഉപകമ്പനിയായ ബയോകോൺ ജനറിക്‌സ് ഇങ്കിന് 20 മില്യൺ ഡോളറിൻ്റെ ടേം ലോൺ ലഭിക്കുന്നതിനായി മിസുഹോ ബാങ്കിന് മുമ്പാകെ 20 മില്യൺ ഡോളറിൻ്റെ കോർപ്പറേറ്റ് ഗ്യാരണ്ടി കമ്പനി നൽകി. കോർപ്പറേറ്റ് ഗ്യാരണ്ടി 5 വർഷത്തേക്ക് സാധുതയുള്ളതാണ്.

ജെഎസ്‍ഡബ്ല്യു ഇൻഫ്രാസ്ട്രക്ചർ: നോർത്ത് കാർഗോ ബെർത്ത്-3ന്‍റെ യന്ത്രവൽക്കരണത്തിനായി വി ഒ ചിദംബരനാർ പോർട്ട് അതോറിറ്റിയിൽ നിന്ന് ജെഎസ്‍ഡബ്ല്യു ഗ്രൂപ്പ് കമ്പനിക്ക് ലെറ്റർ ഓഫ് അവാർഡ് ലഭിച്ചു. പൊതു-സ്വകാര്യ പങ്കാളിത്തത്തില്‍ നടപ്പാക്കുന്ന പദ്ധതിയിലൂടെ തുറമുഖത്ത് ഡ്രൈ ബൾക്ക് കാർഗോ കൈകാര്യം ചെയ്യുന്നത് സുഗമമാക്കാനാണ് ലക്ഷ്യമിടുന്നത്.

ഫോസ്‌കോ ഇന്ത്യ: ഫൗണ്ടറി കൺസ്യൂമബിൾസ് ആൻഡ് സൊല്യൂഷൻസ് കമ്പനിയുടെ അറ്റാദായം ഡിസംബറിൽ അവസാനിച്ച ത്രൈമാസത്തിൽ 33 ശതമാനം വാര്‍ഷിക വളർച്ച രേഖപ്പെടുത്തി 16.3 കോടി രൂപയായി. പ്രവർത്തന വരുമാനം 15.7 ശതമാനം വർധിച്ച് 122.3 കോടി രൂപയായി.

കൊട്ടക് മഹീന്ദ്ര ബാങ്ക്: 5,560 കോടി രൂപയ്ക്ക് പ്രൈമറി, സെക്കണ്ടറി ഏറ്റെടുക്കലുകളുടെ സംയോജനത്തിലൂടെ കോട്ടക് ജനറലിൻ്റെ 70 ശതമാനം ഓഹരികൾ സൂറിച്ച് ബാങ്ക് ഏറ്റെടുക്കുന്നതിന് ധാരണയായി. ഒറ്റ ഘട്ടത്തിലൂടെയാണ് ഏറ്റെടുക്കല്‍ നടക്കുക.

ക്രൂഡ് ഓയില്‍ വില

ക്രൂഡ് ഓയിൽ വില മൂന്നാഴ്ചയ്ക്കിടയിലെ ഏറ്റവും വലിയ ഇടിവിന് ശേഷം സ്ഥിരത കൈവരിച്ചു, വില ഇപ്പോഴും ഇടുങ്ങിയ ശ്രേണിയിലാണ് വ്യാപാരം നടക്കുന്നത്.

ബ്രെൻ്റ് ക്രൂഡ് ഓയിൽ വെള്ളിയാഴ്ച 2.5 ശതമാനം ഇടിഞ്ഞതിന് ശേഷം തിങ്കളാഴ്ച വ്യാപാരത്തില്‍ 0.15 ശതമാനം ഇടിഞ്ഞ് ബാരലിന് 81.50 ഡോളറിലെത്തി., യുഎസ് വെസ്റ്റ് ടെക്സസ് ഇൻ്റർമീഡിയറ്റ് 0.18% ഇടിഞ്ഞ് 76.35 ഡോളറിലെത്തി.

വിദേശ ഫണ്ടുകളുടെ ഗതി

വിദേശ സ്ഥാപന നിക്ഷേപകർ (എഫ്ഐഐകൾ) ഫെബ്രുവരി 23ന് ഓഹരികളില്‍ 1,276.09 കോടി രൂപയുടെ അറ്റവാങ്ങല്‍ നടത്തി. ആഭ്യന്തര സ്ഥാപന നിക്ഷേപകർ (ഡിഐഐകൾ) 176.68 കോടി രൂപയുടെ വാങ്ങല്‍ നടത്തിയെന്നും എൻഎസ്ഇയിൽ നിന്നുള്ള താൽക്കാലിക കണക്കുകൾ വ്യക്തമാക്കുന്നു.

ഓഹരി വിപണി വാര്‍ത്തകള്‍ അറിയാന്‍

നിരാകരണം: ഈ ലേഖനം വിജ്ഞാനത്തെ മാത്രം ഉദ്ദേശിച്ചുള്ളതാണ്, നിക്ഷേപ ശുപാര്‍ശയല്ല. ഓഹരി നിക്ഷേപം വിപണിയുടെ ലാഭ നഷ്ട സാധ്യതകൾക്ക് വിധേയമാണ്. ഓഹരി വിപണിയിൽ നിക്ഷേപിക്കും മുമ്പെ അംഗീകൃത സാമ്പത്തിക വിദഗ്ധന്റെ സേവനം തേടേണ്ടതാണ്. നിക്ഷേപങ്ങളിലൂടെയുണ്ടാകുന്ന നഷ്ടങ്ങള്‍ക്ക് ലേഖകനോ മൈഫിന്‍ പോയിന്‍റിനോ ഉത്തവരാദിത്തം ഉണ്ടായിരിക്കുന്നതല്ല.

വിപണി തുറക്കും മുന്‍പുള്ള മൈഫിന്‍ ടിവിയിലെ ലൈവ് അവലോകനം കാണാം